Read berom Bara BeIsrayɛl 31 Bible Online

Bara BeIsrayɛl 31 - berom bible

Bara BeIsrayɛl 31

²“Wɔ na hwo wɔ̀ talâ BeMidyan pyɛ de yɛn a ra a BeIsrayɛl. E bama mo, hwà rɔda wɔ̀ sɛ̀ beda mō.”

³Ko Mose a yâng BeIsrayɛl, be yong ɛn yaga como na BeMidyan, yɛn a wɔ̀ hwo e ra yɛn, na be tabak hɛn yaga pyɛ de yɛn a ra a Dagwi Darwey.

⁴Kayɛ yerê BeIsrayɛl yɛn a rɔda tomo bemat gu rining wɔ e de como mo.

⁵Ano kwong, ba kasa bemat gu rining yi e kayɛ yerê Israyɛl, ko bemat de ba nusu ba sè gu kuru na vɛ baba (12,000).

⁶Mose a tomo hɛn vɔk e de como tanga Pinehas Ɛlɛyazar, de da mɛ a sè piris. Yɛ wɛ de ba nɔng ɛ bɛrɛ̂ng pyɛ̂ bûk sangâl Dagwi tanga bedurûm pɛsɛl yaga como.

⁷Yɛn a hwo e ra BeMidyan tyɛng sede remo de Dagwi Darwey a nɔ̂ng Mose nu, ko yɛn a mɔbɔs beras o mwa.

⁸Begbɔng begwɔ̀m betungun vê Midyan de ba mɔbɔs arɔng ba se: Ɛvi, na Rɛkɛm, na Zur, na Hur tanga Reba. Yɛn a to mɔrɔ Balaam Beyor arɔng.

⁹BeIsrayɛl ba vos behâ BeMidyan tanga nèy mɛn vɔk e de sesam, ko yɛn a hashe berɔndɔng, na vyēl na mwa pyɛ̂ nedanerey mɛn.

¹⁰Yɛn a dak kya e mwa bapomo mɛn na nekwɔn ye ngyɔk mɛn.

¹¹Yɛn a tula pyɛ́ yane mwa, na bemat tanga yas o,

¹²ko yɛn a vey mɛ na Mose tanga Ɛlɛyazar tanga regyɛng BeIsrayɛl de ra tula hɛ e kwɔ̂n ye ngyɔk e tyɛ̂l BeMowap bagat na Yeriko de wa sé e gurâ Rɔt Yɔrdan.

¹³Mose na Ɛlɛyazar tanga bwang bemât nuyel yɛn a nusu, na yɛn a vey sey ɛn e gwong bagat na kwɔ̂n yê ngyɔk o.

¹⁴Ko Mose a tɛ̀ shom na bemât nuyel como vê gu tanga vê naga vemo de ba ga toyo yi e de como.

¹⁵A yang ɛn, “Yaga sɛ́ de yin a tik mwa beha mo na neken ɛ?

¹⁶E yɛn vɛ de bá kana raa redu Balaam, na be tɛ̀ BeIsrayɛl be doyo a Dagwi Darwey ma e Peyor. Pyɛ ma yane de yá tɛ̀ tumbang wá hwo e ra bemât Dagwi Darwey.

¹⁷A remo, mɔbɔs hin mwa bewen tanga beha de ba ga kana tɔk rwas.

¹⁸Ko tik in a bato min kawɛ hwong de a ga kana tɔk rwas wɛt.

¹⁹Ko yin vemo de yin a ga mɔbɔs bemat na vemo de ba ga ragas bavîn bemat, yin a rɔda sangal e bamâ kwɔ̂n ye ngyɔk nepɔlɔ netaama e ngyen, sɛ̌ jeng de ba ga tɛ̀ in haalal e tuk hê tat na hê taama. Ra in ano na behwong de yin a hashe vɛ e sesam.

²⁰Yin a rɔda tɛ̀ berugu min haalal tanga kayɛ pyɛ de ba yong na rehwo, na setôt vyel tanga cɔgɔt.”

²¹Ano arɔng, Ɛlɛyazar a yâng bemat de yɛn a toyo yi e de como mo, “Pyɛ ma yemo de Dagwi Darwey a nɔ̂ng Mose nu na be ra:

²²Mwa pyɛ́ de ba yong na dyam shinang, na dyam pyɛng, na dyam pama, na dyam, na mbus tanga dyam shi,

²³wɔgɔ, kayɛ pyɛ de kya he tɔk re wɛt, e yɛ̄ de yin a rɔda tɛ̀ e kya, e bama mo yin ê tɛ̀ yɛ e ji nshi de be tɛ̀sɛ mɛ pyɛ́ haalal arɔng. Ko kayɛ pyɛ́ de ye tɔk tumal e kya wɛt, ba rɔda tɛ̀ yɛ e ji nshi nane mo zɔng.

²⁴E tuk hê taama kawɛ mwat a rɔda kus berugu mɛ, ko a rɔda tɛ́ ɛ haalal arɔng. Ano, yin a rɔda tɔk vey yel e kwɔ̂n ye ngyɔk min.”

²⁵Dagwi Darwey a yâng Mose,

²⁶“Hwo na Ɛlɛyazar tanga bemât nuyêl nelɔ BeIsrayɛl yin a rɔda bara bemat na mwa yas de ba hashe e como.

²⁷Yin a rɔda gas yɛ e tê bemat, yin ê nɔ̂ng vemo de ba tó como rebit o ko rebit o be nɔ̂ng bwang regyɛng BeIsrayɛl.

²⁸Ba rɔda pat pyɔlɔ yi e ji pyɛ́ de bemât tô como ba sɛ̀ yaga me. Ba rɔda pat ɛ jining e ji pyɛ́ naga betungun, kɛ a sé bemasi, kɛ berɔndɔng, kɛ bemadung, kɛ vyēl pyɛng, kɛ vyēl shi ayi.

²⁹Hwà rɔda nɔ̂ng Ɛlɛyazar pyɔlɔ mo na ye sè numo nang.

³⁰Yi e ji pyɛ́ de ba nɔ̂ng BeIsrayɛl hwà rɔda pat ɛ jining e ji pyɛ́ kuru batungun, kɛ a sé bemasi, kɛ berɔndɔng, kɛ bemadung, kɛ vyēl pyɛng, kɛ vyēl shi. Hwà rɔda nɔ̂ng BeLevi yɛ, yɛn vemo de ba vɔk nedirîk bɛrɛng bûk sangal hom.”

³¹Ko Mose na Ɛlɛyazar ba ra tyɛng na nu de Dagwi Darwey a nɔ̂ng Mose.

³²Nepyak pyɛ́ de ya pɔl yi e pyɛ́ de ba hashe e como mo na sè, vyēl gu naga batyiimin na kuru bataama na vɛ batungun (675,000),

³³berɔndɔng gu kuru bataama na vɛ baba (72,000),

³⁴bemadung gu kuru batyiimin na gu rining (61,000),

³⁵na bezîng behwong gu kuru batat na vɛ baba (32,000).

³⁶Nepyak rebit o de ba nɔ̂ng bemat de yɛn a tó como na sè, vyēl gu naga batat na kuru batat na vɛ bataama na naga betungun (337,500), berɔndɔng gu kuru batat na vɛ batyiimin (36,000), bemadung gu kuru batat na naga betungun (30,500), na behwong gu kuru na vɛ batyiimin (16,000). Pyɔlɔ de ba pat ɛ yaga Dagwi Darwey ya sè vyēl naga betyiimin na kuru bataama na yɛ tyungun (675), berɔndɔng kuru bataama na vɛ beba (72), bemadung kuru batyiimin na wɛ gwining (61) na behwong kuru batat na vɛ beba (32).

³⁷

³⁸

³⁹

⁴⁰

⁴¹Ko Mose a nɔ̂ng Ɛlɛyazar pyɔlɔ de Dagwi Darwey a ha be nɔng ɛ sede bak o mwɛ tyɛng na pyɛ de a nɔng ɛ nu.

⁴²Ko rebit o rê BeIsrayɛl ra sé tyɛng na rê bemât tô como.

⁴³

⁴⁴

⁴⁵

⁴⁶

⁴⁷Yi e ji rebît pyɛ́ yemo, Mose a pat ɛ jining e ji kuru batungun yê bemasi na yas, ko a nɔ̂ng BeLevi, vemo de ba vɔk nedirîk bɛrɛng bûk sangâl Dagwi Darwey, tyɛng na pyɛ de Dagwi Darwey a nɔng ɛ nu.

⁴⁸Ano kwong, bemât nuyêl bemât como mo ba vey na Mose,

⁴⁹ko yɛn a yang ɛ, “À darwey, wot a ga bara nepyak bemat tô como de ba sé e nɛn mot, ko mwat hwak a sé vit wɛt.

⁵⁰Yaga ano, wot a vey na pyɛ̂ dyam shinang, yɛ à nerwěy gasɔ̀ na ne vɔ, na yɔ̄bɔ, na dyam betong tanga bèlɛlɛ fwɔ de kawɛ mot a hashe e como. Wot a sé nára a Dagwi Darwey yɛ̄, yaga na ye se e tô neken mot.”

⁵¹Mose na Ɛlɛyazar ba sey mwa pyɛ̂ dyam shinang yane yi e vɔ mɛn.

⁵²Nepyak dyam shinang o de bemât nuyêl como mo ba vey mɛ na sè sede kilo naga na kuru shabatat (190).

⁵³Ko bwâng bemât como ba kyè na pyɛ́ de yɛn a hashe pyɛ mɛn.

⁵⁴Ano kwong, Mose na Ɛlɛyazar ba sey nɔrɔ̂ pyɛ̂ dyam shinang yane mo yi na bemât nuyêl bemât como, ko yɛn a vey mɛ e bûk sangâl Dagwi. Pyɛ́ mo ya rɔda tɛ̀ Dagwi Darwey a bare na BeIsrayɛl.