Read berom Bara BeIsrayɛl 21 Bible Online

Bara BeIsrayɛl 21 - berom bible

Bara BeIsrayɛl 21

¹Gbɔng gwɔ̀m repomô Arat, wo sevwêl Kanaan, de a sé sangal e bak rwa ta wo sevwel o a wok, BeIsrayɛl ba sé kyè vey yi e gwông Atarim. A wɔ̀ hwo e ra yɛn na como, ko a vos behak e ji mɛn.

²Ko BeIsrayɛl ba sira hɛn na Dagwi Darwey, ba ye: “Ka sede hwà nɔng ot wɛng e ra bemat vemo, wot ê wey na yɛn na pyɛ́ mɛn tanga bapomo mɛn mwa hywiri.”

³Dagwi Darwey a wok won mɛn, ko a tɛ̀, yɛn a di wɛng e ra bemât Kanaan. Yɛn a wey na yɛn mwa hywiri, ba gangas bapomo mɛn, ko ba vo a kwɔn o rezâ Hɔrma, wɔgɔ, wey hywiri.

⁴BeIsrayɛl ba sogo yi e Raku Hor, ko yɛn a raa gwong de gwa kyè vɔk e Gbɔng Rep Sere, yaga na yɛn a gwɔrɔ yɛnɛ̂ sevwêl Ɛdɔm. Ko e gwong o yɛn a tɔk niri wɛt.

⁵Yɛn a hwo ha há ves e ra Dagwi tanga Mose. Yɛn a hwo gwɔrɔng, ba tē, “Yaga sɛ́ de yin a pat ot yi e Misra, na wot a ba kushu e ngamo e hey ɛ? Vit a pyɛ̂ re kɛ nshî sɔ e kwɔn hemo! Ko gwománà gwomo gwa ga kyɛ́ ɛ a wot nu!”

⁶Ko Dagwi Darwey a tɛ̀ begwɔ̄m de ba vɔk nedɔm de na royo tyɔng wɛt e tê bemât Israyɛl. Ba roros hɛn, ko pyak e ji mɛn ba kushu.

⁷Ko bwang bemat o ba vey na Mose, ba ye, “Wot a ga ra banɛn, jeng de wot a ha ha ves e ra Dagwi Darwey tanga e ra hwo arɔng! Ra won, yaga na Dagwi Darwey a jut begwɔ̄m vemo yi na wot.” Ano kwong, Mose a ra won yaga bemat o.

⁸Ko Dagwi Darwey a yâng Mose, “Yong gwɔ̄m, na hwo tɛ̀ wɛ e ra gwocwang. Kawɛ mwat de gwɔ̄m wa rɔt ɛ, ka sede a di wɛ, ko a rɔda dal.”

⁹Mose a turu gwɔ̄m na dyam pama, ko a tɛ̀ wɛ e ra gwocwang. Kawɛ mwat de gwɔ̄m wa ga rɔt ɛ, ka sede a ye ganga a gwɔ̄m dyam pama wane, ko a tɛ̀ tyang.

¹⁰BeIsrayɛl ba sogo kwɛngɛl mɛn, ko yɛn a ye ngyɔk e Obot.

¹¹Yɛn a sogo yi e hwomo, ko yɛn a ye ngyɔk e barîn Abarim, e hey e rwa bato na sevwêl Mowap.

¹²Yɛn a to sogo, ba wɔ ye ngyɔk e Nɛk Zɛrɛt.

¹³Yi e hwomo yɛn a to sogo vɔk e rwa bato wo Rɔt Arnɔn, ko yɛn a ye ngyɔk e hwomo e hey de ha kyè vɔk e sevwêl Amɔr. Rɔt Arnɔn ha sé e yɛnɛ̂ bavwêl Mowap tanga Amɔr.

¹⁴A sé yaga ano de ba kana jɛk e ji Bwok-basa cōmo yê Dagwi Darwey ngan: “Repomô Wahep rê bak Sufa na benɛk mɛn. Rɔt Arnɔn

¹⁵tanga yé sɛndɛng benɛk de ba kyè vɔk e repomô Ar, vɔk e yɛnɛ̂ sevwêl Mowap.”

¹⁶Yi e hwomo, yɛn a kyè wɔ e Beer, e kwɔn de Dagwi Darwey a yâng Mose, “Tula bemat mwa e dem hining, ko ma rɔda nɔng ɛn nshi.”

¹⁷E jeng yane, BeIsrayɛl yɛn a ra lwɛ̄lɛ gwomo ngan: “À hwes, ta jɔt nshi! Ko wot ê kyulu nɛ na lwɛ̄lɛ.

¹⁸Hwes de nèy begwɔ̀m na cing, beda berey ba kas gwɛ, ba cing gwɛ na gwelê negwɔm, ba cing gwɛ na begele mɛn.” Yi e hey o, yɛn a kyè vɔk e Matana.

¹⁹Yi e Matana vɔk e Nahaliyɛl, yi e Nahaliyɛl vɔk e Bamot,

²⁰yi e Bamot vɔk e nɛk de wa sé e sevwêl Mowap bagat na Raku Piska de wó bɛrɛng hêy gbingiring.

²¹BeIsrayɛl ba tomo betom vɔk na Sihɔn, gbɔng gwɔ̀m BeAmɔr, na be yang ɛ,

²²“Tik na wot a kwey e sevwel mō. Wot ê kwey e ji cāp kɛ e ji bě anap wɛt; wot ê sɔ nshî hes min arɔng wɛt. Wot a rɔda kyè kwɛngɛl mot zɔng e gbɔng gwong sɛ̌ wot a kwey neyɛnɛ̂ sevwel mō.”

²³Ko Sihɔn a simo a yɛn wɛt. A hwo tula bemât como mɛ mwa, na a wɔ̀ hwo e ra BeIsrayɛl e gwong de gwa yi e hey. Jeng de yɛn a wul Yahas, yɛn a hwo e ra BeIsrayɛl na como.

²⁴Ko BeIsrayɛl ba re ɛn na como, ko yɛn a sey ɛ sevwel mɛn o yi e Rɔt Arnɔn e rwa batin vɔk e Rɔt Yabɔk e rwa bato. E rwa rak yɛn a kyè vɔk e sevwêl BeAmɔn zɔng, yaga BeAmɔn o ba ga dul yɛnɛ̂ sevwel mɛn ding-ding.

²⁵BeIsrayɛl ba sey ɛ mwa bapomô BeAmɔr, vɛ a Hɛshbɔn na mwa nebapomo mɛn, ko yɛn a sangal e vɛ.

²⁶Hɛshbɔn wa kana sè gbɔng repomô Sihɔn, gbɔng gwɔ̀m BeAmɔr, womo de á kana to como na gbɔng gwɔ̀m BeMowap wo raane, ko á sey ɛ yɛnɛ̂ sevwel mɛ mwa vɔk e Rɔt Arnɔn.

²⁷Yaga ano de bemât lwɛ̄lɛ ba kana ra lwɛlɛ, be tē: “Vey in e Hɛshbɔn, gbɔng repomô Gbɔng Gwɔ̀m Sihɔn! Tik na be to yong rɛ, na be to toyo na nerât rɛ.

²⁸Raane, bemât comô Sihɔn ba nusu, ba nusu sede kya yi e Hɛshbɔn kya mo ha wey na repomô Ar wo Mowap, ha re bedaberey vê berahwôl Rɔt Arnɔn.

²⁹Gawey e ra yin, à bemât Mowap! A yin bemât re a Kɛmɔsh fongol, ba ga wey na yin! Pyɛ̂ sekwit min ya vɔk gâp dul in wɛt. Beras de ba dal ba tele, Sihɔn a hashe beha mɛn e sesam, yɛ gbɔng gwɔ̀m BeAmɔr.

³⁰Ano de ba wey na yére mɛn, ba wey na yɛn yi e Hɛshbɔn vɔk e Dibɔn, ba wey na yɛn vɔk e Nɔfa wɔ e Medeba.”

³¹Ano kwong, BeIsrayɛl ba sangal e yɛnɛ̂ sevwêl BeAmɔr.

³²Mose a tomo bemât bɛrɛng nezɛɛt vɔk e repomô Yazɛr. BeIsrayɛl ba re mwa nebapomo rɛ, yɛn a ro BeAmɔr de ba sé sangal e hwomo.

³³A vane ano, BeIsrayɛl ba to ɛn vɔk e gwong de gwa kyè vɔk e Bashan. Ko Ɔk, gbɔng gwɔ̀m Bashan, tanga mwa bemât como mɛ ba nusu, na be wɔ̀ hwo e ra yɛn e Ɛdirɛi.

³⁴Dagwi Darwey a yâng Mose, “Hwo tɛ̀ bengyip mɛ wɛt! Ma ga tɛ̀ ɛ na bemat mɛ, na mwa sevwel mɛ e vwɔ mō. Ra a yɛ tyɛng pyɛ de hwà ra a Sihɔn, gbɔng gwɔ̀m BeAmɔr, de á re negwɔm e Hɛshbɔn.”

³⁵Ano kwong, BeIsrayɛl ba mɔrɔ Ɔk na nèy mɛ bewen o tanga mwa bemat mɛ, ba tɛt ɛ mwat hwak na neken wɛt. Ko yɛn a sey ɛ sevwel o mwa, ba sangal ɛ.