Read berom Bara BeIsrayɛl 2 Bible Online

Bara BeIsrayɛl 2 - berom bible

Bara BeIsrayɛl 2

¹Dagwi Darwey a ha a Mose na Aharon neha nemo ngan:

²Kayɛ jeng de BeIsrayɛl bê tɛsɛ kwɔ̂n ye ngyɔk kawɛ mwat a rɔda tɛ̀ buk mɛ e nɛ̂n tuta gbɔng regyɛng mɛ, na e nɛ̂n ketuta lɔ mɛ. Ko ba rɔda tɛsɛ kwɔ̂n ye ngyɔk o mwa, na be rɔnɔ mɛ bûk sangâl Dagwi, ko be nɔng tyɛl na buk o.

³Gbɔng regyɛng de ra sé e nɛ̂n tuta Yuda, e bagyɛng mɛn, ba rɔda tɛ̀ kwɔ̂n ye ngyɔk mɛn e rwa rak. Mwât nuyel mɛn, yɛ à Nashon, hwêy Aminadap;

⁴nepyak mɛn na sé gu kuru bataama na vɛ banaas na naga betyiimin (74,600).

⁵Yerê Isakar yê tɛ̀ kwɔ̂n ye ngyɔk mɛn bagat na yɛn. Mwât nuyel mɛn, yɛ à Nɛtanɛl, hwêy Zuwar;

⁶nepyak mɛn na sé gu kuru batungun na vɛ banaas na naga benaas (54,400).

⁷Yerê Zɛbulun yê tɛ̀ kwɔ̂n ye ngyɔk mɛn bagat na yɛn arɔng. Mwât nuyel mɛn, yɛ à Ɛliyap, hwêy Hɛlɔn;

⁸nepyak mɛn na sé gu kuru batungun na vɛ bataama na naga benaas (57,400).

⁹Mwa nepyak gbɔng regyɛng Yuda: gu naga na kuru rwit na vɛ batyiimin na naga benaas (186,400). Yɛn vɛ de yɛn a rɔda susu kwɛngɛl.

¹⁰Gbɔng regyɛng de ra sé e nɛ̂n tuta Rubɛn, e bagyɛng mɛn, ba rɔda tɛ̀ kwɔ̂n ye ngyɔk mɛn e rwa batin. Mwât nuyel mɛn, yɛ à Ɛlizur, hwêy Shɛdɛyur;

¹¹nepyak mɛn na sé gu kuru banaas na vɛ batyiimin na naga betungun (46,500).

¹²Yerê Simɛyɔn yê tɛ̀ kwɔn ye ngyɔk mɛn bagat na yɛn. Mwât nuyel mɛn, yɛ à Shɛlumiyɛl, hwêy Zurishadai;

¹³nepyak mɛn na sé gu kuru batungun na vɛ shabatat na naga betat (59,300).

¹⁴Yerê Gat yê tɛ̀ kwɔ̂n ye ngyɔk mɛn bagat na yɛn arɔng. Mwât nuyel mɛn, yɛ à Ɛliyasaf, hwêy Dɛyuwɛl;

¹⁵nepyak mɛn na sé gu kuru banaas na vɛ batungun na naga betyiimin na kuru batungun (45,650).

¹⁶Mwa nepyak gbɔng regyɛng Rubɛn: gu naga rining na kuru batungun na rɛ rining na naga benaas na kuru batungun (151,450). Yɛn vɛ de yɛn a rɔda raa na kwɛngɛl.

¹⁷E bama mo, BeLevi ba rɔda kyè e tê bagbɔng bagyɛng baba mo — rê yel na rê bama, ko yɛn ê hashe bûk sangâl Dagwi. Karɛ gbɔng regyɛng rê kyè tyɛng na yerê sangal de ba yong a rɛ, karɛ e nɛ̂n tuta rɛ.

¹⁸Gbɔng regyɛng de ra sé e nɛ̂n tuta Ɛfrayim, e bagyɛng mɛn ba rɔda tɛ̀ kwɔ̂n ye ngyɔk mɛn e rwa ta. Mwât nuyel mɛn, yɛ à Ɛlishama, hwêy Amihut;

¹⁹nepyak mɛn na sé gu kuru banaas na naga betungun (40,500).

²⁰Yerê Manase yê tɛ̀ kwɔ̂n ye ngyɔk mɛn bagat na yɛn. Mwât nuyel mɛn, yɛ à Gamalyel, hwêy Pɛdazur;

²¹nepyak mɛn na sé gu kuru batat na vɛ baba na naga beba (32,200)

²²Yerê Bɛnyamin yê tɛ̀ kwɔ̂n ye ngyɔk mɛn bagat na yɛn arɔng. Mwât nuyel mɛn, yɛ à Abidan, hwêy Gidɛyɔni;

²³nepyak mɛn na sé gu kuru batat na vɛ batungun na naga benaas (35,400).

²⁴Mwa nepyak gbɔng regyɛng Ɛfrayim: gu naga rining na gu rwit, na naga gwining (108,100). Yɛn vɛ de yɛn a rɔda raa na kwɛngɛl.

²⁵Gbɔng regyɛng de ra sé e nɛ̂n tuta Dan, e bagyɛng mɛn ba rɔda tɛ̀ kwɔ̂n ye ngyɔk mɛn e rwa bato. Mwât nuyel mɛn, yɛ à Ahiyɛzɛr, hwêy Amishadai;

²⁶nepyak mɛn na sé gu kuru batyiimin na vɛ baba na naga betaama (62,700).

²⁷Yerê Ashɛr yê tɛ̀ kwɔ̂n ye ngyɔk mɛn bagat na yɛn. Mwât nuyel mɛn, yɛ à Pagiyɛl hwêy Ɔkran;

²⁸nepyak mɛn na sé gu kuru banaas na wɛ gwining na naga betungun (41,500).

²⁹Yerê Naftali yê tɛ̀ kwɔ̂n ye ngyɔk mɛn bagat na yɛn arɔng. Mwât nuyel mɛn, yɛ à Ahira, hwêy Ɛnan;

³⁰nepyak mɛn na sé gu kuru batungun na vɛ batat na naga benaas (53,400).

³¹Mwa nepyak e gbɔng regyɛng Dan: gu naga rining na kuru batungun na vɛ bataama na naga betyiimin (157,600). Yɛn vɛ de yɛn a rɔda raa na kwɛngɛl.

³²Mwa nepyak BeIsrayɛl de ba ga vey tô como, vemo de ba jɛk baza mɛn e gbɔng regyɛng mɛn, regyɛng o regyɛng o, na sé gu naga batyiimin na vɛ batat na naga betungun na kuru batungun (603,550).

³³Ko ba bara BeLevi e ji mɛn wɛt, tyɛng na nu de Dagwi Darwey a nɔ̂ng Mose.

³⁴Ano BeIsrayɛl yɛn a ra kayɛ pyɛ tyɛng na pyɛ de Dagwi Darwey a nɔ̂ng Mose nu. Yɛn a sangal, kawɛ e nɛ̂n tuta mɛ, ko yɛn a kyè kwɛngɛl, kawɛ e lɔ mɛ na ruhup mɛ.