Read berom Bara BeIsrayɛl 5 Bible Online

Bara BeIsrayɛl 5 - berom bible

Bara BeIsrayɛl 5

¹Dagwi Darwey a yâng Mose,

²“Nɔ̂ng BeIsrayɛl redu, na be ro kawɛ mwat de a vɔk rɔ̂ hwô bek ves, kɛ pyɛ́ mɛ ye nunus na nshi, na kawɛ mwat de a sé ligis yaga revîn mwat. Hwô ro rwas kɛ hwā ayi. Pat ɛn yi e kwɔ̂n ye ngyɔk o, yɛn a kwon tɛ̀ hɛ ligis wɛt, kwɔn de me sangal ɛ e tê bemat hom.”

⁴Ko BeIsrayɛl yɛn a ra ano, yɛn a ro ɛn vɔk e bamâ kwɔ̂n ye ngyɔk o. Yɛn a ra tyɛng pyɛ de Dagwi Darwey a ha a Mose.

⁵Dagwi Darwey a to yang Mose, a ha a BeIsrayɛl neha nemo ngan: Ka sede rwas kɛ hwā a ra a gwà mɛ renɛn e kagwɛ gwong, a gas nesa mɛ na Dagwi Darwey,

⁷ko a rɔda kulu renɛn de a ga ra mo. A to tala pyɛ renɛn o, ko a to gwɛ̌ ɛ bak gwining e ji bebak betungun, ko a nɔ̂ng mwat de a ra a yɛ renɛn o pyɛ́ mo mwa.

⁸Ko ka mwat de ba ra a yɛ renɛn o a ga wey, ko a vɔk mwât lɔ mɛ wò bagat de bê nɔng ɛ pyɛ̂ tala mo wɛt, ko pyɛ́ mo yê sè yê Dagwi Darwey, ko ba rɔda nɔ̂ng piris yɛ. A rɔda wuna ɛ̀ tùruk de piris o ê ra mɛ pyɛ́ de ba ga tɔk ɛn mɛ yaga talâ banɛn de a ga ra.

⁹Ano arɔng, kahɛ nɔrɔ hak de BeIsrayɛl ba vey a Dagwi mɛ, ha rɔda sè hê piris o pyɛ mɛ.

¹⁰Kayɛ pyɛ de ba nɔ̂ng mwat o, ya rɔda sè myɛ, ko ê vɔk yɛ.

¹¹Dagwi Darwey a to yang Mose, a ha a BeIsrayɛl neha nemo ngan: Ka sede mwat hwak a tó yey na hwā mɛ wɔgɔ, gyeng rɔ̌ a ga tɛ̀ to mɛ ligis yi na man na mwat hwak. Ko hwā mo a lɛrɛ pyɛ de a ga ra mo, ko vit a mwât nuha e ra pyɛ mo arɔng. Kɛ ka sede mwat hwak a tó yey na hwā mɛ, mwa ano de a ga ra pyɛ na mwat wɛt,

¹⁵ko rwas o a rɔda wɔ na hwā mɛ mo na piris, ko a rɔda vɔk ɛ̀ nemuk baale e shǐ masa hining yaga nɔ̂ng nɔrɔ vɔk na Dagwi yaga hwā mo. A tɛ̀ něy kɛ pyɛ̂ nesang hyɔɔlɔl e ra tɛt o wɛt, yaga a sé e nɔrɔ̂ nemuk hê tô yey, yaga na be tɔk tsak do wo pyɛ de ya ga té.

¹⁶Piris o a rɔda vey na hwā mo, ê tɛ̀ ɛ, a tumal e nuyêl bûk sangâl Dagwi Darwey.

¹⁷A rɔda vɛ nshi de ba tik jaram, ê shusha nɛ e tsûng secwem, ê vɛ nefongol yi e vwêl bûk sangal o, ko ê tɛ̀ nɛ̀ e ji nshi mo, na ne tɛ́ ɛn nshî kpashak.

¹⁸Ko a rɔda viri setôt ratô hwā mo, ko ê tɛ̀ nɔrɔ̂ nemuk hê tô yey o e vɔ hwā mo. Yɛ pyɛ mɛ ê vɔk e vɔ mɛ nshî kpashak nemo de ne vey na gawey e ra mwat.

¹⁹A rɔda tɛ̀ hwā mo a sira, ko ê yang ɛ, “Ka sede vit a mwat de a ga dyɛng na hwo, ko hwo arɔng hwà ga ra renɛn de rê tɛ̀ o ligis yimo yi e jeng de hwà ga ra weneng na rwas mō wɛt, ko nshî kpashak de ne vey na gawey nê mǎ hwo wɛt.

²⁰Ko ka sede hwà ga man na mwat hwak, e bama de hwà ga ra weneng, na hwà tɛ̀ to mō ligis yi na dyɛng na mwat hwak de a sé rwas mō wɛt, ko tik na Dagwi Darwey a tɛ̀ o, hwo sè pyɛ sedusa na ye gawey e ji bemat mō, e jeng de ê tɛ̀, hwo páa nèy, na hwo sè sang-gwon.

²²Tik na nshi nemo de ne vɛsɛ na gawey, ne yel e ji rebek mō, yaga na ne tɛ̀ hwo páa nèy na hwo sè sang-gwon.” Ko hwā mo a rɔda ye, “Ano, ano”.

²³E bama mo, piris o a rɔda jɛk gawey o e ra bwok-jɛk, ko a rɔda kus jɛk o e ji nshî kpashak nane mo.

²⁴Gyam na a tɛ̀ hwā mo a sɔ nɛ, yaga na ne yel e rebek mɛ, ko nshi mo nê vey na reyɔm rê kpashak e ji mɛ.

²⁵Ano arɔng, piris o ê sey nɔrɔ̂ nemuk hê tô yey nane de hwā mo a vɔk e vwɔ mɛ, ê ra mɛ sede e nára nɛ vɔk na Dagwi, ko ê vey na nɛ e gàgbang rangas pyɛ́.

²⁶A rɔda vɛ nemuk o pyak e vwɔ, na a rangas nɛ e tô mwa nɔrɔ mo. Hemo ha dura, nɔrɔ mo ha sé hê Dagwi. E bama mo, a rɔda tɛ̀ hwā mo, a sɔ nshi mo.

²⁷Ko ka sede a ga kana tɛ̀ tó mɛ ligis yi na man na mwat hwak, ko nshi de ne vey na gawey na rɔda yel e ji mɛ, ko nê nɔng ɛ reyɔm rê kpashak, ê paa nèy ko ê sè sang-gwon arɔng, ko a rɔda tɛ́ ɛ wò gawey e tê bemat.

²⁸Ko ka sede hwā mo a ga kana tɛ̀ to mɛ ligis wɛt, ko a sé gyat zɔng, vit à pyɛ de ya rɔda sɛ̀ ɛ, ko a rɔda tɔk tɔs nèy zɔng.

²⁹Remo rɛ à redu e ra tô yey e jeng de hwā a ga tɛ̀ to mɛ ligis yi na man na mwat hwak e bamâ weneng na rwas mɛ. Piris a rɔda tɛ̀ hwā mo, a tumal e nuyêl bûk sangâl Dagwi Darwey, na a raa mwa begwong vemo na yɛ.

³¹Ba rɔda gang rwas yaga pyɛ vyes cak wɛt, ko hwā mo, ka sede a ra renɛn o, ko a rɔda jut nedirîk rɛ.