Read berom Bara BeIsrayɛl 20 Bible Online

Bara BeIsrayɛl 20 - berom bible

Bara BeIsrayɛl 20

¹E ji pwɛl gwô susu mo, regyɛng BeIsrayɛl mwa hɛn ba pom e hêy Zin, ko yɛn a tɛ̀ kwɔ̂n ye ngyɔk e Kadɛsh. A sé e hwomo de Miryam a ku, ko ba lɛrɛ hɛ.

²Vit a nshî sɔ e kwɔ̂n ye ngyɔk mɛn o, ko yɛn a hwo wuna hɛn e ra Mose tanga Aharon.

³Yɛn a ra lwɛ́lɛ́ na Mose, ba ye, “A yang dal naka ka wot a kushu tanga begwa mot de Dagwi Darwey a tɛ̀ ba kushu.

⁴Yaga sɛ́ de yin a vey na wot e ngamo, na wot a kushu mwa na yas mot arɛt?

⁵Yaga sɛ́ de yin a pat ot yi e Misra, na yin a vey na wot e kwɔn ves hemo ɛ? Vit a pyɛ̂ yéneng, kɛ nèy cɔ́gɔt regwi, kɛ nèy cɔ́gɔt anap, kɛ nèy cɔ́gɔt pomigiranet, ko vit a nshi de wot ê sɔ arɔng!”

⁶Ko Mose na Aharon ba hala bemat o, ba kyè vɔk e rwi bûk sangâl Dagwi. Yɛn a gaba gup e nuyêl buk o, ko nedyɛt gbɔng nerât Dagwi Darwey na hwo e ra buk o.

⁷Ko Dagwi Darwey a yâng Mose,

⁸“Jut gwele mō, ko hwo na Aharon gwà mō, yin tula bemat o e kwɔn hining. Ha in na gwofwa gworo e bayis mɛn, na gwo nɔng in nshi, ko gwa rɔda vey na nɛ. Ano de hwà rɔda vey na nshi yi e ji gwofwa mo, yaga na bemat vemo tanga yas mɛn be sɔ.”

⁹Ano kwong, Mose a wɔ̀ jut gwele mɛ yi e nuyêl Kundung Wuna-na-Sira, tyɛng na nu de ba nɔng ɛ.

¹⁰Yɛ na Aharon ba tɛ̀ bemat be tula hɛn e nuyel gwofwa mo, ko Mose a yang ɛn, “A yin bemât sogô nehywɛ, wet in betong! Wot ê kyɛm wot vey na nshi yi e gwofwa gwomo arɛt?”

¹¹Ano, a nára vwɔ mɛ, ko a rusu mɛ gwofwa mo na gwele mo, a tɛ̀ ba. Remo remo nshi na nusu hwàalal yi e ji gwofwa, ko bemat mwa tanga yas mɛn yɛn a sɔ.

¹²Ko Dagwi Darwey a gyong Mose tanga Aharon, a ye, “Yin a tɛ̀ gap min e ra me wɛt, ko yin a nɔng me gwong, na me dura a BeIsrayɛl, ma sé Dagwi wo jɛrɛ, wo reto wɛt. Yin ê wɔ̀ kyɔk regyɛng bemat vemo e ji sevwel de ma ga kana sira na me nɔng ɛn wɛt.”

¹³Pyɛ́ yemo ya té e Mɛriba, e kwɔn de BeIsrayɛl ba ra lwɛ́lɛ́ na Dagwi Darwey. A sé e kwɔn o arɔng de a dura a yɛn, yɛ a sé wo jɛrɛ wo reto.

¹⁴Mose a tomo betom yi e Kadɛsh vɔk na gbɔng gwɔ̀m BeƐdɔm. Ba yang ɛ, “Begwa mō BeIsrayɛl ba ye ngan: Hwà tɔk mwa yerê reyɔm de ra hwo e ra wot.

¹⁵Bedabeda mot yɛn á kyè wɔ e Misra, yɛn á sangal e hwomo neshey pyak, ko BeMisra bá tak a wot tanga beda mot reyɔm.

¹⁶Ko jeng de wot á tosho a Dagwi Darwey, ko á wok nemwishish mot, á tomo tom lagwi, na a pat ot yi e Misra. A remo, wot à vemo e Kadɛsh, repomo de ra sé e yɛnɛ̂ sevwel mō.

¹⁷Gabɔk wɛt, simo a wot na wot a kwey e sevwel mō. Wot ê kwey e ji cāp mō kɛ e ji bě anap mō wɛt, kɛ wot ê sɔ nshî hes min wɛt. Wot a rɔda kwey e gbɔng gwong zɔng, wot ê ye rɛng e vwɔ mwɛlɛng kɛ vwɔ yege wɛt, sɛ̌ wot a kwey neyɛnɛ̂ sevwel mō.”

¹⁸Ko bemât Ɛdɔm ba toyo a yɛn na ha, ba ye, “Yin ê tɔk kwey e sevwel mot wɛt! Ka sede yin a mara kwey ɛ, ko wot a rɔda nusu na bemât como, na wot hwo e ra yin.”

¹⁹Ko BeIsrayɛl ba toyo a yɛn, ba yang ɛn, “Wot a rɔda kwey e gbɔng gwong zɔng, ko ka sede wot e simo nshi yaga to mot kɛ yas mot, ko wot a rɔda tala byɛ̂ nɛ. Wot e simo, na wot a kwey e bol zɔng.”

²⁰BeƐdɔm ba to toyo a BeIsrayɛl, yɛn ê kwey e sevwel mɛn wɛt! Ko ba nusu na bemât como pyak vê gap sizɔng,

²¹na be dul ɛn, be kwey e sevwel mɛn wɛt. Ko BeIsrayɛl ba sege gwong o hwak detu.

²²Mwa regyɛng BeIsrayɛl yɛn a hala Kadɛsh, ko yɛn a pom e Raku Hor.

²³Raku mo wa sé bagat na neyɛnɛ̂ sevwêl Ɛdɔm. Ko Dagwi Darwey a yâng Mose na Aharon,

²⁴“Aharon a rɔda wɔ̀ sɛ̀ beda mɛ, yaga yin mwa hin, yin á kana sogo a me na nehywɛ e Mɛriba e kwɔ̂n nshi. Yɛ a rɔda wɔ̀ yel e sevwel de ma ga kana sira na me nɔ̂ng BeIsrayɛl wɛt.

²⁵Jut ɛ na hwey mɛ Ɛlɛyazar, na hwo kyè na yɛn vɔk e ra Raku Hor.

²⁶E hwomo, hwô pat berugu fwôm Aharon na hwo tɛ̀ a Ɛlɛyazar vɛ, yaga Aharon a rɔda wɔ̀ sɛ̀ beda mɛ, ê ku e hwomo e raku.”

²⁷Mose a ra tyɛng na nu de Dagwi Darwey a nɔng ɛ. E bɛrɛng mwa regyɛng bemat, yɛn a tut e ra Raku Hor.

²⁸Ko Mose a pat berugû fwôm Aharon, a tɛ̀ a hwey mɛ Ɛlɛyazar vɛ. Ko Aharon a ku e hwomo e ra raku mo, ko Mose tanga Ɛlɛyazar ba kyè ba gyirik vey na bemat.

²⁹Jeng de BeIsrayɛl ba wok, Aharon a ga ku, ko yɛn ba tosho hɛ nepɔlɔ kuru batat (30).