Read berom Bara BeIsrayɛl 32 Bible Online

Bara BeIsrayɛl 32 - berom bible

Bara BeIsrayɛl 32

¹Yére Rubɛn na ye Gat yɛn a vɔk berɔndɔng na vyēl pyak sedesi, ko yɛn a di, bavwêl Yazɛr tanga Gileyat ba sé naka yaga yas.

²Yaga ano, yɛn a vey na Mose, na Ɛlɛyazar, piris, tanga bemât nuyêl yére BeIsrayɛl. Yɛn a yang ɛn,

³“À bedagwɔ, bapomô Atarɔt, na Dibɔn, na Yazɛr, na Nimra, na Hɛshbɔn, na Ɛlɛyalɛ, na Sebam, na Nebo tanga Beyor

⁴ba sé e bak vwel de BeIsrayɛl ba ga re na sɛlɛ Dagwi Darwey, ko vwel o ha sé rat sizɔng yaga yas. Nɔng ot hɛ, à da, na he sè benap mot, yaga wot a vɔk yas pyak.

⁵Ka sede hwà di, a sé naka, ko tik na hwo nɔng ot hɛ. Hwo tɛ̀ wot a yɛ dɔ a Rɔt Yɔrdan wɛt.”

⁶Ko Mose a toyo a yɛn, a yang ɛn, “Sɛ̌ begwa min bwang BeIsrayɛl be kyè vɔk e de como, ko yin e sangal e ngamo arɛt?

⁷Yaga sɛ́ de yin a sé tɛ̀ ɛn gbɛrɛk nà ye dɔ vɔk e sevwel de Dagwi Darwey a ga kana nɔng ɛn ɛ?

⁸Yerê pyɛ ma yemo de beda min bá kana ra e jeng de má tomo hɛn yi e Kadɛsh-Barneya, na yɛn a wɔ̀ bɛrɛng nezɛɛt sevwel o.

⁹Yɛn á wul bak Nɛk Ɛshkɔl, ko yɛn a bɛrɛng sɛ. Ko jeng de yɛn a toyo, yɛn a tɛ̀ BeIsrayɛl gbɛrɛk nà wɔ̀ hwo e ra sevwel de Dagwi Darwey a ga kana nɔng ɛn.

¹⁰Tuk hane, Dagwi Darwey a tɛ̀ shom na yɛn, ko a sira hɛ wɔgɔ,

¹¹vit a gwining e ji mɛn de a ga wul neshey kuru baba vɔk e rak o de a nusu yi e Misra de ê kyɛm a yel e sevwel de a kana sira a Abraham, na Yishak tanga Yakɔp, yaga yɛn a raa me na yey mɛn mwa wɛt.

¹²A sé e Kalɛp Yɛfunɛ wo Keni tanga Yɔshuwa Nun zɔng de yɛn a raa me na yey mɛn mwa.

¹³A sé ano de Dagwi Darwey a tɛ̀ shom na BeIsrayɛl, ko a tɛ̀ ɛn, be kyě gǎ e hey neshey kuru banaas, sɛ̌ jeng de mwa bemat de ba lashe a yɛ yey yɛn a kushu.

¹⁴Ko di yin, yin a ga sege beda min, yin a sé zamang pas hê bemât banɛn! Yin a sé gwɛsɛ shôm Dagwi Darwey e ra BeIsrayɛl.

¹⁵À yin BeRubɛn na BeGat, ka sede yin a kyɛ́ in nà raa hɛ, ko a rɔda ye waa a BeIsrayɛl mwa e hey, ko renɛn o ra rɔda se e ra bato min jeng de yɛn a wey e hwomo.”

¹⁶Ko yɛn a vey a yɛ na gwong hwak, yɛn a yang ɛ, “Wot e simo na wot a lɔk kara e ngamo yaga yas mot na bapomo de beha bê sangal ɛ tyang arɔng.

¹⁷Ko e bama mo, wot ê yong ot dey-dey, na wot a kyè e nuyel begwa mot BeIsrayɛl e de como sɛ̌ jeng de wot a di yɛn a ga sangal e nedem sangal mɛn mwa. Ko e jeng o, belɔ mot yɛn a rɔda sangal e bapomo de wot a ga gwɔrɔ, yaga na wot a dul mɛ bemât repugu mot de ba sé e sevwel o.

¹⁸Wot ê toyo vey e nelɔ mot wɛt, sɛ̌ wot a di kawɛ WoIsrayɛl a ga sɛ̀ nap mɛ e ngyen.

¹⁹Ko wot, wot ê sey benap behak e gura gwane wɛt e jeng de ba rɔda gas a bemat sevwel. Wot ê sɛ̀ bak o mwot e ngamo e rwa rak Rɔt Yɔrdan.”

²⁰Mose a yang ɛn, “Ka sede pyɛ de yin a ha ya sé mwin, ko jut in pyɛ̂ como min e ngamo e nuyêl Dagwi Darwey, na yin a wɔ̀ to mɛ como.

²¹Mwa bemât como min ba rɔda ye dɔ à Rɔt Yɔrdan, ko yi na nû Dagwi Darwey yin a rɔda tó como sɛ̌ jeng de yɛ a ga ro bemât repugu mɛ,

²²ko a ga sey ɛ̀ sevwel o. Ano, yin a rɔda toyo, ko yin a rɔda sè washak e nuyêl Dagwi Darwey tanga e nuyêl begwa min BeIsrayɛl arɔng. Ko Dagwi Darwey a rɔda nɔng in sevwel semo e rwa rak Rɔt Yɔrdan, na se sè semin.

²³“Ko ka sede yin a tik nà ra ano, yin a rɔda ra a Dagwi Darwey renɛn. Ko tɔk in, renɛn min o ra rɔda wey na yin.

²⁴A remo, lɔk in bapomo yaga belɔ min, na kara yaga vyēl min. Ko ra in pyɛ de yin a ga kana sira hin, yin ê ra.”

²⁵Ko BeGat na BeRubɛn ba toyo a Mose, ba ye, “À da, wot a rɔda ra tyɛng sede remo de hwà nɔng ot nu.

²⁶Beha na nèy mot, tanga berɔndɔng na vyēl mot ya rɔda sangal e ngamo e ji bapomô Gileyat.

²⁷Ko wot de wot e tɔk tó como, wot ê ye dɔ yi na nû Dagwi Darwey, na wot a tó como, tyɛng na pyɛ de hwà ha.”

²⁸Mose a nɔng nu e ra yɛn vɔk na Ɛlɛyazar, na Yɔshuwa Nun, tanga bemât nuyêl yére BeIsrayɛl.

²⁹A yang ɛn, “Ka sede bemât Gat tanga vê Rubɛn ba ye dɔ à Yɔrdan tanga yin vɔk e de como yi na nû Dagwi Darwey, ko ka sede yin a ga sey ɛ̀ sevwel o yi na sɛlɛ mɛn, ko nɔng in hɛn sevwêl Gileyat e rwa rak Yɔrdan, na se sè benap mɛn.

³⁰Ko ka sede yɛn a ye dɔ tanga yin, na yɛn a tó como wɛt, ko yin a rɔda nɔng ɛn benap mɛn e sevwêl Kanaan tanga yin.”

³¹BeGat tanga BeRubɛn yɛn a to toyo a yɛ, ba ye, “À da, wot a rɔda ra pyɛ de Dagwi Darwey a ga nɔng nu.

³²Wot a rɔda ye dɔ yi na nû Dagwi Darwey vɔk e sevwêl Kanaan, na wot a ra como, yaga na wot a bin vɔk benap mot e ngamo e gurâ Rɔt Yɔrdan gworo.”

³³Ano kwong, Mose a nɔ̂ng yerê Gat na yerê Rubɛn tanga rebît yerê Manase Yɔsɛf sevwêl gbɔng gwɔ̀m BeAmɔr, Sihɔn, tanga sevwêl gbɔng gwɔ̀m Bashan, Ɔk, mwa neyɛnɛ̂ sevwel o na bapomo tanga nebapomo mɛn mwa.

³⁴Bemât Gat yɛn a to lɔk bagbɔng bapomô Dibɔn, na Atarɔt, na Arower,

³⁵na Atɛrɔt-Shofan, na Yazɛr, na Yogbeha,

³⁶na Bet-Nimra, tanga Bet-Haran, ba gwɔrɔ vɛ na jwa-pomo, ko yɛn a lɔk kara yaga yas mɛn arɔng.

³⁷Bemât Rubɛn yɛn a to lɔk Hɛshbɔn, na Ɛlɛyalɛ, na Kiriyatayim,

³⁸na Nebo, na Baal-Meyɔn, tanga Sibma. Yɛn a vos a bapomo bahak de yɛn a to lɔk o baza bapas.

³⁹Bemât ruhûp Makir Manase ba wɔ́ na como e sevwêl Gileyat, ba sey ɛ̀ sɛ, ko ba ro BeAmɔr de bá kana sangal e hwomo.

⁴⁰Ko Mose a nɔng ɛn sevwêl Gileyat o, ko yɛn a sangal ɛ.

⁴¹Yayir, WoManase hwak, a wɔ tó como na nebapomo nehak, ko a re nɛ. A vo a nɛ reza Nebapomô Yayir.

⁴²Ko Noba arɔng a wɔ̀ tó como na repomô Kenat tanga nebapomo mɛn. A re nɛ, ko a nɔ̂ng nɛ reza mɛ.