Read berom Bara BeIsrayɛl 27 Bible Online

Bara BeIsrayɛl 27 - berom bible

Bara BeIsrayɛl 27

¹Zelofehat Hɛfɛr Gileyat Makir yi e ruhup Manase Yɔsɛf a vɔk behwong betungun, baza mɛn à Mala, na Nowa, na Hogla, na Milka, tanga Tirza.

²Yɛn a vey bagat na rwi bûk sangâl Dagwi, ko ba tumal e nuyêl Mose na Ɛlɛyazar, piris, na bemât nuyêl yére BeIsrayɛl tanga mwa regyɛng BeIsrayɛl arɔng, ko yɛn a ye,

³“Da mot á ku e hey. Á sè gwining e ji bemât raà Kora wɛt. BeKora mo ba wey, yaga yɛn a sogo a Dagwi Darwey na nehywɛ. Ko yɛ á ku sede bwang bezamang mɛ de ba kyɛ́ ɛn nà gyeng hâ Dagwi, ko a tik ɛ hwêy wen wɛt.

⁴A sé tyɛng na rezâ da mot re wey e ji ruhup mɛ, yaga a vɔk hwêy wen wɛt a? Nɔng ot benap mot e ji vê begwa da mot.”

⁵Ko Mose a jut ha mɛn o vɔk e nuyêl Dagwi Darwey.

⁶Ko Dagwi Darwey a yang ɛ,

⁷“Pyɛ de behwông Zelofehat ba ra won o ya sé tyɛng. Gas a yɛn benap na begwa da mɛn, na hwo nɔng ɛn numo hê da mɛn.

⁸Ko yâng BeIsrayɛl ngan: Ka sede mwat hwak a ku, vit a hɛ nà hwêy wen, ko be nɔ̂ng hwóng mɛ nap mɛ.

⁹Ko ka sede a vɔk hwêy hwong wɛt, ko ba rɔda nɔ̂ng begwa mɛ wɛ.

¹⁰Ka sede a vɔk begwa wɛt, ko be nɔ̂ng begwa da mɛ wɛ.

¹¹Ko ka sede da mɛ mo a vɔk begwa wɛt, be nɔ̂ng mwât lɔ mɛ womo de a sé bagat na yɛ wɛ, yaga na yɛ a vɔk wɛ. Hemo ha rɔda sè redu e ji BeIsrayɛl tyɛng na redu de me, Dagwi Darwey ma nɔng o.”

¹²Dagwi Darwey a yâng Mose, “Tūt e ra berakû Abarim, na hwo di sevwel de ma ga kana sira, na me nɔ̂ng BeIsrayɛl.

¹³E bama de hwà ga di sɛ, hwà rɔda wɔ̀ sɛ̀ beda mo arɔng sede gwa mō Aharon.

¹⁴Yaga e hêy Zin yin á kyɛ́ in nà gyeng ha hom. Jeng de regyɛng BeIsrayɛl mwa yɛn a ra lwɛ́lɛ́ na me, ko yin a nɔng me gwong wɛt, na me dura a BeIsrayɛl, ma sé Dagwi wo jɛrɛ, wo reto.” A sé yaga ano de ba hwo yishi nshî Kadɛsh à Mɛriba, wɔgɔ, rá lwɛ́lɛ.

¹⁵Mose a ha na Dagwi Darwey, a ye,

¹⁶“À Dagwi Darwey, hwo de hwo nɔngɔs bemat mwa neken, hwô kasa mwat hwak, na a sè wo nuyêl regyɛng BeIsrayɛl,

¹⁷womo de a rɔda kyè e nuyel mɛn e ji kayɛ pyɛ. Ano kwong bemat mō bê sè sede vyēl de vit a yɛ nà lwek.”

¹⁸Ko Dagwi Darwey a toyo a Mose, a ye, “Jut Yɔshuwa Nun, mwat de ma nɔng ɛ tɔ̂k pyɛ́. Tik na a tumal e nuyêl Ɛlɛyazar piris, tanga mwa regyɛng bemat, ko tɛ̀ ɛ, na a sè mwat de ê sey fwom mō. Hwo tɛ̀ vɔ mō e ra yɛ,

²⁰ko hwo nɔng ɛ hak e ji reto de hwà vɔk, yaga na mwa BeIsrayɛl be raa ha mɛ.

²¹Yɛ ê vos badu na Ɛlɛyazar, de a rɔda jama há yi na me e to mɛ yi na râ fwom na Urim na Tumim de wo dura a yɛ pyɛ de a rɔda ra. Gwong a gwomo de Ɛlɛyazar ê dura a Yɔshuwa na mwa regyɛng BeIsrayɛl pyɛ de yɛn ê ra kayɛ jeng.”

²²Ko Mose a ra tyɛng na nu de Dagwi Darwey a nɔng ɛ. A tɛ̀ Yɔshuwa a tumal e nuyêl Ɛlɛyazar, piris, tanga regyɛng bemat.

²³Mose a tɛ̀ vɔ mɛ e ra yɛ, ko a tɛ̀ ɛ, a sè mwat de ê sey fwom mɛ, sede remo de Dagwi Darwey a misang a yɛ.