Read berom Bara BeIsrayɛl 22 Bible Online

Bara BeIsrayɛl 22 - berom bible

Bara BeIsrayɛl 22

¹BeIsrayɛl ba hwo kwɛngɛl vɔk e tyɛl Mowap de ya sé e rwa ta na Rɔt Yɔrdan, de ye bɛrɛng Yeriko e gura, ko yɛn a tɛ̀sɛ kwɔ̂n ye ngyɔk mɛn.

²Balak Zipor, gbɔng gwɔ̀m BeMowap, a wok pyɛ de BeIsrayɛl ba ga ra a BeAmɔr.

³Jeng de yɛ na bemat mɛ ba di nepyak BeIsrayɛl ko yɛn a wok bengyip sizɔng.

⁴Ko bemât Mowap ba yâng bemât badu Midyan, “Gwokwarâ bemat vemo gwa rɔda yishing vwel mot, sede remo de kwarâ rɔndɔng wo lɛ̄lɛ sɔng e hey.”

⁵Ano kwong, Gbɔng Gwɔ̀m Balak a tomo betom mɛ, na be wɔ̀ yila a yɛ Balaam Bɛyɔr e repomô Petor de ra sé e rekwogom Gwɔrɔt Ɛifaratɛs e sevwêl BeAmawu. Hâ Balak a het ngan: “Gbɔng regyɛng bemat ra nusu yi e Misra. Yɛn a ga vey kyiri sevwel o mwa, ko yɛn a sé sangal bagat na yɛnɛ̂ sevwel hom.

⁶Yɛn a dal ot na nepyak. Gabɔk wɛt, vey na hwo mok a yɛn gawey. Gyeng rɔ̌ mê re ɛn na como, na me ro ɛn yi e sevwel o. Ma tɔk gâp ha mo, vemo de hwà tɛ̀ nerat e ra yɛn, ko yɛn a rɔda sè vê nerat, ko vemo de hwà mok a yɛn gawey, ko yɛn a rɔda sè vê gawey.”

⁷Bemât badu BeMowap tanga vê BeMidyan ba jut dyām de bê tala hɛ mɛ, na a mok a BeIsrayɛl gawey, ko yɛn a kyè. Jeng de yɛn a pom, ko yɛn a ha a Balaam pyɛ de Balak a ha a yɛn.

⁸Ko Balaam a yang ɛn, “Pɔl in e ngamo, yaga na me bin toyo a yin na pyɛ de Dagwi Darwey ê ha a me.” Ano kwong, bemât badu BeMowap ba pɔl tanga yɛ.

⁹Nabwalak, Dagwi a vey na Balaam, a rangal hɛ, “E beva à vemo tanga hwo arɛt?”

¹⁰Ko Balaam a toyo a yɛ, a ye, “Balak Zipor, gbɔng gwɔ̀m BeMowap, a tomo a me na betom vemo, a ye wɔgɔ,

¹¹bemat de ba nusu yi e Misra ba ga vey kyiri sevwel mɛ, ko me wɔ, na me mok a yɛn gawey. Kɛ gyeng a rɔda tɔk tó como na yɛn, na a ro ɛn e jey.”

¹²Ko Dagwi a yâng Balaam, “Hwo kwon wɔ tanga yɛn wɛt! Hwo kwon mok a bemat vemo gawey wɛt, yaga ma ga tɛ̀ nerat e ra yɛn.”

¹³Sede gasi ha ye gbey, Balaam a yâng bemât badu Balak, “Kyè in vɔk e sevwel min. Dagwi Darwey a ro me de me kyè tanga yin wɛt.”

¹⁴Ano kwong, yɛn a to ɛn vɔk na Balak, yɛn a yang ɛ, “Balaam a kyɛ́ ɛ nà vey tanga wot.”

¹⁵E bama mo, Balak a to tomo bemât badu behak de ba dal vê yel na nepyak, vemo de bê nɔng ɛn nerey.

¹⁶Yɛn a vey na Balaam, ko ba yang ɛ pyɛ de Balak Zipor a ye, “Hwo tik pyɛ cak yɛ dul o sana vey na me wɛt.

¹⁷Mê nɔng o sehwoyo pyak, ko mê ra kayɛ pyɛ de hwà ha. Gabɔk wɛt, vey na hwo mok a bemat vemo gawey.”

¹⁸Ko Balaam a toyo a yɛn, a yang ɛn, “Ka Balak a ka nɔng me lɔ mɛ de a sila na dyam shinang na dyam pyɛng, ko mê tɔk ra pyɛ cak ryey o kɛ shɛl o, na me gyili redu Dagwi Darwey, Dagwi hom wɛt.

¹⁹Ko pɔl in e ngamo, sede remo de bemat vere bá kana ra, yaga na me bin tɔk kɛ Dagwi ê gwɛ̌ ha a me pyɛ cak.”

²⁰E ji turuk hane, Dagwi a vey na Balaam a yang ɛ, “Ka sede bemat vemo ba ga vey yila hwo, kyè tanga yɛn. Ko hwo ra tyɛng na pyɛ de ma ga ha a hwo zɔng.”

²¹Nagasi, Balaam a sogo, a tɛ̀ a madung mɛ wap, ko a kyè tanga bemât badu BeMowap.

²²Ko Dagwi a tɛ̀ shom na yɛ sizɔng, yaga a kyè tanga yɛn. Ko tom-lagwî Dagwi Darwey a tumal e gwong, na a dul ɛ. Jeng de Balaam a sé kyè e ra madung mɛ, ko besam mɛ beba ba sé tanga yɛ,

²³ko madung o wa di tom-lagwi o e tumal e gwong na celes wal e vwɔ mɛ, ko wa ye rɛng e regyeng. Balaam a rusu wɛ, yaga na a toyo na wɛ e gwong.

²⁴Ano, tom-lagwi a to wɔ̀ tumal e gwong de gwa sé ngyɔgɔdɔk e tê bě anap ba, ko gwong o gwa sé sorok na varâ beta e bahagat o.

²⁵Sede madung wa di ɛ, ko wa to sek bagat na vwara, ko wa mǎ a Balaam bwol na vwara mo, ko a to rusu wɛ.

²⁶Ano arɔng, tom-lagwi a to kyè e nuyel tyɔng, a wɔ̀ tumal e kwɔn de ha dal mwa na nengyɔgɔdɔk, vit a kwɔn de madung o wô tɔk ye rɛng, kɛ e vwɔ yege kɛ e vwɔ mwɛlɛng.

²⁷E remo, jeng de madung wa di tom-lagwi, ko wa vɔk wa dyɛng e vwel. Balaam a wok shom sizɔng, ko a hwo rusu wɛ na gwele mɛ.

²⁸Ko Dagwi Darwey a wunta nû madung, ko wa yâng Balaam, “Ma ra a hwo sɛ́ de hwà dak me zang tat ano arɛt?”

²⁹Balaam a toyo a wɛ a ye, “Hwo jut me, ma sé tɔn arɛt? Ka ma yang vɔk wal e vwɔ hom, ka ma ga yang mɔrɔ hwo a remo!”

³⁰Ko madung wa to yang ɛ, “E me de ma sé madung mō de hwó lagsa wɛ kayɛ jeng wɛt arɛt? Ma ga sang ra a hwo pyɛ cak sede yemo arɛt?” Ko Balaam a ye, “Wey.”

³¹Ko Dagwi Darwey a wunta a Balaam bayis, ko a di tom-lagwi e tumal e gwong na celes wal e vwɔ mɛ. Ko a gaba e cat bol mɛ.

³²Tom-lagwi a rangal hɛ, a ye, “Yaga sɛ́ de hwà dak madung mō zang tat ano arɛt? Ma vey, na me dul kwɛngɛl mo, yaga kwɛngɛl o gwa sé vwes e bayis hom.

³³Madung wa di me, ko wa ye rɛng zang tat e jey. Ka ano wɛt, ka ma ga yang mɔrɔ hwo, ko ma yang tik wɛ na neken.”

³⁴Balaam a toyo a tom-lagwi, a ye, “Ma ga ra banɛn. Ma tɔk hwà sé tumal e gwong, yaga na hwo dul me wɛt. Ko di, ka sede kwɛngɛl hom gwa jam a hwo wɛt, ko ma rɔda to me vɔk e lɔ.”

³⁵Tom-lagwi a yang ɛ, “Kyè tanga bemat o, ko hwo ha pyɛ de ma ha a hwo zɔng.” Ano kwong, Balaam a kyè tanga bemât badu Balak.

³⁶Jeng de Balak a wok Balaam a sé kyè vey, a nusu, na a wɔ̀ man na yɛ e repomô yel e sevwêl Mowap bagat na Rɔt Arnɔn.

³⁷A yâng Balaam, “Ma ga kana tomo a hwo na betom, na be yila a me hwo vey na me wɛt a? Yaga sɛ́ de hwà vey wɛt ɛ? Mê tɔk tala hwo sehwoyo mō wɛt arɛt?”

³⁸Balaam a toyo a yɛ, a yang ɛ, “Ma ga vey na hwo a remo. Ma vɔk reto na me ha pyɛ cak a? Mê tɔk ha neyɛnɛ̂ pyɛ de Dagwi ê tɛ̀ e nu hom zɔng.”

³⁹Ko a kyè tanga Balak vɔk e Kiryat Huzɔt.

⁴⁰E hwomo Balak a nára pyɛ̂ nɔrɔ mɛ vɔk na Dagwi, berɔndɔng na vyēl pyɛng na shi mo, ko a nɔ̂ng Balaam na bemât badu de ba sé tanga yɛ numo mɛn.

⁴¹Nusu hwol nagasi, Balak a kyè na Balaam, ba tut vɔk e Bamot Baal. Yi e hwomo, a di neyɛnɛ̂ bemât Israyɛl mwa.