Read berom Bara BeIsrayɛl 23 Bible Online

Bara BeIsrayɛl 23 - berom bible

Bara BeIsrayɛl 23

¹Balaam a yâng Balak, “Lɔk a me nekwɔn rangâs yas vɔk na Dagwi netaama e ngamo, na hwo yong a me bemus betaama na beturuk betaama.”

²Balak a ra tyɛng na pyɛ de Balaam a ha a yɛ, ko yɛn beba ba nára mus tanga turuk e ra kahɛ kwɔn o.

³Ano, Balaam a yâng Balak, “Tumal e ngamo e hagât kwɔ̂n narâ nɔrɔ mō, ko mê sek tyɔng vɔk e jey, gyeng Dagwi Darwey a rɔda dura to mɛ na me. Ko mê vey ha a hwo pyɛ de a dura a me.” Ano kwong a kyè vɔk e rahwôl gbingiring.

⁴Dagwi a dura a yɛ to mɛ, ko Balaam a yang ɛ, “Ma ga yong nekwɔn rangâs yas netaama, ko e ra kahɛ kwɔn o, ma ga nára ɛ mus tanga turuk.”

⁵Dagwi Darwey a tɛ̀ há mɛ e nû Balaam, ko a yang ɛ, a toyo vɔk na Balak, na a ha a yɛ ha mo.

⁶Balaam a to ɛ, ko a sɛ̀ Balak e tumal e hagât kwɔ̂n narâ nɔrɔ mɛ, yɛ tanga mwa bemât badu BeMowap.

⁷Ko Balaam a hwo ha ha hemo ngan: “Balak a vey na me yi e sevwêl BeAram, gbɔng gwɔ̀m BeMowap a vey na me yi e berakû rwa rak. A ye, ‘Vey mok a me gawey e ra yerê Yakɔp, vey ha há ves e ra BeIsrayɛl.’

⁸E rɛ̌ de mê mok gawey e ra vemo de Dagwi a ga mok gawey e ra yɛn wɛt ɛ? E rɛ̌ de mê ha há ves e ra vemo de Dagwi Darwey, a ga ha há ves e ra yɛn wɛt ɛ?

⁹Yi e ra tɛ̂t rakû beta ma di ɛn, yi e ngamo e rak o me bɛrɛng hɛn. Yɛn a sé yere de ya sangal nju yɛ, Yɛn e suk ɛn na yére cak wɛt.

¹⁰E wa de e tɔk basa nepyak bemât Yakɔp vemo ɛ? BeIsrayɛl be kyiri vwel sede fongol. Tik na me ku reku rèrat, tik na neyɛnɛ hom ne sè sede nemɛn.”

¹¹Ko Balak a yâng Balaam, “E sɛ́ a yemo de hwà ra a me ɛ? Ma vey na hwo, na hwo mok a bemât repugu hom gawey, ko di, hwà tɛ̀ a yɛn nerat!”

¹²Balaam a toyo a yɛ, a yang ɛ, “Mê tɔk ha neyɛnɛ̂ pyɛ de Dagwi Darwey a tɛ̀ e nu hom zɔng.”

¹³E bama mo, Balak a yâng Balaam, “Vey, na wot a kyè vɔk e kwɔn de hwô tɔk di ɛn, ko hwô di bak o swɛl o zɔng, na hwo mok a yɛn gawey yi e hwomo.”

¹⁴A jut ɛ vɔk e cwɛ̂l Zofim e ra tɛ̂t Raku Piska. E hwomo, a to lɔk nekwɔn rangâs yas vɔk na Dagwi netaama, ko a nára ɛ mus gwining tanga turuk gwining e ra kahɛ kwɔn o.

¹⁵E bama mo, Balaam a yâng Balak, “Tumal e ngamo e hagat kwɔ̂n narâ nɔrɔ mō, ko me ma rɔda sek vɔk e hworo, na me wɔ̀ di pyɛ de Dagwi ê dura a me.”

¹⁶Dagwi Darwey a dura reto mɛ na Balaam, ko a tɛ̀ ha mɛ e nu mɛ, a yang ɛ, a toyo vɔk na Balak, na a ha a yɛ ha mo.

¹⁷A to ɛ, ko a sɛ̀ Balak e tumal e hagât kwɔ̂n narâ nɔrɔ mɛ, yɛ tanga bemât badu BeMowap. Ko Balak a rangal hɛ pyɛ de Dagwi Darwey a ha a yɛ.

¹⁸Balaam a to hwo ha ha hemo ngan: “Sogo a Balak, na hwo wet betong; wok me, à hwêy Zipor.

¹⁹Dagwi a sé sede mwasi wɛt, e vɛ bɔs, kɛ e sege ha mɛ wɛt. Mwa pyɛ de e ha, ê ra yɛ, pyɛ de e sira hɛ, ê sila yɛ.

²⁰A ga nɔng me nu, na me tɛ̀ a bemat vemo nerat. Sede Dagwi a tɛ̀ a mwat nerat, ko mê tɔk sege wɛt.

²¹Vit à pyɛ vyes cak de ya rɔda hwo e ra yerê Yakɔp, Vit a gawey de BeIsrayɛl ba rɔda di Dagwi Darwey, Dagwi mɛn, a sé tanga yɛn. Yɛn e mok ɛ sede gbɔng gwɔ̀m mɛn.

²²Dagwi a nusu na yɛn yi e Misra, e ra yol yaga yɛn sede kpâm-cungun.

²³Vit a pyɛ sekwit kɛ vyoshon de bê kyɛm be ra mɛ fwom e ra Israyɛl. Ba rɔda ye e ra yerê Yakɔp, e ra BeIsrayɛl, ‘Di pyɛ de Dagwi a ga ra!’

²⁴Di, bemat vemo be wɛrɛm sede gukum, yɛn e sogo sede gwɔ̀m ngyāma, wó tɔk sangal wɛt sɛ̌ wa vo pyɛ, na wo re, na wo sɔ nemî pyɛ de wa ga mɔrɔ.”

²⁵Ko Balak a yâng Balaam, “Ka sede hwà simo mok a yɛn gawey wɛt, ko hwo tɛ̀ nerat e ra yɛn wɛt!”

²⁶Balaam a toyo a yɛ, a yang ɛ, “Ma ga kana ha a hwo, mwa neyɛnɛ̂ pyɛ de Dagwi Darwey a ha a me, e yɛ de ma rɔda ra wɛt a?”

²⁷Ano kwong, Balak a yâng Balaam, “Vey, na me jut o vɔk e kwɔn hak. Gyeng, Dagwi a rɔda simo, na hwo mok a yɛn gawey yi e hwomo.”

²⁸Ko a jut ɛ vɔk e ra tɛ̂t Raku Peyor de wo bɛrɛng hêy gbingiring.

²⁹Balaam a ye, “Lɔk a me nekwɔn rangâs yas netaama e ngamo, na hwo yong bemus betaama tanga beturuk betaama.”

³⁰Balak a ra tyɛng na pyɛ de Balaam a ha a yɛ, ko a nára mus gwining tanga turuk gwining e ra kahɛ kwɔn o.