Read berom Bara BeIsrayɛl 36 Bible Online

Bara BeIsrayɛl 36 - berom bible

Bara BeIsrayɛl 36

¹Bemât nuyêl rùhup Gileyat Makir Manase Yɔsɛf ba vey na Mose na bemât nuyêl yére BeIsrayɛl.

²Yɛn a yang ɛn, “À darwey, Dagwi Darwey a nɔng o nu, na hwo gas a BeIsrayɛl sevwel na masâ sesek, na sè tɛ́ ɛ benap mɛn. A to nɔng o nu, na hwo nɔ̂ng behwông Zelofehat, gwà mot, numo hê da mɛn.

³Ko di, ka sede yɛn a ra weneng na bemat behak e ji yere mot wɛt, ko nap de wa sé mwɛn wa rɔda ba sè yaga yere yane de yɛn a sé ɛ. Yi ano, nepyak benap mot na rɔda tɛt ɛn.

⁴E shêy vibis, ba rɔda gwɛ̌ a yere de yɛn a sê weneng na yɛn benap mɛn o ting-ting. Yi ano ba rɔda pat vɛ yi e yê bedabeda mɛn.”

⁵Mose a nɔ̂ng BeIsrayɛl redu remo, tyɛng sede remo de Dagwi Darwey a ha a yɛ, a ye, “Pyɛ de yére Yɔsɛf ya ha, ya sé tyɛng.

⁶Yaga ano, Dagwi Darwey a nɔng nu hemo yaga behwông Zelofehat: Yɛn ê tɔk ra weneng na kawɛ mwat de yɛn e simo, ko tik na a se e ji yerê lɔ da mɛn zɔng.

⁷Ba rɔda jut benap yere cak, na be nɔ̂ng yere cak detu e ji BeIsrayɛl wɛt. Nap kawɛ WoIsrayɛl wa rɔda nàra e ji benap yere mɛ.

⁸Kawɛ hwong e ji BeIsrayɛl de ba nɔng ɛ numo mɛ hê da mɛ, a sé gbing-gbing, na a ra weneng na mwat hwak e yerê da mɛ mo. Yi ano, kayɛ yerê BeIsrayɛl yê vɔk yɛnɛ̂ vwel de ba gas a yɛ.

⁹Vit a mwat de a rɔda jut nap yere cak, na a nɔ̂ng yere cak detu. Kayɛ yerê BeIsrayɛl ya rɔda sangal e yɛnɛ̂ vwel de ha sé mɛn.”

¹⁰Ano kwong, Mala, na Tirza, na Hɔgla, na Milka, tanga Nowa, behwông Zelofehat yɛn a ra tyɛng na pyɛ de Dagwi Darwey a nɔ̂ng Mose nu e ra yɛ. Yɛn a ra weneng na bewên begwa da mɛn.

¹²Yɛn a ra weneng e ji rùhup yerê Manase Yɔsɛf; yi ano benap mɛn ba nàra e ji yerê da mɛn.

¹³Vemo vɛ à badu de Dagwi Darwey a nɔ̂ng BeIsrayɛl yi na Mose, e tyɛl Mowap bagat na Rɔt Yɔrdan e gura gworo yi e Yeriko.