Read berom Bara BeIsrayɛl 29 Bible Online

Bara BeIsrayɛl 29 - berom bible

Bara BeIsrayɛl 29

¹E tuk hê susu mo e pwɛl gwô netaama, yin a rɔda tula hin yaga rê fongol, ko yin ra tom de yin a ga tɔ́k in mɛ kahɛ tuk wɛt. E tuk hane, be pɛsɛl bedurum.

²Yin ê nára nɔrɔ̂ yas burang de nesang yɛ ne pɛngɛ a Dagwi Darwey yey. Yas nɔrɔ mo, yɛ a bwôt mus gwining, na turuk gwining tanga bebôt beturuk betaama vê shey hining, ko yas o ye vɔk ram kɛ pyɛ cak vyes wɛt.

³Yin ê wuna nɔrɔ̂ kayɛ yas o na nɔrɔ̂ nemuk hê nemuk nerat de ba suk nɛ na něy pwat. Nepyak nemuk o nê se ngan, neshǐ masâ pyɛ́ netat yaga mus o, neshǐ neba yaga turuk o,

⁴ko shǐ hining yaga kawɛ bwot turuk.

⁵Nára hin gam gwining arɔng yaga nɔrɔ fûng banɛn. Yi ano, yin a ra mɛ pyɛ́ de ya dura talâ-nɛn yaga yin.

⁶Yin a rɔda nára pyɛ́ yemo, na be gwɛ̌ mɛ e ra nɔrɔ̂ yas burang hê tuk hê mɛsɛng hê pwɛl pwas tanga nɔrɔ̂ nemuk hɛ, na e ra nɔrɔ̂ yas burang hê kahɛ tuk tanga hê nemuk na hê pyɛ̂ sɔ. Nesang nɔrɔ̂ pyɛ́ re yemo ne pɛngɛ a Dagwi Darwey yey.

⁷E tuk hê kuru e pwɛl gwô netaama, yin a rɔda tula hin yaga rê fongol. Yin re pyɛ́ kɛ yin ra fwom ko tyɔng wɛt.

⁸Ko yin ê nára nɔrɔ̂ yas burang de nesang hɛ ne pɛngɛ a Dagwi Darwey yey. Yas nɔrɔ mo, yɛ a bwôt mus gwining, turuk gwining tanga bebôt beturuk betaama vê shey hining, ko yas o ye vɔk ram kɛ pyɛ cak vyes wɛt.

⁹Yin ê wuna nɔrɔ̂ kayɛ yas o na nɔrɔ̂ nemuk hê nemuk nerat de ba suk nɛ na něy pwat. Nepyak nemuk o nê se ngan, neshǐ masâ pyɛ́ netat yaga mus o, neshǐ neba yaga turuk o,

¹⁰ko shǐ hining yaga kawɛ bwôt turuk.

¹¹Nára hin gam gwining arɔng yaga nɔrɔ̂ fûng banɛn. Yin a rɔda nára pyɛ́ yemo, na be gwɛ̌ mɛ e ra gam de bê nára yaga nɔrɔ̂ tala na halâ-nɛn BeIsrayɛl, na e ra nɔrɔ̂ yas burang hê kahɛ tuk tanga hê nemuk na hê pyɛ̂ sɔ.

¹²E tuk hê kuru na hɛ tungun e pwɛl gwô netaama, yin a rɔda tula hin, yaga rê fongol. Yin ra tom de yin a ga tɔ́k in mɛ kahɛ tuk wɛt. Ra in a Dagwi Darwey nzem nepɔlɔ netaama.

¹³E tuk hê mɛsɛng o, nára nɔrɔ̂ yas burang, hɛ a nɔrɔ̂ pyɛ̂ re de nesang yɛ ne pɛngɛ a Dagwi Darwey yey. Nára hin bebôt bemus kuru na vɛ betat, na beturuk beba tanga bebôt beturuk kuru na vɛ benaas vê shey hining, ko yas o ye vɔk ram kɛ pyɛ cak vyes wɛt.

¹⁴Yin ê wuna nɔrɔ̂ kayɛ yas o na nɔrɔ̂ nemuk hê nemuk nerat de ba suk nɛ na něy pwat. Nepyak nemuk o nê se ngan, neshǐ masâ pyɛ́ netat yaga kawɛ mus, neshǐ neba yaga kawɛ turuk,

¹⁵ko shǐ hining yaga kawɛ bwôt turuk.

¹⁶Nára hin gam gwining arɔng yaga nɔrɔ̂ fûng banɛn. Nára hin nenɔrɔ̂ yas o mwa, na be gwɛ̌ mɛ e ra nɔrɔ̂ yas burang hê kahɛ tuk tanga hê nemuk na hê pyɛ̂ sɔ.

¹⁷E tuk hê neba, nára hin bebôt bemus kuru na vɛ beba, na beturuk beba tanga bebôt beturuk kuru na vɛ benaas vê shey hining. Yas o ye vɔk ram kɛ pyɛ cak vyes wɛt.

¹⁸Nára hin tanga yas o bwang nenɔrɔ mo mwa tyɛng na pyɛ de ba nɔng nu, na be ra e tuk hê susu mo.

²⁰E tuk hê tat, nára hin bebot bemus kuru na wɛ gwining, na beturuk beba tanga bebôt beturuk kuru na vɛ benaas vê shey hining. Yas o ye vɔk ram kɛ pyɛ cak vyes wɛt.

²¹Nára hin tanga yas o bwang nenɔrɔ mo mwa tyɛng na pyɛ de ba nɔng nu, na be ra e tuk hê susu mo.

²³E tuk hê naas, nára hin bebôt bemus kuru, na beturuk beba tanga bebôt beturuk kuru na vɛ benaas vê shey hining. Yas o ye vɔk ram kɛ pyɛ cak vyes wɛt.

²⁴Nára hin tanga yas o bwang nenɔrɔ mo mwa tyɛng na pyɛ de ba nɔng nu na be ra e tuk hê susu mo.

²⁶E tuk hê tungun, nára hin bebôt bemus shabetat, na beturuk beba tanga bebôt beturuk kuru na vɛ benaas vê shey hining. Yas o ye vɔk ram kɛ pyɛ cak vyes wɛt.

²⁷Nára hin tanga yas o bwang nenɔrɔ mo mwa tyɛng na pyɛ de ba nɔng nu, na be ra e tuk hê susu mo.

²⁹E tuk hê tyiimin, nára hin bebôt bemus rwit, na beturuk beba tanga bebôt beturuk kuru na vɛ benaas vê shey hining. Yas o ye vɔk ram kɛ pyɛ cak vyes wɛt.

³⁰Nára hin tanga yas o bwang nenɔrɔ mo mwa tyɛng na pyɛ de ba nɔng nu, na be ra e tuk hê susu mo.

³²E tuk hê taama, nára hin bebôt bemus betaama, na beturuk beba tanga bebôt beturuk kuru na vɛ benaas. Yas o ye vɔk ram kɛ pyɛ cak vyes wɛt.

³³Nára hin tanga yas o bwang nenɔrɔ mo mwa tyɛng na pyɛ de ba nɔng nu, na be ra e tuk hê susu mo.

³⁵E tuk hê rwit, tula hin yaga bâng nzem. Yin ra tom de yin a ga tɔ́k in mɛ kahɛ tuk wɛt.

³⁶Ko nára hin nɔrɔ̂ yas burang, hɛ a nɔrɔ̂ pyɛ̂ re de nesang yɛ ne pɛngɛ a Dagwi Darwey yey. Nára hin bwôt mus gwining na turuk gwining tanga bebôt beturuk betaama vê shey hining, ko yas o ye vɔk ram kɛ pyɛ cak vyes wɛt.

³⁷Nára hin tanga yas o bwang nenɔrɔ mo mwa tyɛng na pyɛ de ba nɔng nu, na be ra e tuk hê susu mo.

³⁹Nemo a nenɔrɔ de yin ê nára a Dagwi Darwey e jeng de ba ga kana tik ɛ̀ yaga nzem. Bē gwɛ̌ mɛ e ra nenɔrɔ ne yas burang, na ne nemuk, na ne pyɛ̂ sɔ tanga ne wunâ nesa de yin ê nára yaga sila mɛ sira kɛ yaga yey pyɛng ayi.

⁴⁰Ko Mose a ha a BeIsrayɛl mwa neyɛnɛ̂ pyɛ́ de Dagwi Darwey a nɔng ɛ nu e ra yɛ.