Read berom Bara BeIsrayɛl 33 Bible Online

Bara BeIsrayɛl 33 - berom bible

Bara BeIsrayɛl 33

¹Jeng de BeIsrayɛl ba nusu yi e Misra e vɔ Mose na Aharon, bagyɛng o bagyɛng o, yɛn a tɛsɛ buk mɛn e nekwɔn ye ngyɔk detidetu.

²Mose a jɛk bazâ nekwɔn o, tyɛng na redu de Dagwi Darwey a nɔng ɛ. Nekwɔn a nemo ngan:

³Yɛn a sogo yi e Ramɛsɛs e ji pwɛl gwô yel, gwɛ na pɔlɔ kuru na hɛ tungun e nusû hwol e bamâ tuk gyilsit nelɔ BeIsrayɛl. Yɛn a sogo kwɛngɛl o na yey ting e bayis BeMisra.

⁴BeMisra mo ba sè bûm lɛsɛ̂ nèy mɛsɛng mɛn bewen de Dagwi Darwey a ga mɔbɔs. Yi ano de Dagwi Darwey a ga vey na shɔt e ra bedagwi mɛn.

⁵BeIsrayɛl ba sogo yi e Ramɛsɛs, ko yɛn a ye ngyɔk e Sukɔt.

⁶Yi e hwomo, yɛn a sogo vɔk e Etam bagat e hagât hey.

⁷Yi e Etam, yɛn a doyo, ko ba kyè wɔ gyirik vɔk e Pi-Hahirɔt, bagat na Baal-Zɛfɔn, ko yɛn a ye ngyɔk bagat na Migdɔl.

⁸Yɛn a sogo yi e Pi-Hahirɔt, ko yɛn a kwey e ji gbɔng rep. E bamâ kwɛngɛl pɔlɔ tat e hêy Etam, yɛn a ye ngyɔk e Mara.

⁹Yi e hwomo, yɛn a kyè vɔk e Elim, kwɔn de ha vɔk ɛ lel nshi kuru na vɛ ba tanga batîn cɔ́gɔt tyet ryey o kuru bataama, ko yɛn a tɛ̀ kwɔ̂n ye ngyɔk mɛn.

¹⁰Yɛn a re nuyel na kwɛngɛl vɔk e vwarâ Gbɔng Rep Sere.

¹¹Yi e hwomo, yɛn a sogo vɔk e hêy Sin.

¹²Yɛn a to sogo yi e hwomo, ko yɛn a tē ngyɔk e Dɔfka, Alush na Rɛfidim. Kwɔn a hemo de yɛn a sɛ̀ nshî sɔ wɛt.

¹⁵Yɛn a sogo yi e Rɛfidim vɔk e Raku Hor. E kwɛngɛl mɛn o yɛn a tē ngyɔk e nekwɔn nemo: Hêy Sinai, na Kibrɔt-Hataava, wɔgɔ, Besak Cwey, na Hazɛrɔt, na Ritma, na Rimɔn-Pɛrɛs, na Libna, na Risa, na Kehelata, na Raku Shɛfɛr, na Harada, na Makɛlɔt, na Tahat, na Tɛra, na Mitka, na Hashmona, na Mɔsɛrɔt, na Bene-Yaakan, na Hor-Hagidgat, na Yotbata, na Abrona, na Ɛziyɔn-Gɛbɛr, na Kadɛsh e hêy Zin, tanga Raku Hor e yɛnɛ̂ sevwêl Ɛdɔm.

³⁸Aharon, piris, a wɔ̀ tut e Raku Hor tyɛng na nu de Dagwi a nɔng ɛ. A ku e hwomo, e tuk hê susu mo hê pwɛl gwô netungun gwô shey hê kuru banaas yi e jeng de BeIsrayɛl ba hala sevwêl Misra. Neshey tɔ mɛ na sè naga na kuru baba na nɛ netat (123).

⁴⁰E jeng o, Gbɔng Gwɔ̀m Arat de a sé sangal e bak batîn sevwêl Kanaan, a wok, BeIsrayɛl ba sé kyè vey.

⁴¹Yi e Raku Hor vɔk e tyɛl Mowap, BeIsrayɛl ba tē ngyɔk e Zalmona, na Punɔn tanga Ɔbɔt, e barîn Abarim e yɛnɛ̂ sevwêl Mowap, e Dibɔn Gat na Almɔn Diblatayim, e berakû Abarim bagat na Rakû Nebo, na e tyɛ̄l Mowap bagat na Rɔt Yɔrdan e gura gworo na Yeriko, e tê Bet-Yɛshimɔt na Nɛk Batîn Rɔgɔ.

⁵⁰E hwomo e tyɛl Mowap bagat na Rɔt Yɔrdan e gurâ Yeriko, Dagwi Darwey a yâng Mose,

⁵¹a ha a BeIsrayɛl neha nemo ngan: “Jeng de yin a ye dɔ a Rɔt Yɔrdan, na yin a yel e sevwel Kanaan,

⁵²ró in mwa bemat de ba sé sangal e sevwel o. Gangas hin kayɛ pyɛ sekwit de ba yong na beta, na yemo de ba yong na dyam, na yin gangas nekwɔn sekwit mɛn o mwa arɔng.

⁵³Sey in ɛ sevwel o, na yin a sangal ɛ, yaga ma ga nɔng in sɛ, na sē sè nap min.

⁵⁴Gas in sɛ e bato min na masâ sesek, tyɛng na yére min na rùhup min. Rùhup de ba dal na nepyak bemat, be gwɛ̌ a yɛn ɛ, ko vemo de ba sé besɛl o, be tɛt a yɛn arɔng. Kahɛ kwɔn de swesek gwa dura a ruhup o, ko kwɔn o ha rɔda sè mɛ.

⁵⁵Ró in bemât sevwel o mwa vit. Ka ano wɛt, vemo de yin a tik ɛn na neken, yɛn a rɔda tɛ̀ a yin ɛ nepep sede shúgu e bayis kɛ rɔgɔ e babek. Yɛn a rɔda tak a yin e sevwel de yin ê sangal ɛ.

⁵⁶Ko ma rɔda ra a yin pyɛ de ma ga kana yong ɛ̀ na me ra a yɛn.”