Read berom Bara BeIsrayɛl 19 Bible Online

Bara BeIsrayɛl 19 - berom bible

Bara BeIsrayɛl 19

¹Dagwi Darwey a nɔ̂ng Mose na Aharon nu,

²na yɛn a nɔ̂ng BeIsrayɛl redu remo ngan: “Yɛn a vey a yin na shep rɔndɔng shinang de ya vɔk rām kɛ pyɛ cak vyes wɛt, yane de ba ga sang rɔgɔs a yɛ swesêk vɔk berɔndɔng arɔng wɛt.

³Jut in yɛ, na yin nɔ̂ng Ɛlɛyazar, piris yɛ. Ba rɔda wɔ mɛ e bamâ kwɔ̂n ye ngyɔk, ko bê yɛrɛ yɛ e nuyel mɛ.

⁴Ɛlɛyazar a rɔda vɛ nemi mo na kwɛn vwɔ mɛ, ko a zagat nɛ zang taama e bak nuyêl bûk sangâl Dagwi.

⁵Ba rɔda rangas rɔndɔng o burang e bayis mɛn mwa na rehwo mo, na banama mo, na nemi mo, tanga mwa lagey o.

⁶Yɛ piris o a rɔda jut cɔgɔ̂t sida, na kelang hísɔ̀p na shwey sinang, ko a bomo yɛ̄ e kya de ba sé rangas mɛ rɔndɔng o.

⁷E bama mo, a rɔda kus berugu mɛ, ko a kus ɛ. Ano arɔng, a rɔda tɔk yel e kwɔ̂n ye ngyɔk, ko ê nàra ligis vɔk e nawiri.

⁸Yɛ mwat de a rangas rɔndɔng o a rɔda kus berugu mɛ arɔng, a to kus ɛ, ko ê nàra ligis vɔk e nawiri.

⁹“Mwat hwak de a sé haalal a rɔda tula nefongôl kyâ rɔndɔng o, ko a wɔ̀ tik nɛ e kwɔn de ha sé haalal e bamâ kwɔ̂n ye ngyɔk. Ba rɔda tik nɛ naka, yaga na BeIsrayɛl be tɛ̀sɛ nɛ e ji nshi de na sé yaga tɛ́sɛ bemat haalal. Be ra negwɔn nane mo e tô narâ nɔrɔ̂ fûng banɛn.

¹⁰Yɛ mwat de a tula nefongôl kya mo a rɔda kus berugu mɛ, ko ê nàra ligis vɔk e nawiri. Redu remo ngan ra rɔda sè nesheneshey yaga mwa BeIsrayɛl tanga bemât yére dyuk de ba sé na sangal e tē mɛn.

¹¹“Kawɛ mwat de a ra revîn mwat a rɔda se ligis nepɔlɔ netaama.

¹²A rɔda vɛ nshi ne tɛ̂ mwat haalal, na a kus ɛ mɛ e tuk hê tat tanga hê taama, ko a rɔda tɛ́ ɛ haalal. Ka sede a kus ɛ e tuk hê tat tanga hê taama wɛt, ko ê nàra ligis.

¹³Kawɛ mwat de a ra revîn mwat hwak, ko a kyɛ́ ɛ nà tɛ̀ tó mɛ haalal, a rɔda nàra ligis, yaga ba ga waram hɛ na nshi de ne tɛ̀ mwat a tɛ́ ɛ haalal wɛt. Ko neligis mɛ mo na rɔda sè e ra to mɛ. Yi ano, a sé tɛ̀ bûk sangâl Dagwi ligis arɔng. A ga row neken mɛ, ko bê ró ɛ yi e ji BeIsrayɛl.

¹⁴“Ka sede mwat a ku e ji buk, kawɛ mwat de a yel e gwɛ, na kawɛ mwat de a sé sangal e ji mo e jeng o, a rɔda sè ligis nepɔlɔ netaama.

¹⁵Ko kahɛ rwey kɛ shi de ha sé e buk o, de ha sé pyot sana bang hɛ naka, ha rɔda sè ligis arɔng.

¹⁶Kawɛ mwat de a sé e cwɛl, ka sede a ra revîn mwat de ba mɔrɔ kɛ de reku ra jut ɛ zɔng, kɛ a ra gwokup mwasi, kɛ a ra sak mwat ayi, a rɔda sè ligis nepɔlɔ netaama.

¹⁷“Ka sede bê pat neligis yi e mwat hwak, ba rɔda vɛ nefongôl kyâ rɔndɔng wo fugût banɛn o, ba rɔda tɛ̀ nɛ e ji shi, ko be vɛ nshi de na sé tele, be tɛ̀ e ji mo.

¹⁸Mwat de a sé haalal a rɔda jut kelang hísɔ̀p, a sing ke na nshi mo, ko a zagat nɛ e ra bûk revîn mwat o, na e ra mwa pyɛ́ de ya sé e ji mo, tanga e ra bemat de ba sé e hwomo arɔng. Kɛ a rɔda zagat nɛ e ra mwat de a ga kana ra gwokup mwasi, kɛ sak mwat, kɛ revîn mwat e cwɛl.

¹⁹Yɛ mwat de a sé haalal o, a rɔda zagat nshi e ra yɛ womo de a ga tɛ́ ɛ ligis o e tuk hê tat tanga hê taama, na a fung ɛ mɛ. E tuk hê taama mo, mwat o a rɔda tɛ́ ɛ haalal. Yɛ womo de a fung a yɛ banɛn o, a rɔda kus berugu mɛ, a kus ɛ, ko e nawiri nane mo a rɔda tɛ́ ɛ haalal.

²⁰“Ka sede yɛ mwat de a ga tɛ́ ɛ ligis o, a to kyɛ́ ɛ na tɛ̀ to mɛ haalal, a ga row neken mɛ, ko bê ró ɛ yi e ji regyɛng bemât Israyɛl, yaga a ga tɛ̀ bûk sangâl Dagwi Darwey gwo tɛ́ ɛ ligis. A rɔda nàra ligis, yaga ba ga waram hɛ na nshi de ne tɛ̀ mwat a tɛ́ ɛ haalal wɛt.

²¹Redu à remo de ma nɔng na BeIsrayɛl be gyeng rɛ nesheneshey. Yɛ mwat de a zagat bemat na nshî tɛ̂ bemat haalal o, gbing-gbing na a kus berugu mɛ, ko kawɛ mwat de a ra nshi mo, a rɔda sè ligis vɔk e nawiri.

²²Kayɛ pyɛ de mwat de a sé ligis a ra yɛ, ya ga tɛ́ ɛ ligis arɔng, ko kawɛ mwat de a ra pyɛ yane mo arɔng, a rɔda tɛ́ ɛ ligis vɔk e nawiri.”