Read berom Bara BeIsrayɛl 24 Bible Online

Bara BeIsrayɛl 24 - berom bible

Bara BeIsrayɛl 24

¹Sede remo de Balaam a di de a jam a Dagwi Darwey, na a tɛ̀ a BeIsrayɛl nerat, yɛ a to jama retô dî pyɛ́ mo sede raane wɛt. Ko a doyo bayis mɛ vɔk e hey,

²a ye ganga, ko a di BeIsrayɛl ba sé sangal bagyɛng o bagyɛng o e yére mɛn. Gabik Dagwi ha hwo e ra yɛ,

³ko a hwo ha ha hemo ngan: “Hâ Balaam hwêy Beyor a hemo, hâ mwat de bayis mɛ be bɛrɛng kyɛrɛng,

⁴hâ womo de e wokos hâ Dagwi. Me bɛrɛng pyɛ́ na negwi-ywey yi na Dagwi Wo Retô Mwa, me ye guduruk, ko bayis hom ba sé pyot.

⁵A yin, BeIsrayɛl, à yin, yére Yakɔp, bǔk de yin e sangal ɛ ba sé rat.

⁶Ba sé sede batîn tyet de ba tyɛngrɛ vɛ, sede hiri de ba sé e vwarâ rɔt, sede batîn berang alowe de Dagwi Darwey a tus, sede batîn cɔ́gɔt sida de ba sé e vwarâ rep.

⁷Hes BeIsrayɛl be vɛsɛ na nshi kayɛ jeng, pyɛ́ de ba tus ye sɛsɛm nshi pyak. Gbɔng gwɔ̀m BeIsrayɛl a rɔda dal Agak; ba rɔda gwɛ a negwɔm mɛ nerey.

⁸Dagwi a nusu na yɛn yi e Misra, e ra yol yaga yɛn sede cungun. Yɛn ê re bemât repugu mɛn na como hywiri. Yɛn a rɔda kwɔrɔs bekup mɛn, sede ngyama ye kwɔrɔs bekup ngyama cak, bebara mɛn ba rɔda kulsa vê repugu mɛn.

⁹Yɛn e dyɛng wulum e vwel sede gukum, gwɔ̀m ngyāma, wa de ê kyɛm, a ra ɛ arɛt? Mwat de ê tɛ̀ a yin BeIsrayɛl nerat, bê tɛ̀ a yɛ nerat arɔng, vê nerat à vemo de bê tɛ̀ nerat e ra hwo, womo de ê mok a yin gawey, bê mok a yɛ gawey arɔng. Ko gawey e ra vemo de bê tɛ̀ gawey e ra hwo!”

¹⁰Balak a tɛ̀ shom e ra Balaam sizɔng, bek mɛ ha vow, ko a yang ɛ, “Ma yila hwo, na hwo mok a bemât repugu hom gawey, ko hwo, hwà ga tɛ̀ nerat e ra yɛn, hê tat a hemo!

¹¹Sogo, na hwo kyè dey-dey vɔk e lɔ mo! Ma ga kana ye, mê nɔng o sehwoyo pyak. Ko Dagwi Darwey a ga ro o nà sɛ̀ sehwoyo mo.”

¹²Ko Balaam a toyo a yɛ, a ye, “Ma kana ha a betom de hwà kana tomo a me mɛ wɔgɔ,

¹³ka hwà ka nɔng me lɔ mō de hwà sila na dyam shinang na dyam pyɛng, ko mê tɔk ra pyɛ cak ye to hom ko tyɔng wɛt de yê tɛ̀ me tik nà gyeng hâ Dagwi Darwey. A sé pyɛ de Dagwi Darwey a ha a me zɔng de mê ha yɛ.

¹⁴A remo, mê to me vɔk e lɔ. Ko tik na me ha a hwo gyam yerê pyɛ de bemat vemo mo ba rɔda ra a bemat mō e nepɔlɔ de ne kyè vey.”

¹⁵E bama mo, Balaam a hwo ha ha hemo ngan: “Hâ Balaam, hwêy Beyor a hemo, hâ mwat de bayis mɛ be bɛrɛng kyɛrɛng.

¹⁶Hâ womo de e wokos hâ Dagwi, womo de a sɛ̀ tɔk yi na Womo De A Dal Mwa Na Nerey. Me bɛrɛng na negwi-ywey yi na yɛ Wo Retô Mwa, me ye guduruk, ko bayis hom ba sé pyot:

¹⁷Ma di mwat, ko a ga wul wɛt, me bɛrɛng hɛ, ko a sé bagat wɛt. Tangacɛn wa rɔda sogo yi e yére Yakɔp, gbɔng gwɔ̀m a rɔda yi e BeIsrayɛl. Yɛ a rɔda mɔbɔs batilî bemât Mowap, a rɔda bunut bekup ratô yére Shɛt.

¹⁸A rɔda re BeƐdɔm na BeSeyir na como, bavwel mɛn o bê sè bemɛ. Ko BeIsrayɛl ba rɔda re nuyel na dî wɛng.

¹⁹Mwat de ê re negwɔm a rɔda yi e lɔ Yakɔp, a rɔda wey na bwang bemat de ba tɛt ɛ e repomô Ir.”

²⁰E bama mo sede Balaam a di yerê vwêl BeAmalɛk, ko a hwo ha ha hemo ngan: “Bemât Amalɛk ba kana sé vê yel e ji bemât yére jey, ko e yɛnɛ mo, bê wey na yɛn mwa hywiri.”

²¹Sede a di yerê vwêl BeKeni, ko a to hwo ha ha hemo ngan: “A yin BeKeni, kwɔ̂n sangal min ha sé tyang, ha sé tyang sede rɛngɛ de ha sé e raku e ji beta.

²²Mwa ano, kya ha rɔda re in e jeng de BeAsirya ba rɔda ba hashe hin vɔk e de sesam.”

²³Ano arɔng, a gwɛ ha neha nemo ngan: “E wa de ê kyɛm a sangal na neken, jeng de Dagwi ê ra pyɛ́ yemo arɛt?

²⁴Bemât como, ba rɔda vey yi e rezîk Kipirus e bedwa-nshi, yɛn a rɔda wey na bemât Asirya, tanga vê Ɛbɛr, ko yɛn arɔng ba rɔda wey hywiri.”

²⁵E bama mo, Balaam a vɔk a yong ɛ, a to ɛ vɔk e lɔ, ko Balak a kyè wɛrɛ e lɔ mɛ arɔng.