Read berom Bara BeIsrayɛl 30 Bible Online

Bara BeIsrayɛl 30 - berom bible

Bara BeIsrayɛl 30

¹Mose a ha a bemât nuyêl yére BeIsrayɛl nu hemo de Dagwi Darwey a nɔng ɛn, a ye:

²Ka sede rwas hwak a sira, na a nɔ̂ng Dagwi Darwey pyɛ cak, kɛ a ra sirâ mwin na Dagwi, na a tik nà ra pyɛ cak, a kwon kwɔrɔ sira mo wɛt, ko a sé gbing-gbing na a ra mwa pyɛ de a kana ye ê ra mo.

³Ka sede hwong de a sé rɔɔ sangal e lɔ da mɛ a sira, na a nɔ̂ng Dagwi Darwey pyɛ cak, kɛ a sira hɛ na a tik nà ra pyɛ cak,

⁴ko a sé gbing-gbing na a ra kayɛ pyɛ de a ga sira hɛ, sɛ̌ da mɛ a kyɛ́ ɛ pyɛ mo tuk de a wok ha mo.

⁵Ko ka sede da mɛ a ro ɛ nà sila sira mo tuk de a wok ha mo, ko hwong o ê tɔk tik nà sila ha mo. Dagwi Darwey a rɔda hala a yɛ, yaga da mɛ a ro ɛ nà gyeng sira mo.

⁶Ka sede hwong de a ga vey weneng a sira na tɔk mɛ kɛ na negaren, kɛ a sira hɛ na a tik nà ra pyɛ cak, ko e bama mo a de ra weneng,

⁷a sé gbing-gbing na a ra kayɛ pyɛ de a ga sira mo, sɛ̌ rwas mɛ a kyɛ́ ɛ pyɛ mo tuk de a wok ha mo.

⁸Ko ka sede rwas mɛ a ro ɛ nà sila sira mo tuk de a wok ha mo, ko hwong o ê tɔk tik nà sila ha mo. Dagwi Darwey a rɔda hala a yɛ.

⁹Kuma kɛ hwā de ba ga tɛ̀ ɛ e gwong, a sé gbing-gbing, na a sila kahɛ sira de a ga ra mwa na kahɛ sira de a ra na a tik nà ra pyɛ cak.

¹⁰Ka sede hwâ weneng a ra sira, kɛ a sira hɛ, na a tik nà ra pyɛ cak,

¹¹ko a sé gbing-gbing na a ra kayɛ pyɛ de a ga sira hɛ, sɛ̌ rwas mɛ a kyɛ́ ɛ pyɛ mo jeng de a wok ha mo.

¹²Ko ka sede rwas mɛ a ro ɛ nà sila sira mo tuk de a wok ha mo, ko hwā mo ê tɔk tik nà sila ha mo. Dagwi Darwey a rɔda hala a yɛ, yaga rwas mɛ a ro ɛ nà gyeng sira mo.

¹³Rwas mɛ a vɔk reto na a ye ey kɛ wey à kahɛ sira de hwā mɛ a ra.

¹⁴Ko ka sede e bamâ pɔlɔ hining de a wok ha mo, ko a kyɛ́ ɛ pyɛ mo wɛt, a sé gbing-gbing na hwā mɛ a ra kayɛ pyɛ de a ga sira hɛ. A dura wɔgɔ, rwas o a ye ey, yaga a kyɛ́ ɛ pyɛ mo wɛt e tuk de a wok ha mo.

¹⁵Ko ka sede e bamâ jeng o rwas o a de ye wey à sira mo, ko rwas o a rɔda sɔ byɛ̂ reyɔm de a kyɛ́ ɛ nà sila sira mo.

¹⁶Badu ma vemo de Dagwi Darwey a nɔ̂ng Mose e ra sira de hwong de a sé rɔɔ sangal e lɔ da mɛ, kɛ hwâ weneng ayi ba ra.