Read berom Bara BeIsrayɛl 34 Bible Online

Bara BeIsrayɛl 34 - berom bible

Bara BeIsrayɛl 34

¹Dagwi Darwey a yâng Mose,

²a nɔ̂ng BeIsrayɛl nu hemo ngan: “Yin a vey bagat yel e sevwêl Kanaan, sevwel de bê gas a yin sɛ, na se sè benap min. Yɛnɛ̂ sevwel o hê sè sede ngan:

³“E rwa batin, ha rɔda se yi e bak hêy Zin vɔk e neyɛnɛ̂ Ɛdɔm. Ha rɔda susu e rwa rak bagat na tîn Gbɔng Rep Nevwashe.

⁴Ha rɔda re nuyel vɔk e rwa batin, hê kwey e Nɛk Beraku Lyāng, pere wɔ e Zin. Yɛnɛ̂ hɛ ha rɔda sɛ̀ e Kadɛsh-Barneya. Hê doyo vɔk e rwa ta na rwa bato wɔ̀ wul Hazar Adar vɔk e Azmɔn.

⁵Yi e Azmɔn, yɛnɛ mo ha rɔda raa rɔt de ha sé yɛnɛ̂ vwel na Misra, ko hê yɛnɛ hɛ e Gworep Tē.

⁶“E rwa ta, ha rɔda raa Gworep Tē.

⁷“E rwa bato, ha rɔda se yi e Gworep Tē vɔk e Raku Hor.

⁸Yi e Rakû Hor, ha rɔda kyè vɔk e Lebo Hamat, ko he re nuyel vɔk e Zedat,

⁹na Zifrɔn, ko hê yɛnɛ hɛ e Hazar Ɛnan.

¹⁰“Ko e rwa rak, ha rɔda yi e Hazar Ɛnan vɔk e Shefam.

¹¹Ha rɔda re nuyel vɔk e Ribla e rwa ta na Ayin, vɔk e beraku e rwa rak wo Gworep Galili.

¹²Yi e hwomo ha rɔda raa Rɔt Yɔrdan na he yɛnɛ hɛ e Gbɔng Rep Nevwashe. “Yɛnɛ̂ vwel min à hane mwa e bebak benaas.”

¹³Ko Mose a re nuyel, a ye, “Sevwel a semo de yin a rɔda sey yi na masâ sesek, na se sè benap min, tyɛng sede remo de Dagwi Darwey a ga kana nɔng nu, na be nɔ̂ng yére shatyat na rebit o.

¹⁴Yerê Rubɛn na yerê Gat tanga rebit yerê Manase ya ga kana sɛ̀ numo mɛn e bak rwa ta e gurâ Rɔt Yɔrdan yi e Yeriko.”

¹⁶Dagwi Darwey a ha na Mose, a yang ɛ,

¹⁷“Bemat de ba rɔda gas a BeIsrayɛl sevwel o a Ɛlɛyazar, piris, na Yɔshuwa Nun.

¹⁸Ko yin a rɔda jut mwât nuyel gwining yi e kayɛ yere, na yɛn a sɛlɛ e gas o.”

¹⁹Bazâ bemat de Dagwi Darwey a kasa ma vemo: Yi e yerê Yuda: Kalɛp Yɛfunɛ Yi e yerê Simɛyɔn: Shɛlumiyɛl Amihut Yi e yerê Bɛnyamin: Ɛlidat Kislɔn Yi e yerê Dan: Buki Yɔgli Yi e yerê Manase: Hanyɛl Ɛfɔt Yi e yerê Ɛfrayim: Kɛmwɛl Shiftan Yi e yerê Zɛbulun: Ɛlizafan Parnak Yi e yerê Isakar: Paltiyɛl Azan Yi e yerê Ashɛr: Ahihut Shelomi Yi e yerê Naftali: Pɛdahɛl Amihut.

²⁹Bemat a vemo de Dagwi Darwey a nɔng ɛn fwôm gâs benap yaga BeIsrayɛl e sevwêl Kanaan.