Read berom Bara BeIsrayɛl 3 Bible Online

Bara BeIsrayɛl 3 - berom bible

Bara BeIsrayɛl 3

¹E jeng de Dagwi Darwey a ha na Mose e Raku Sinai, Aharon á vɔk nèy bewen benaas, baza mɛn a vemo ngan: Nadap, hwêy yel mɛ, na Abihu, na Ɛliyazar tanga Itamar.

³Ba kana tɛ̀ a yɛn něy, na be tik ɛn jaram, na be ra fwôm bepiris.

⁴Ko Nadap na Abihu, Dagwi Darwey a mɔrɔ hɛn, jeng de yɛn a nára a yɛ nɔrɔ̂ pyɛ̂ nesang hyɔɔlɔl na kya de ha sé kyiri, e hêy gbingiring hê Sinai. Yɛn a kana vɔk nèy wɛt. Á sè Ɛliyazar na Itamar zɔng de yɛn a ra fwôm bepiris e jeng de da mɛn Aharon á rɔngɔl na neken.

⁵Dagwi Darwey a yâng Mose,

⁶“Vey na yerê Levi bagat, na hwo tɛ̀ ɛn, na be sè bemat de bê sɛlɛ Aharon, piris hom.

⁷Tik na be ra pyɛ́ de be simo na yɛn yaga me tanga regyɛng BeIsrayɛl mwa e nuyêl bûk sangal hom; ano de yɛn ê ra fwôm bûk sangal hom.

⁸Tik na be bɛrɛng mwa nedôk pyɛ́ de na sé e ji bûk sangal hom, na be ra fwom o e tô bwâng BeIsrayɛl.

⁹Tɛ̀ BeLevi, be sè e vwɔ̂ Aharon na nèy mɛ, e yɛn vɛ de ba ga nɔng ɛ hɛn yi e ji bwâng BeIsrayɛl.

¹⁰Tɛ̀ Aharon na nèy mɛ, be ra fwôm bepiris. Ka sede mwat de a sé WoLevi wɛt a simo ra fwom o, ko be mɔrɔ hɛ.”

¹¹Dagwi Darwey a to yâng Mose,

¹²“Ma ga jut BeLevi yi e ji BeIsrayɛl e tô mwa nèy bewen ne yêl BeIsrayɛl. BeLevi mo ba rɔda sè benang,

¹³yaga kahɛ hwêy yel ha sé nang. Jeng de ma mɔbɔs mwa nèy yêl BeMisra, ma tik kahɛ hwêy yel e ji BeIsrayɛl jaram yaga to hom, kɛ hwêy mwasi kɛ hwêy yas ayi. Mwa na sé nenang, me wɛ à Dagwi Darwey.”

¹⁴Dagwi Darwey a yâng Mose e hêy Sinai,

¹⁵“Bara, na hwo jɛk bazâ BeLevi mwa nelɔ mo nelɔ mo na rùhup o rùhup o. Hwo bara kahɛ hwêy wen de ha sé pwɛl gwining vɔk e rak o.”

¹⁶Mose a ra ano tyɛng na pyɛ de Dagwi Darwey a nɔng ɛ nu.

¹⁷Levi a vɔk nèy netat, nɛ à Gɛrshɔn, na Kohat tanga Mɛrari. Yɛn vɛ à bedalɔ̂ nelɔ mɛn nemo de na vɔk baza mɛn. Gɛrshɔn a vɔk nèy neba, nɛ a Libni na Shimei; Kohat a vɔk nèy nenaas, nɛ a Amram, na Izhar, na Hɛbrɔn tanga Uziyɛl; ko Mɛrari a vɔk nèy neba, nɛ a Mali na Mushi. Nèy o mwa na sè bedanelɔ nemo de na vɔk baza mɛn.

¹⁸

¹⁹

²⁰

²¹Lɔ Gɛrshɔn ha vɔk rùhup ba, vɛ a ruhûp Libni na ruhûp Shimei.

²²Nepyak nèy bewen mɛn de na ga tɛ̀ pwɛl gwining vɔk e rak o na sè sede gu bataama na naga betungun (7,500).

²³Lɔ hemo ha rɔda tɛ̀ kwɔ̂n ye ngyɔk hɛ e bamâ bûk sangâl Dagwi e rwa ta.

²⁴Mwât nuyel mɛn, yɛ a Ɛliyasaf, hwêy Layɛl.

²⁵Yɛn vɛ de ba tik a yɛn nedirîk bɛrɛng gworugû bâng bûk sangâl Dagwi tanga pyɛ̂ banga gwɛ bya mwa na gworugû bâng rwi buk o,

²⁶na berugu de ba rɔnɔ mɛ lala de he rɔnɔ buk o tanga gàgbang rangâs yas, tanga gworugû bâng rwi lala na rǐk gwɛ. Pyɛ́ yemo mo, ba tik a yɛn nedirîk fwôm yɛ̄.

²⁷Lɔ Kohat ha vɔk rùhup naas, vɛ a gwô Amram, na gwô Yizhar, na gwô Hɛbrɔn tanga gwô Uziyɛl.

²⁸Nepyak nèy bewen mɛn de na ga tɛ̀ pwɛl gwining vɔk e rak o na sè gu rwit na naga betat (8,300).

²⁹Lɔ hemo ha rɔda tɛ̀ kwɔ̂n ye ngyɔk mɛn e rwa batin na bûk sangâl Dagwi.

³⁰Mwât nuyel mɛn, yɛ a Ɛlizafan, hwêy Uziyɛl.

³¹Yɛn a vɛ de ba tik a yɛn bɛrɛng Kundung Wuna-na-Sirâ Dagwi, na tebut, na pyɛ tikîs kywa-kya, na nekwɔn rangâs pyɛ́ vɔk na Dagwi, na mwa pyɛ́ de be ra mɛ̀ fwom e Kwɔ̂n Jɛrɛ, tanga gworugû bâng rwi Kwɔn Jɛrɛ Hê Jɛrɛ. Pyɛ́ yemo, ba tik a yɛn nedirîk fwôm yɛ̄.

³²Gbɔng mwât nuyêl BeLevi mwa, yɛ wɛ à Ɛlɛyazar Aharon, piris. E yɛ wɛ de ba tɛ̀ ɛ, a bɛrɛng bemat de be ra fwom e ji bûk sangâl Dagwi.

³³Lɔ Mɛrari ha vɔk rùhup ba, vɛ a ruhûp Mali na ruhûp Mushi.

³⁴Nepyak nèy bewen mɛn de na ga tɛ̀ pwɛl gwining vɔk e rak o na sè gu batyiimin na naga beba (6,200).

³⁵Lɔ hemo ha rɔda tɛ̀ kwɔ̂n ye ngyɔk mɛn e rwa bato na bûk sangâl Dagwi. Mwât nuyel mɛn yɛ à Zuriyɛl, hwêy Abihail.

³⁶Yɛn à vɛ de ba tik a yɛn bɛrɛng cɔ́gɔt lɔ̂k, na cɔ́gɔt-kak, na sesêk cɔ́gɔt buk tanga bol vɛ̀, na kayɛ pyɛ de ya vɔk buk o. Pyɛ́ yemo, ba tik a yɛn nedirîk fwôm yɛ̄.

³⁷Yɛn a to bɛrɛng mwa pyɛ́ de ya sé yê rɔnɔ̂ lala, yɛ̄ à sesêk cɔ́gɔt buk tanga bol vɛ̀, na bekwagam tanga rǐk.

³⁸Ko Mose na Aharon tanga nèy mɛ yɛn a tɛsɛ buk mɛn e nuyêl bûk sangâl Dagwi e rwa rak. Ko yɛn vɛ de ba tik a yɛn nedirîk fwom e Kwɔ̂n Jɛrɛ e tô BeIsrayɛl mwa. Ka sede mwat de a sé WoLevi wɛt a simo ra fwom o, ko be mɔrɔ hɛ.

³⁹Nepyak berâs BeLevi mwa de ba sé pwɛl gwining vɔk e rak o na sè gu kuru baba na vɛ baba (22,000). Bára hemo de Mose a bara BeLevi e nelɔ mo nelɔ mo ha sé tyɛng sede remo de Dagwi Darwey a nɔng ɛ nu.

⁴⁰Ko Dagwi Darwey a yâng Mose, “Mwa nèy yêl BeIsrayɛl bewen na sé nenang. Ko me, Dagwi Darwey, ma jut mwa BeLevi, na me tɛ̀ ɛn e tô nèy yêl BeIsrayɛl o, na be sè benang. Ma to jut yas ye BeLevi e tô mwa nèy yêl yas BeIsrayɛl. Yaga ano, bàra mwa nèy yêl BeIsrayɛl bewen de na ga tɛ̀ pwɛl gwining vɔk e rak o, na hwo jɛk bazâ nɛ.”

⁴¹

⁴²Ano kwong, Mose a ra tyɛng na pyɛ de Dagwi Darwey a nɔng ɛ nu.

⁴³A sɛ̀ nepyak nèy yel bewen o de na ga tɛ̀ pwɛl gwining vɔk e rak o na sé gu kuru baba na vɛ baba na naga beba na kuru bataama na nɛ netat (22,273).

⁴⁴Dagwi Darwey a to yâng Mose,

⁴⁵“Tik BeLevi jaram, na be tɛ̀ ɛn e tô mwa nèy yêl BeIsrayɛl bewen o, na yas BeLevi e tô nèy yêl yas BeIsrayɛl, yɛn ê sè benang, me wɛ Dagwi Darwey.

⁴⁶Sede remo de nepyak nèy yêl BeIsrayɛl na dal nepyak BeLevi na naga beba na kuru bataama na nɛ netat (273), tik na hwo viri nɛ na dyām.

⁴⁷Sey dyam shɛkɛl[1] betungun yi na kawɛ mwat tyɛng na dyām de be ra mɛ̀ fwom yaga pyɛ̂ bûk sangâl Dagwi.

⁴⁸Nɔ̂ng Aharon na nèy mɛ dyām yemo de ba sɛ̀ yi e virî bwâng BeIsrayɛl de ba dal BeLevi.”

⁴⁹Ano kwong Mose a sey yi na BeIsrayɛl dyâm viri mo, ko a nɔ̂ng Aharon na nèy mɛ mwa nepyak dyām shɛkɛl gu rining na naga betat na kuru batyiimin na yɛ tyungun (1,365), tyɛng sede remo de Dagwi Darwey a nɔng ɛ redu na a ra.