Read berom Bara BeIsrayɛl 35 Bible Online

Bara BeIsrayɛl 35 - berom bible

Bara BeIsrayɛl 35

¹E tyɛ̄l Mowap e gura Rɔt Yɔrdan na Yeriko, Dagwi Darwey a yâng Mose,

²“Nɔ̂ng BeIsrayɛl nu, na yɛn a paa a BeLevi bapomo bahak e ji vwel de ba ga kana nɔng ɛn. Yɛn a to paa a yɛn nekwɔn de na gwɔrɔ bapomo mo, na yɛn a gyeng ɛ yas mɛn arɔng. Bapomo mo ba rɔda sè vê BeLevi, ko yɛn ê sangal e ji vɛ.

⁴“Kwɔ̂n gyeng yas hê kahɛ pomo ha rɔda sè mita naga betungun (500) e kawɛ bak wo jwa-pomo mo. Yi ano, bahagât kahɛ kwɔn o bê se mita gu rining (1,000) e kawɛ bak. Ko repomo mo ra rɔda sè e tē.

⁶Nepyak bapomo de ba rɔda nɔ̂ng BeLevi na rɔda sè kuru banaas na vɛ rwit (48) mwa na nekwɔn gyeng yas mɛn. E ji bapomo mo, batyiimin ba rɔda se bapomô dál. Ba rɔda sè yaga kawɛ mwat de a mɔrɔ mwat e gawey, ko a rɔda tele vɔk e vɛ.

⁸Ba rɔda paa bapomo pyak yi e yére de ya sé pyak, ko be paa vɛ tyɔng yi e yére de ya sé shɛl o, yaga na kayɛ yere ye vɔk bapomô BeLevi tyɛng na nepyak bemat mɛn.”

⁹Dagwi Darwey a to yang Mose,

¹⁰a ha a BeIsrayɛl neha nemo ngan: “Jeng de yin ê ye dɔ a Rɔt Yɔrdan, na yin a yel e ji sevwêl Kanaan,

¹¹yin a rɔda paa a bato min bapomô dál, yaga na, ka mwat hwak a mɔrɔ mwat e gawey, ko yɛ a rɔda tele vɔk e rehak e ji bapomo mo, na a wɔ dal ɛ̀.

¹²Bapomo mo ba rɔda sɛlɛ hin yaga dál yi e mwât talâ pyɔ̌n nemî mwat mɛ. Be kwon mɔrɔ mwat de a mɔrɔ mwat wɛt, sɛ̌ jeng de ba wɔ na yɛ e nuyêl regyɛng bemat, na be ra a yɛ shɔt e ngyen.

¹³Bapomô dal de yin a rɔda paa vɛ ba rɔda sè batyiimin:

¹⁴batat e gurâ Yɔrdan, ko batat e Kanaan.

¹⁵Ba rɔda se yaga BeIsrayɛl mwa na bemat beduk de ba sangal e tē mɛn Kawɛ mwat de a mɔrɔ mwat e gawey, a tɔk tele vɔk e ji vɛ.

¹⁶“Ko mwat de a rusu mwat hwak na gwelê dyam, kɛ a toro hɛ na gwofwa, kɛ a rusu hɛ na cɔgɔt, ko mwat o a ku, mwat wane mo a sé mwât mɔrɔ̂ mwat, ko bē mɔrɔ hɛ arɔng.

¹⁹Gwà mwat de ba mɔrɔ mo ê mɔrɔ mwat de a mɔrɔ gwà mɛ e kagwa de a sɛ̀ ɛ.

²⁰“Ka sede mwat hwak e bɛrɛng mwat hwak ves, ko a gang ɛ, kɛ a toro hɛ na pyɛ cak na nengyas,

²¹kɛ a rusu hɛ na vwɔ, ko a vɛ̌ ku, yɛ a sé mwât mɔrɔ̂ mwat, ko bē mɔrɔ hɛ. Gwà mwat de ba mɔrɔ mo ê mɔrɔ mwat de a mɔrɔ gwa mɛ e kagwa de a sɛ̀ ɛ.

²²“Ko ka sede mwat hwak a gang mwat, kɛ a toro hɛ na gwofwa kɛ na pyɛ cak ayi, ko a mɔrɔ hɛ e gawey, mwa ano de mwat wane mo a sé wo repugu mɛ wɛt, ko a ra ano na simo mɛ wɛt arɔng, ko regyɛng bemât repomo mɛ ba rɔda yɛrɛ a yɛ shɔt wɔgɔ, vit a hɛ na renɛn, ko ba rɔda gyep ɛ yi e vwɔ̂ gwà womo de ba mɔrɔ mo. Ba rɔda to toyo na yɛ vɔk e repomô dál de a ga kana tele wɔ ɛ. Yɛ a rɔda sangal e hwomo, sɛ̌ jeng de darwêy bepiris de ba kana shushu hɛ na něy nejɛrɛ a ku e ngyen.

²⁶Ko ka sede mwat de a mɔrɔ mwat o a hala repomô dál mɛ,

²⁷ko mwat de e jama hɛ a sɛ̀ ɛ e mâ repomo, ko a mɔrɔ hɛ, ko a rɔda vɔk renɛn wɛt.

²⁸A sé gbing-gbing na mwât renɛn a sangal e ji repomô dál, sɛ̌ jeng de darwêy bepiris a ku, na a de nusu a to ɛ vɔk e lɔ mɛ.

²⁹Hemo ha sé redu de yin ê gyeng e mwa bezamang min, e kagwa de yin a sangal ɛ.

³⁰“Ka sede mwat a mɔrɔ mwat, nuhâ mwat gwining e ra yɛ ha vey na be mɔrɔ hɛ wɛt. Bê tɔk mɔrɔ mwat o e ra nuhâ bemat beba kɛ ba dal ano zɔng.

³¹“A sé gbing-gbing na be mɔrɔ mwat de a mɔrɔ mwat hwak. Bê tɔk tala pyɛ cak na be viri hɛ mɛ wɛt, yaga a ga ra gbɔng renɛn.

³²“Ka sede mwat de a mɔrɔ mwat a ga tele vɔk e repomô dál, hwo simo a yɛ, na a tala pyɛ cak, na a viri hɛ mɛ, na a kyè vɔk e lɔ mɛ gyam rekû darwêy bepiris wɛt.

³³“Yin lashe sevwel de yin a sangal ɛ wɛt! Nemî mwat de ba mɔrɔ hɛ ne lashe sevwel, ko vit a pyɛ de bê tɔk ra, na be tala mɛ nɛn yaga sevwel o, sɛ̌ na nemî mwat de a losho nemî mwat hwak.

³⁴Yin tɛ̀ sevwel de yin e sangal ɛ ligis wɛt, yaga me pyɛ hom me sangal e tē min arɔng. Ey, me, Dagwi Darwey, ma sé sangal e tê BeIsrayɛl.”