Read berom Bara BeIsrayɛl 28 Bible Online

Bara BeIsrayɛl 28 - berom bible

Bara BeIsrayɛl 28

¹Dagwi Darwey a yâng Mose,

²a nɔ̂ng BeIsrayɛl redu remo wɔgɔ, a sé gbing-gbing na yɛn a vey nára a yɛ, e jeng de ba kana tik ɛ̀, nenɔrɔ̂ pyɛ̂ re de na sé yaga yɛ. Nesang nenɔrɔ mo ne pɛngɛ a yɛ yey.

³Ha a yɛn ngan: Nemo nɛ a nenɔrɔ̂ pyɛ̂ re de yin a rɔda vey mɛ e nuyêl Dagwi Darwey: Yaga nɔrɔ̂ yas burang yê kahɛ tuk, vey in na bebôt beturuk beba vê shey hining de ba vɔk ram kɛ pyɛ cak vyes wɛt.

⁴Nára hin gwining nagasi ko gwining o nawiri.

⁵Na nɔrɔ̂ kawɛ turuk o, vey in na neshǐ masâ pyɛ́ neba ne nemuk nerat de ba suk nɛ na shǐ masa hining hê něy pwat de na dal na nerat yaga nɔrɔ̂ nemuk.

⁶Yemo yɛ a nɔrɔ hê kahɛ tuk de be rangas burang. Ba kana nára hɛ e mɛsɛng o e jeng de BeIsrayɛl ba sè e Raku Sinai sede nɔrɔ̂ pyɛ̂ re de nesang yɛ ne pɛngɛ a Dagwi Darwey yey.

⁷Ko yin ê tɛ̀ a kahɛ nɔrɔ̂ bwôt turuk o nɔrɔ̂ pyɛ̂ sɔ, hɛ à shǐ masa hining hê nshî anap de yin ê shusha nɛ e kwɔ̂n jɛrɛ. Yemo ya sé nɔrɔ̂ pyɛ̂ re de nesang yɛ ne pɛngɛ a Dagwi Darwey yey.

⁹Kahɛ Tuk Shábat, be nára nɔrɔ̂ bebôt beturuk beba vê shey hining de ba vɔk ram kɛ pyɛ cak vyes wɛt yaga nɔrɔ̂ yas burang. Bê wuna hɛ na neshǐ masa pyɛ́ neba ne nemuk nerat de ba suk nɛ na shǐ masa hining hê něy pwat yaga nɔrɔ̂ nemuk, ko bê vɔk ɛ nɔrɔ̂ pyɛ̂ sɔ arɔng.

¹⁰Nɔrɔ ma hemo de yin ê nára kahɛ Tuk Shábat. Ba rɔda nára hɛ, na be gwɛ̌ mɛ e ra hê kahɛ tuk mwa na hê pyɛ̂ sɔ mo arɔng.

¹¹E tûk mɛsɛng hê kagwɛ pwɛl, yin a rɔda vey na bebôt bemus beba, na turuk gwining tanga bebôt beturuk betaama vê shey hining, ko yas o ye vɔk ram kɛ pyɛ cak vyes wɛt yaga nɔrɔ̂ yas burang.

¹²Yin ê wuna nɔrɔ̂ kayɛ yas o na nɔrɔ̂ nemuk hê nemuk nerat de ba suk nɛ na něy pwat. Nepyak nemuk o nê sè ngan, neshǐ masâ pyɛ́ netat yaga kawɛ mus, neshǐ neba yaga turuk o,

¹³ko shǐ hining yaga kawɛ bwot turuk. Nenɔrɔ̂ yas burang o na sé nenɔrɔ̂ pyɛ̂ re de nesang yɛ ne pɛngɛ a Dagwi Darwey yey.

¹⁴Ba rɔda vey na be neshǐ masa neba ne nshî anap yaga nɔrɔ̂ kawɛ mus, shǐ masa hining na bit o yaga nɔrɔ̂ kawɛ turuk, na shǐ masa hining yaga nɔrɔ̂ kawɛ turuk arɔng. Yin a rɔda nɔng nɔrɔ̂ pyɛ́ yemo e susû kagwɛ pwɛl e shey.

¹⁵Ko yin a rɔda nára nɔrɔ̂ gam gwining sede nɔrɔ̂ fûng banɛn, na be gwɛ̌ mɛ e ra nɔrɔ̂ yas burang hê kahɛ tuk na hê pyɛ̂ sɔ.

¹⁶Ragas hin Nzem Gyilsit Nelɔ BeIsrayɛl e pɔlɔ hê kuru na hɛ naas e pwɛ̂l susu shey.

¹⁷Ko e tuk de ha raa, yin hwo ra Nzem Kpam-tuk Sana Géy-sing. Yin re kpam-tuk de wa vɔk ɛ géy-sing wɛt nepɔlɔ netaama.

¹⁸E tuk hê mɛsɛng hê nepɔlɔ netaama mo, tula hin yaga rê fongol. Yin ra tom de yin a ga tɔ́k in mɛ kahɛ tuk wɛt.

¹⁹Nára hin a Dagwi Darwey nɔrɔ̂ yas burang, hɛ a nɔrɔ̂ pyɛ̂ re, hɛ a yê bebôt bemus beba, na turuk gwining tanga bebôt beturuk betaama vê shey hining, ko yas o ye vɔk ram kɛ pyɛ cak vyes wɛt.

²⁰Yin ê wuna nɔrɔ̂ kayɛ yas o na nɔrɔ̂ nemuk hê nemuk nerat de ba suk nɛ na něy pwat. Nepyak nemuk o nê se ngan, neshǐ masâ pyɛ́ netat yaga kawɛ mus, neshǐ neba yaga turuk o,

²¹ko shǐ hining yaga kawɛ bwot turuk.

²²Nára hin gam gwining arɔng sede nɔrɔ̂ fûng banɛn. Yi ano, yin a rɔda ra mɛ̀ pyɛ́ de ya dura talâ-nɛn yaga yin.

²³Yin a rɔda nára pyɛ́ yemo, na be gwɛ̌ mɛ e ra nɔrɔ̂ yas burang de yin e nása kanɛ nagasi.

²⁴E kahɛ tuk nzem nepɔlɔ netaama mo, yin ê raa gwong gwining o, na yin a nára a Dagwi Darwey nɔrɔ̂ pyɛ̂ re de nesang yɛ ne pɛngɛ a Dagwi Darwey yey. Yin ê nára nɔrɔ mo nepɔlɔ netaama, na be gwɛ̌ mɛ e ra nɔrɔ̂ yas burang hê kahɛ tuk na hê pyɛ̂ sɔ.

²⁵E tuk hê taama, yin to tula hin yaga rê fongol, ko yin ra tom de yin a ga tɔk in mɛ kahɛ tuk wɛt.

²⁶E tuk hê mɛsɛng hê Nzem Bwal, jeng de yin a vey a Dagwi Darwey na nɔrɔ̂ pyɛ́ pyas yê cap min ko yin tula hin yaga rê fongol, ra tom de yin a ga tɔ́k in mɛ kahɛ tuk wɛt.

²⁷Nára hin nɔrɔ̂ yas burang de nesang yɛ ne pɛngɛ a Dagwi yey. Ha rɔda sè bebôt bemus beba, na turuk gwining tanga bebôt beturuk betaama vê shey hining.

²⁸Yin ê wuna nɔrɔ̂ kayɛ yas o na nɔrɔ̂ nemuk hê nemuk nerat de ba suk nɛ na něy pwat. Nepyak nemuk o nê se ngan, neshǐ masâ pyɛ́ netat yaga kawɛ mus, neshǐ neba yaga turuk o,

²⁹ko shǐ hining yaga kawɛ bwôt turuk.

³⁰Nára hin gam gwining arɔng sede nɔrɔ̂ fûng banɛn. Yi ano, yin a rɔda ra mɛ pyɛ́ de ya dura talâ-nɛn yaga yin.

³¹Nára hin nenɔrɔ̂ yas o mwa na ne pyɛ̂ sɔ, na be gwɛ̌ mɛ e ra nɔrɔ̂ yas burang na hê nemuk hê kahɛ tuk. Tik na kayɛ yas o ye vɔk ram kɛ pyɛ cak vyes wɛt.