Read berom Bara BeIsrayɛl 7 Bible Online

Bara BeIsrayɛl 7 - berom bible

Bara BeIsrayɛl 7

¹Tuk de Mose a yɛnɛ tɛ̂ bûk sangâl Dagwi, a shushu gwɛ na něy ko a tik gwɛ jaram yaga Dagwi mwa na pyɛ́ de ya sé e ji gwɛ. A to shushu gàgbang rangâs pyɛ́ mwa na pyɛ̂ fwôm hɛ na něy arɔng.

²E bama mo, bemât nuyêl BeIsrayɛl, vɛ a bedanelɔ vemo de bá sè bemât nuyêl yére mɛn e jeng de ba bara BeIsrayɛl,

³yɛn a vey a Dagwi Darwey na nɔrɔ mɛn. Bá vey na bekyɛkyɛ̂ berɔndɔng betyiimin de ba bang vɛ tanga berɔndɔng kuru na vɛ beba — rɔndɔng gwining yi na kawɛ mwât nuyel tanga kyɛkyɛ gwining yi na bemât nuyel beba. Yɛn a tik pyɛ́ mo e nuyêl bûk sangâl Dagwi.

⁴Dagwi Darwey a yâng Mose,

⁵“Sey pyɛ́ yemo yi na yɛn, yaga na be bin ra fwom na yɛ e jeng hashê pyɛ̂ bûk sangâl Dagwi. Gas a BeLevi yɛ tyɛng na yerê fwom de yɛn e ra.”

⁶Ano kwong, Mose a sey bekyɛkyɛ tanga berɔndɔng o, a nɔ̂ng BeLevi vɛ.

⁷A nɔ̂ng belɔ Gɛrshɔn bekyɛkyɛ beba na berɔndɔng benaas tyɛng na yerê fwom de yɛn e ra,

⁸ko a nɔ̂ng belɔ Mɛrari bekyɛkyɛ benaas na berɔndɔng rwit, tyɛng na pyɛ de fwom mɛn gwo simo. Yɛn mwa ba ra pyɛ de mwât nuyel mɛn Itamar, hwêy Aharon, piris, a ha a yɛn.

⁹Ko Mose a nɔ̂ng belɔ Kohat pyɛ́ cak wɛt, yaga fwom o mɛn gwa sé gwô pyɛ̂ jɛrɛ, ko be hashe yɛ e basanat mɛn.

¹⁰Bemât nuyel o yɛn a to vey na nenɔrɔ yaga nzem tîk gàgbang rangâs yas jaram, ko yɛn a tik yɛ e nuyêl kwɔn o.

¹¹Ko Dagwi Darwey a ha a Mose, a ye, “Kahɛ tuk mwat gwining e ji bemât nuyel a rɔda vey na nenɔrɔ mɛ yaga tîk kwɔn o jaram.”

¹²Yɛn a raa bemɛn e gwong gwomo ngan: E tuk hê mɛsɛng o: Nashon Aminadap wo yerê Yuda E tuk hê ba: Nɛtanɛl Zuwar wo yerê Isakar E tuk hê tat: Ɛliyap Hɛlɔn wo yerê Zɛbulun E tuk hê naas: Ɛlizur Shɛdɛyur wo yerê Rubɛn E tuk hê tungun: Shɛlumiyɛl Zurishadai wo yerê Simɛyɔn E tuk hê tyimit: Ɛliyasaf Dɛyuwɛl wo yerê Gat E tuk hê taama: Ɛlishama Amihut wo yerê Ɛfrayim E tuk hê rwit: Gamalyel Pɛdazur wo yerê Manase E tuk hê shanetat: Abidan Gidɛyɔni wo yerê Bɛnyamin E tuk hê kuru: Ahiyɛzɛr Amishadai wo yerê Dan E tuk hê kuru na hɛ hining: Pagiyɛl Ɔkran wo yerê Ashɛr E tuk hê kuru na hɛ ba: Ahira Ɛnan wo yerê Naftali. Pyɛ̂ nɔrɔ yê kawɛ mwat ya sé jining o, yɛ a: Shǐ dɛdɛrɛng hining hê dyam pyɛng de nedirîk hɛ na wul kilo gwining na bit o, tanga shǐ dyam pyɛng hining de nedirîk hɛ na wul bebak betat e ji benaas vê kilo gwining mwa tyɛng na dyām de be ra mɛ fwom e kwɔ̂n re a Dagwi ɛ fongol. Kawɛ mo a sila na nemuk de ba suk na něy yaga nɔrɔ̂ nemuk; gub(...)

⁸⁴Yemo yɛ à mwa pyɛ̂ nenɔrɔ de bemât nuyêl BeIsrayɛl vane kuru na vɛ beba ba vey mɛ yaga tîk gàgbang rangâs pyɛ́ jaram: — neshǐ dɛdɛrɛng ne dyam pyɛng kuru na nɛ neba, na neshǐ dyam pyɛng kuru na nɛ neba. Mwa nedirîk neshǐ dyam pyɛng o na sé kilo kuru baba na vɛ betaama (27); — gùbu kuru na vɛ ba vê dyam shinang de ba sila na pyɛ̂ nesang hyɔɔlɔl. Mwa nedirik dyam shinang o na sé kilo gwining na bit o; — bebot bemus kuru na vɛ beba, na beturuk kuru na vɛ beba, tanga bebot beturuk kuru na vɛ beba de ba wul shey hining; mwa yas o ya sé yaga nɔrɔ̂ yas burang; — begam kuru na vɛ beba yaga nɔrɔ̂ fûng banɛn; — berɔndɔng kuru baba na vɛ benaas (24), beturuk kuru batyiimin (60), begam kuru batyiimin (60), na bebot beturuk kuru batyiimin (60), de ba wul shey hining. Mwa yas yemo ya sé yaga nɔrɔ̂ wuna nesa.

⁸⁹Jeng de Mose a yel e bûk sangâl Dagwi, yaga na a há na Dagwi Darwey, a wok fwɔ̂ Dagwi Darwey. Fwɔ mo gwa yi e tê bekɛrup beba de ba sé e ra pyɛ bâng kundung de gwa vɔk pyɛ́ de ya dura wuna-na-sirâ Dagwi, ko a ha na yɛ.