Read berom Bara BeIsrayɛl 6 Bible Online

Bara BeIsrayɛl 6 - berom bible

Bara BeIsrayɛl 6

¹Dagwi Darwey a to ha a Mose a yang ɛ, a ha a BeIsrayɛl neha nemo ngan: Ka sede rwas kɛ hwā a simo, na a sira hɛ, na a tik tó mɛ jaram yaga Dagwi Darwey yaga jeng,

³gbing-gbing na a sǎ sana sɔ̂ nshî anap tanga kayɛ pyɛ de ye tɛ̀ mwat a feng. A sɔ kanɛ nshi de ba yong na nèy anap wɛt, kɛ a re nèy anap nelǎ kɛ nehwogot o arɔng wɛt.

⁴Mwa neyɛnɛ̂ jeng de a sira, na a tik tó mɛ jaram yaga Dagwi, a re pyɛ de ya yi e retîn cɔgɔ̂t anap ko tyɔng wɛt, kɛ bebǒk nèy o, kɛ yéneng yɛ wɛt.

⁵E mwa jeng de a sira mo, a hwon to mɛ kɛ negyɛk mɛ wɛt. Yɛ a rɔda sè jɛrɛ, sɛ̌ jeng de a jut yè sangal jaram yaga Dagwi Darwey ya sila; yɛ a rɔda tik tôt rato mɛ he ras lis o.

⁶Mwa neyɛnɛ̂ jeng o, a wɔ bagat na revîn mwat wɛt.

⁷Ka a ka sé revîn dâ tɔ mɛ, kɛ de mɛ, kɛ gwà mɛ rwas o kɛ gwà mɛ hwong de a ku, yɛ a kwon tɛ̀ tó mɛ ligis yaga yɛn wɛt. Tôt rato mɛ lis o mo hê dura, a ga tik tó mɛ jaram yaga Dagwi.

⁸Mwa neyɛnɛ̂ jeng sira mɛ, ba ga tɛ̀ ɛ́, a sè jaram yaga Dagwi Darwey.

⁹Ka sede mwat hwak a ku hák bagat na yɛ, yi ano, tôt rato mɛ hemo de a ga kana tik jaram ha ga tɛ́ ɛ ligis. Tik na a gyeng pɔlɔ taama, na a ba wula tot o, e tuk de a rɔda to ba se haalal.

¹⁰E tuk hê rwit, a rɔda vey a piris e rwi bûk sangal Dagwi bebɔp beba na begumurus beba.

¹¹Ko piris o a rɔda nára gwining yaga nɔrɔ̂ fûng banɛn ko bwang o yaga nɔrɔ̂ yas burang, na a ra mɛ pyɛ́ de ba ga tɔk ɛn mɛ yaga fûng renɛn de mwat o a ga ra, jeng de á sè bagat na revîn mwat. E tuk hane mo arɔng, a rɔda to tik rato mɛ jaram.

¹²Yɛ a rɔda vey na tùruk wo shey hining, na be nára wɛ nɔrɔ̂ talâ banɛn, ko a rɔda to susu jeng tîk to mɛ jaram o. Nepɔlɔ de a ga kana ra, bê bara nɛ wɛt, yaga a ga kana tɛ́ ɛ ligis.

¹³Ko gwomo gwɛ a gwong de be raa yaga mwat de a ga kana tik tó mɛ jaram, ko jeng de á kana jut o ya ga sila: Ba rɔda vey na yɛ e rwi bûk sangâl Dagwi.

¹⁴E hwomo, a rɔda nára a Dagwi Darwey, yas ryat de vit a ram kɛ pyɛ cak vyes, yɛ a tùruk wo shey hining yaga nɔrɔ̂ yas burang, na shep tyimit ye shey hining yaga nɔrɔ̂ fûng banɛn, tanga tùruk yaga nɔrɔ̂ wunâ nesa.

¹⁵Ê to vey na kaw de wa vɔk ɛ nekpam-tûk rɔkrɔk sana géy-sing ne nemuk nerat de ba suk na něy, na kpam-tuk bagasak sana géy-sing de ba mɔmɔ na něy. A to vɔk ɛ nɔrɔ̂ nemuk na nɔrɔ̂ pyɛ̂ sɔ.

¹⁶Piris a rɔda wɔ na pyɛ́ mo mwa e gàgbang rangâs yas, ko a rɔda tanga nára a Dagwi Darwey nɔrɔ̂ fûng banɛn na nɔrɔ̂ yas burang.

¹⁷E bama mo, a rɔda nára tùruk yaga nɔrɔ̂ wunâ nesa mwa na bagat kpam-tuk o. E yɛnɛ mo, ê nára nɔrɔ̂ nemuk na hê pyɛ̂ sɔ.

¹⁸E hwomo e rwi bûk sangâl Dagwi, e yɛ womo de a ga kana tik tó mɛ jaram a rɔda hwon tot mɛ de a ga kana tik hɛ jaram, ko a rɔda jut tot o, na a tɛ̀ hɛ e nɛ̂n nɔrɔ̂ wunâ nesa.

¹⁹Ano arɔng, piris a rɔda tɛ̀ tô vwɔ̂ turuk de ba ga kyé hɛ, tanga kekpam-tûk rɔkrɔk, na kpam-tuk bagasak gwining yi e kaw o e vɔ mɛ.

²⁰Ko piris o a rɔda jut pyɛ́ mo, na a ra mɛ sede a sé nára a Dagwi Darwey yɛ. Pyɛ́ yane ya sé yê jaram, ko ya sé yê piris, mwa tanga cɔ̌ tùruk o na fwa mo. Ya sé numo mɛ. E bama mo, yɛ mwat de á kana tik tó mɛ jaram o a rɔda tɔk to hwo sɔ nshî anap.

²¹Gbing-gbing mwat de a sira, na a tik tó mɛ jaram yaga Dagwi Darwey, a raa gwông nɔ̂ng nenɔrɔ mo. Ka sede ê kyɛm a gwɛ̌ nɔng nɔrɔ de ha dal sira mɛ mo, ko a sé gbing-gbing, na a tanga sila sira de a ga kana ra.

²²Dagwi Darwey a yâng Mose,

²³a ha a Aharon tanga nèy mɛ neha de yɛn a rɔda ha jeng tɛ̂ nerat e ra BeIsrayɛl:

²⁴“Dagwi Darwey a tɛ̀ nerat e ra yin, na a gyeng in!

²⁵Dagwi Darwey a bɛrɛng hin na nerat, na a tɛ̀ yey mɛ na yin!

²⁶Dagwi Darwey a dura a yin nerat mɛ, na a nɔng in sangâl netyang na yêy dyɛngɛ!”

²⁷Jeng de bepiris ba rɔda yila reza hom e gwong gwomo, na be tɛ̀ mɛ nerat e ra BeIsrayɛl, ko me pyɛ hom, ma rɔda tɛ̀ nerat e ra yɛn.