Read berom Bara BeIsrayɛl 4 Bible Online

Bara BeIsrayɛl 4 - berom bible

Bara BeIsrayɛl 4

¹Dagwi Darwey a yâng Mose na Aharon,

²“Yin bara nepyak yére lɔ Kohat yi e ji yerê Levi ruhup o ruhup o na nelɔ mo nelɔ mo.

³Bara hin mwa bemat de ba sé yi e neshey kuru batat (30) vɔk e kuru batungun (50), mwa vemo de ba ga vey, na be ra fwom e bûk sangâl Dagwi.

⁴Fwom de bemât lɔ Kohat o ba rɔda ra e ji buk a gwot ngan: Yɛn a rɔda bɛrɛng pyɛ́ de ya dal mwa na nejɛrɛ.

⁵“Jeng de bê sogo yi e kwɔ̂n ye ngyɔk, Aharon na nèy mɛ yɛn ê yel e ji mo, na yɛn a vibis gworugu de ba bang mɛ Kwɔn Jɛrɛ Hê Jɛrɛ, na yɛn a bang mɛ Kundung Wuna-na-Sirâ Dagwi na vɛ̀.

⁶E bama mo, bê kyiri kundung o na bahwô pyɛ-nshi de ba tolo, ko e ra tɛ̂t gwɛ bê lasha gworugu de mwa gwɛ gwà sé wilwil, ko bê tɛ̀ begelê hashe kundung o e kwɔ̂n vɛ.

⁷“Yɛn a rɔda lasha gworugû wilwil e ra tebut kpam-tuk de be nása vɔk na Dagwi Darwey, ko be to tik ɛ neshǐ, na begance, na betsung tanga neshǐ nása pyɛ̂ sɔ vɔk na Dagwi, mwa na kpam-tuk de wó sɛ̀ kayɛ jeng.

⁸E ra tɛt o, ba rɔda lasha gworugu gwoswinang o, ko bê tɛ̀ begelê hashe mo e kwɔ̂n vɛ.

⁹“Ano arɔng, yɛn a rɔda jut gworugû wilwil, na be bang mɛ pyɛ tikîs kywa-kya na bekywa-kya mo. Tik na be bang pyɛ́ mwa de be simo yaga tɛ́sɛ negbey na yishîng bekywa-kya, tanga mwa betsung na bakwô něy de be ra mɛ fwom e kwɔn o arɔng.

¹⁰Yɛn a rɔda gunung pyɛ́ mo mwa e ji bahwô pyɛ-nshi de ba tolo, na be tik yɛ̄ e ra gwocàre.

¹¹“E bama mo, yɛn ê bang gàgbang rangâs pyɛ̂ nesang hyɔɔlɔl de ba yong hɛ na dyam shinang na gworugû wilwil. Ko yɛn a to bang na bahwô pyɛ-nshi de ba tolo; e bama mo, bê tɛ̀ begelê hashe mo e kwɔ̂n vɛ̀.

¹²“Yɛn ê jut bwâng pyɛ̂ mwa de be ra mɛ fwom e Kwɔ̂n Jɛrɛ, na be gunung yɛ̄ e ji gworugû wilwil, na be to bang arɔng na bahwô pyɛ-nshi de ba tolo; e bama mo, be tik e ra gwocàre.

¹³“Yɛn a rɔda hashe nefongol yi e ra gàgbang rangâs yas de ba yong na dyam pama, na be lasha gworugu de gwa sé swinang de gwa tɛ̀sɛ nesi e ra tɛt o.

¹⁴Ano yɛn ê tik ɛ mwa nekyɔrɔk de be ra mɛ fwom e ra kwɔn o, nɛ a bèkywa-kya, na begúk, na becebut tanga bakwo de be tikis ɛ nemi. E ra pyɛ́ yemo arɔng, yɛn a rɔda lasha bahwô pyɛ-nshi de ba tolo, ko bê tɛ̀ begelê hashe mo e kwɔ̂n vɛ.

¹⁵“E bama de Aharon tanga nèy mɛ ba ga yɛnɛ bâng pyɛ̂ jɛrɛ tanga nekyɔrɔk de be ra mɛ fwom, ko nèy Kohat yɛn a rɔda vey jut pyɛ́ mo, ko yɛn a kwon ra pyɛ̂ jɛrɛ mo wɛt, yaga ka sede yɛn a ra yɛ̄, ko yɛn ê kushu. “A sé e lɔ Kohat zɔng de ba nɔng ɛn fwôm hashê pyɛ́ e jeng de bê sogo na buk yi e kwɔ̂n pɔnglɔ.

¹⁶“Ɛlɛyazar Aharon, piris, yɛ wɛ de a rɔda bɛrɛng mwa bûk sangâl Dagwi tanga pyɛ̂ mwa de ba ga tɛ̀ yɛ jɛrɛ de ya sé e ji mo. Yɛ a rɔda bɛrɛng něy de be tɛ̀sɛ e bekywa-kya, tanga pyɛ̂ nesang hyɔɔlɔl, na nɔrɔ̂ nemuk alkama de be nása vɔk na Dagwi kahɛ gasi, tanga něy de be ra mɛ fwom e de tik bemat tanga pyɛ́ jaram yaga Dagwi.”

¹⁷Dagwi Darwey a yâng Mose na Aharon,

¹⁸“Sede remo de yére lɔ Kohat ya sé ra fwom na pyɛ́ de ya dal mwa na nejɛrɛ, a sé gbing-gbing, na yin tē naka, de yɛn a kushu e de ragas fwom o wɛt. Tik na Aharon tanga nèy mɛ be tānga yel e Kwɔ̂n Jɛrɛ, na yɛn a dura a kawɛ mwat e ji mɛn fwom de ê ra, na yerê pyɛ́ de ê hashe.

²⁰Belɔ Kohat o be yel e Kwɔ̂n Jɛrɛ, na yɛn a di pyɛ̂ jɛrɛ mo ko tyɔng wɛt, ka sede yɛn a di, ko yɛn a rɔda kushu.”

²¹Dagwi Darwey a yâng Mose,

²²“Bara yére lɔ Gɛrshɔn arɔng yi e ji yerê Levi ruhup o ruhup o na nelɔ mo nelɔ mo.

²³Bara mwa bemat de ba sé yi e neshey kuru batat (30) vɔk e kuru batungun (50), mwa vemo de ba ga vey, na be ra fwom e bûk sangâl Dagwi.

²⁴“Fwom de yɛn a rɔda ra tanga pyɛ́ de yɛn ê hashe a yet ngan:

²⁵Gworugû bâng bûk sangâl Dagwi, tanga pyɛ̂ bangâ gwɛ bya, na pyɛ bangâ yɛ̄ de ba tolo na bahwô pyɛ-nshi, mwa na gworugû bâng rwi buk o,

²⁶na berugu tanga rǐk de ba rɔnɔ mɛ lala de he rɔnɔ buk o tanga gàgbang rangâs yas, tanga gworugû bâng rwi lala mo, na pyɛ̂ mwa de be ra mɛ̀ fwôm tɛsɛ berugu mo. Belɔ Gɛrshɔn bê ra kagwɛ fwom de gwa sé e ra pyɛ́ yemo.

²⁷Mwa tom de yɛn a rɔda ra, kɛ hashê pyɛ́ kɛ râ kagwɛ fwom, yɛn ê ra gwɛ tyɛng na pyɛ de Aharon na nèy mɛ ba nɔng ɛn nu, na yɛn a ra. Ko hwo,[2] hwà rɔda ha a yɛn pyɛ́ de kawɛ e ji mɛn a rɔda hashe.

²⁸Tom vemo de belɔ Gɛrshɔn ba rɔda ra e bûk sangâl Dagwi, yɛn ê ra vɛ tyɛng na nu de Itamar Aharon, piris, a nɔng ɛn.”

²⁹Dagwi Darwey a to ha na Mose, “Bara yére lɔ Mɛrari arɔng yi e yerê Levi ruhup o ruhup o na nelɔ mo nelɔ mo.

³⁰Bara mwa bemat de ba sé yi e neshey kuru batat (30) vɔk e kuru batungun (50), vemo de ba ga vey, na be ra fwom e bûk sangâl Dagwi.

³¹Fwom de yɛn ê ra à gwot ngan: Yɛn ê hashe cɔ́gɔt lɔk, na cɔ́gɔt-kak, na sesêk cɔ́gɔt na bol vɛ̀ yê buk o,

³²tanga mwa sesêk cɔ́gɔt de ba rɔnɔ mɛ lala, na bol vɛ̀, mwa na rǐk, na bekwagam, na mwa pyɛ́ de be ra mɛ fwom e de lɔ̂k buk o. Bê nɔ̂ng kawɛ mwat pyɛ́ de a rɔda jut.

³³Tom de belɔ Mɛrari bê ra e bûk sangâl Dagwi à vemo, ko Itamar Aharon, piris, a rɔda sè mwât nuyel mɛn, na a dura a yɛn pyɛ́ de yɛn ê ra.”

³⁴Mose, na Aharon tanga bemakûk rùhup mɛn yɛn a bara yére nelɔ Kohat, na Gɛrshɔn tanga Mɛrari sede remo de Dagwi a nɔng ɛn nu. Yɛn a bara bemat e ji rùhup na nelɔ mɛn, mwa beras de ba sé yi e neshey kuru batat vɔk e kuru batungun, vemo de ba ga vey, na be ra fwom e bûk sangâl Dagwi: E ji belɔ Kohat ba sɛ̀ gu baba na naga betaama na kuru batungun (2,750). E ji belɔ Gɛrshɔn ba sɛ̀ gu baba na naga betyiimin na kuru batat (2,630). E ji belɔ Mɛrari ba sɛ̀ gu batat na naga beba (3,200). Nepyak mɛn mwa na sé gu rwit na naga betungun na kuru rwit (8,580).

⁴⁹Ba bara kawɛ mwat, ko ba nɔ̂ng kawɛ fwom mɛ, ba to ha a yɛ pyɛ́ de ê jut, mwa sede remo de Dagwi Darwey a nɔ̂ng Mose nu.