Read berom Bara BeIsrayɛl 9 Bible Online

Bara BeIsrayɛl 9 - berom bible

Bara BeIsrayɛl 9

¹Dagwi Darwey a ha na Mose e hêy Sinai e pwɛl gwô mɛsɛng e shey hê neba e bama de ba nusu yi e sevwêl Misra. A ye,

²“Tik na BeIsrayɛl be ra Nzem Gyilsît Nelɔ e jeng de ba kana tik ɛ.

³Ra in nɛ e tuk hê kuru na hɛ naas e pwɛl o nawiri. Ra in nzem o e begwong na e badu de ba kana yong ɛ mwa.”

⁴Ano kwong, Mose a hwo há a BeIsrayɛl neha mo.

⁵Sede nawiri na vey e tûk kuru na hɛ naas, e pwɛl gwô mɛsɛng o, yɛn a hwo ra Nzem Gyilsît Nelɔ mo e hêy Sinai. Yɛn a ra tyɛng sede remo de Dagwi Darwey a kana nɔ̂ng Mose nu.

⁶Ko behak e ji mɛn bá tɔk ra Nzem Gyilsît Nelɔ mo tuk hane mo wɛt. Yɛn a tɛ́ ɛn ligis, yaga ba ga kana ra revîn mwat. Yaga ano, yɛn a hwo vey na Mose tanga Aharon tuk hane mo.

⁷Ko ba yang ɛn, “Wot a ga tɛ́ ot ligis, yaga wot a ga ra revîn mwat. Yaga sɛ́ de ba dul ot nà nára nɔrɔ̂ nzem o tanga bwang begwa mot e jeng de ba kana tik ɛ arɛt?”

⁸Mose a hwo toyo na ha, a ye, “Gyeng in e ngyen, sɛ̌ ma sɛ̀ pyɛ de Dagwi Darwey ê misang e ra yin.”

⁹Ano, Dagwi Darwey a to yang Mose,

¹⁰a ha a BeIsrayɛl neha nemo ngan: Ka sede bemat behak e ji min kɛ e ji yére min, ba tɛ́ ɛn ligis yaga revîn mwat, kɛ ba sé e de rekyɛn de ba wɔ́ yikyik, bê tɔk ra Nzem Gyilsît Nelɔ, na be nɔng me mɛ nerey.

¹¹Yɛn ê tɔk ra nɛ e bamâ pwɛl gwining wɔgɔ, nawiri ne pɔlɔ kuru na hɛ naas hê pwɛl gwo neba. Yɛn ê re vyēl nzem o, be wuna yɛ na kpam-tuk sana géy-sing tanga sehwonong de sa sé kpashak.

¹²Be kwon tɛt ɛ pyɛ cak vɔk e gasi wɛt, kɛ be kwon kwɔrɔ kup nama mo hwak wɛt. Jeng de yɛn a rɔda ra Nzem Gyilsît Nelɔ mo, ko gbing-gbing yɛn a raa mwa badu nɛ arɔng.

¹³Ko ka sede mwat hwak a sé de a ga tɛ́ ɛ ligis wɛt, a to wɔ̂ rekyɛn arɔng wɛt, ko a kyɛ́ ɛ nà ra Nzem Gyilsît Nelɔ mo, yɛ mwat wane mo a ga row neken mɛ, ba rɔda ro ɛ yi e ji bemat mɛ, yaga a kyɛ́ ɛ nà nára a me nɔrɔ̂ nzem o e jeng de ba kana tik ɛ. Yɛ mwat o a rɔda sɔ reyɔ̂m pyɛ de a ra.

¹⁴Ka sede mwat duk de a sé sangal na yin, a simo na a ra Nzem Gyilsît Nelɔ ê tɔk ra nɛ, ko a sé gbing-gbing a raa mwa badu na pyɛ de ba misang e ra nɛ. Badu mo ba sé vining o kɛ mwat o a sé mwat duk kɛ hwêy vwel o ayi.

¹⁵Tuk de ba tɛ̀ kwɔ̂n re a Dagwi fongol, rele ra hwo gyirik, ra ye ship a buk de ba tik ɛ pyɛ́ de ye dura wuna-na-sira na Dagwi. Yi e nawiri vɔk e nagasi, rele mo ra sè gbey sede kya.

¹⁶Pyɛ mo ye re nuyel ano, rele re ye ship a buk o, ko nabwalak ye se sede kya.

¹⁷Kayɛ jeng de rele mo ra sogo yi e ra buk o, ko BeIsrayɛl arɔng be hwo kwɛngɛl; e kahɛ kwɔn de rele mo ra tumal ɛ, ko e kwɔn a hane de yɛn ê ye ɛ ngyɔk.

¹⁸A sé e Dagwi Darwey de e nɔ̂ng BeIsrayɛl nu, na be hwo kwɛngɛl, ko a to sé e yɛ de e nɔng ɛn nu, na yɛn a ye ngyɔk. Mwa jeng de rele ré sè e ra bûk sangâl Dagwi, yɛn e nàra e kwɔ̂n ye ngyɔk o.

¹⁹Ka sede rele mo ra nàra e ra buk o jeng lyis, BeIsrayɛl be raa redu Dagwi Darwey, ko be hala kwɔ̂n ye ngyɔk o wɛt.

²⁰E jeng cak, rele mo re tɛ̀ nepɔlɔ tyɔng zɔng. E ra redu Dagwi Darwey yɛn e nàra e kwɔ̂n ye ngyɔk, ko e ra redu mɛ arɔng yɛn e hwo kyè.

²¹E jeng cak, rele mo re ye ship a buk o yi e nawiri vɔk e nagasi zɔng, ko jeng de ra sogo nagasi, yɛn arɔng be sogo be hwo kwɛngɛl. Kayɛ jeng de rele mo ra sogo, kɛ a sé nagasi kɛ nabwalak, ko bé hwo kwɛngɛl mɛn arɔng.

²²Ka rele mo ra nàra e ra bûk sangâl Dagwi nepɔlɔ neba, kɛ pwɛl gwining, kɛ shey burang ayi, ko BeIsrayɛl o be nàra e kwɔ̂n ye ngyɔk o, vit à sogo. Ko a sé e jeng de rele mo ra sogo de yɛn arɔng be sogo, na be hwo kwɛngɛl.

²³Yɛn e ye ngyɔk e ra redu Dagwi Darwey, ko e ra redu mo arɔng yɛn e hwo kwɛngɛl. Yɛn e raa redu Dagwi Darwey, tyɛng sede remo de a kana nɔng ɛn rɛ yi na Mose.