Read berom Bara BeIsrayɛl 25 Bible Online

Bara BeIsrayɛl 25 - berom bible

Bara BeIsrayɛl 25

¹BeIsrayɛl ba sangal e Shitim. E hwomo, yɛn a hwo ragas nejwang na behâ BeMowap.

²Beha mo ba yila hɛn nzem nása nenɔrɔ̂ yas vɔk na pyɛ sekwît BeMowap. BeIsrayɛl o ba re pyɛ̂ nzem o, ko ba re a pyɛ sekwit,

³de ba tang yɛ a Baal wo Raku Peyor fongol arɔng. Ko Dagwi Darwey a tɛ̀ shom na yɛn sizɔng.

⁴A yâng Mose, “Jut mwa bemât nuyêl BeIsrayɛl, mɔbɔs hɛn e nuyêl hom na mwa bemat, yaga na gbɔng shom hom ye bin ye rɔ̀s e ra BeIsrayɛl.”

⁵Ano kwong, Mose a ha a bemât shɔ̂t BeIsrayɛl, a yang ɛn, “Kawɛ e ji min a rɔda mɔbɔs bemat yére mɛn vemo de ba wuna to mɛn e de re a Baal wo Raku Peyor fongol.”

⁶E jeng o, WoIsrayɛl hwak a vey na hwâ BeMidyan e buk mɛ, e bayîs Mose tanga mwa regyɛng BeIsrayɛl de ba ga tula hɛn e rwi bûk sangâl Dagwi, yɛn a sè tosho.

⁷Pinehas Ɛlɛyazar, hwêy hwêy Aharon, piris, a di ano, a hala regyɛng bemat, a wɔ̀ jut bara,

⁸ko a raa hɛ mɛ vɔk e buk ji mo. A luga hɛ na wɛ mwa na hwā mo. Ko tumbang de wa kana hwo e ji BeIsrayɛl wa yɛnɛ hɛ,

⁹ko wa ga kana mɔbɔs bemat gu kuru baba na vɛ banaas (24,000).

¹⁰Dagwi Darwey a ha na Mose, a yang ɛ,

¹¹“Yaga pyɛ de Pinehas Ɛlɛyazar Aharon a ra, ma to me wok shom na BeIsrayɛl wɛt. A tɔk niri na re a pyɛ̂ sekwit fongol wɛt sɛ̌ me zɔng. A sé yaga ano de ma wey na yɛn e ji shom hom wɛt.

¹²Yaga ano, ha a yɛ, ma sé wuna me na sirâ netyang na yɛ.

¹³Sira mo ha rɔda tɛ̀ yɛ na yere mɛ, yɛn a sè bepiris hom nesheneshey. Hemo ha rɔda se pyɔlɔ mɛ, yaga a tɔk niri na vemo de be ra repugu na me wɛt, ko a to ra fwôm talâ-nɛn yaga BeIsrayɛl.”

¹⁴Rezâ WoIsrayɛl de ba mɔrɔ hɛ na hwâ BeMidyan à Zimri Salu, dalɔ ruhup hwak gwo yerê Simɛyɔn.

¹⁵Ko rezâ hwā mo a Kospi hwông Zur wo ruhûp lɔ gwɔ̀m BeMidyan hwak.

¹⁶Dagwi Darwey a to yâng Mose,

¹⁷“Wɔ̀ hwo e ra BeMidyan na como, na yin wey na yɛn.

¹⁸Yɛn a vey hwo e ra yin na setɔgɔs, na yin a re a Baal wo Raku Peyor fongol, ko yaga pyɛ de Kospi a ra, womo de ba mɔrɔ hɛ e jeng tumbang de wa vey e ra yin.”