Read berom Bara BeIsrayɛl 8 Bible Online

Bara BeIsrayɛl 8 - berom bible

Bara BeIsrayɛl 8

¹Dagwi Darwey a yâng Mose,

²“A ha a Aharon wɔgɔ, kayɛ jeng de ê tɛ̀ bekywa-kya vane betaama e ra pyɛ tikis vɛ, ko a tɛ̀ vɛ e gwong de negbey vɛ nê sè vey e nuyel.”

³Aharon kwong a ra tyɛng na pyɛ de ba ha a yɛ, a tɛ̀sɛ bekywa-kya mo, na be bɛrɛng vey e nuyel.

⁴Begwong de ba yong pyɛ tikîs bekywa-kya mo a vemo ngan: Ba yong vɛ na dyam shinang yi e rak o vɔk e retin o, tyɛng na wɔ́rɔ de Dagwi Darwey á dura a Mose.

⁵Dagwi Darwey a yâng Mose,

⁶“Jut BeLevi yi e ji bemɛn BeIsrayɛl, ko hwo tik ɛn detu, na hwo fung ɛn,

⁷e gwong gwomo: Zagat nshî fung e ra yɛn. E bama mo, hwo tɛ̀ ɛn, be hwon babek mɛn mwa, ko be kus berugu mɛn arɔng. Yi ano, yɛn ê sè haalal.

⁸Ano arɔng, tɛ̀ ɛn, yɛn a jut bwôt mus tanga nɔrɔ̂ nemuk hê nemuk nerat de ba ga suk nɛ̀ na něy. Ko hwo pyɛ mo, hwô jut bwôt mus wo neba, na be nára wɛ nɔrɔ̂ fûng banɛn.

⁹Hwô tula mwa BeIsrayɛl myak, ko hwô vey na BeLevi e nuyêl bûk sangal hom.

¹⁰Ko BeIsrayɛl ba rɔda tɛ̀ vɔ mɛn e ra batô BeLevi mo.

¹¹Aharon yɛ wɛ de a rɔda tik BeLevi jaram yaga me sede nɔrɔ yi e vɔ BeIsrayɛl, yaga na yɛn a ra a me fwom e kwɔ̂n sangal hom.

¹²“Ano kwong, BeLevi ba rɔda tɛ̀ vɔ mɛn e ra batô bemus vane beba. Aharon a rɔda nára wɛ nɔrɔ̂ fûng banɛn, ko wo neba mo wo sè wo nɔrɔ̂ yas burang. E gwong gwomo, ê ra mɛ pyɛ́ de ba ga tɔ́k ɛn mɛ yaga talâ-nɛn de BeLevi ba ga ra.

¹³Tɛ̀ BeLevi mo, yɛn a tumal e nuyêl Aharon na nèy mɛ, ko hwà rɔda ra na yɛn sede hwà sé nára hɛn vɔk na Dagwi Darwey.

¹⁴A sé e gwong gwomo de hwà rɔda tik BeLevi detu na bwâng BeIsrayɛl, ko yɛn a rɔda sè benang.

¹⁵“E ngamo nuyel BeLevi ba rɔda hwo vɛ̀sɛ ragâs fwom mɛn e buk hom.

¹⁶Ma ga jut ɛn e tô mwa nèy bewen ne mɛsɛng ne BeIsrayɛl, ko bê sè benang.

¹⁷Jeng de ma kana mɔbɔs nèy negel e Misra, ko ma tik kahɛ hwey negel o e ji BeIsrayɛl jaram yaga to hom, kɛ hê mwasi kɛ hê ngyama ayi, ha sé nang.

¹⁸Ko a remo, ma sé jut BeLevi e tô nèy negel bewen ne BeIsrayɛl.

¹⁹Ko ma sé nɔ̂ng Aharon na nèy mɛ hɛn e nɔrɔ. Yɛn a rɔda ra fwom e bûk sangâl hom e tô BeIsrayɛl, na yɛn a sey talâ-nɛn e to mɛn. Yi ano, tumbang hwak wo kwon hwo e ra BeIsrayɛl wɛt, ka sede yɛn a vey bagat na Kwɔ̂n Jɛrɛ.”

²⁰Ano kwong, Mose na Aharon na regyɛng BeIsrayɛl mwa ba ra a BeLevi tyɛng na nu de Dagwi Darwey a nɔ̂ng Mose.

²¹BeLevi mo ba fung bato mɛn, ko yɛn a kus berugu mɛn. E bama mo, Aharon a ra sede a sé nára hɛn vɔk na Dagwi Darwey, ko a ra pyɛ́ de ba ga tɔ́k ɛn mɛ yaga talâ-nɛn yaga yɛn, na a tɛ̀ ɛn haalal.

²²Yɛn a ra na BeLevi mo tyɛng na redu de Dagwi Darwey a nɔ̂ng Mose. Ko BeLevi ba hwo vɛ̀sɛ ragas fwom mɛn e bûk sangâl Dagwi, ko Aharon na nèy mɛ yɛn a bɛrɛng fwom mɛn o.

²³Dagwi Darwey a yâng Mose,

²⁴“Kawɛ WoLevi de a ga wul neshey kuru baba na nɛ netungun (25) vɔk e rak o, a rɔda vɛ̀sɛ ragas fwom e ji bûk sangâl hom.

²⁵Ko ka sede a wul neshey kuru batungun (50), ko a tik ragâs fwom gwô kayɛ jeng.

²⁶Ko ê tɔk kyě sɛlɛ besâ fwom mɛ BeLevi na fwom e bûk sangâl hom, ko yɛ a kwon ra fwom o hwak pyɛ mɛ wɛt. Gwong a gwomo de hwà rɔda gas a BeLevi tom de yɛn ê ragas.”