Read berom Mika 1 Bible Online

Mika 1 - berom bible

Mika 1

¹Ha de Dagwi Darwey a nɔ̂ng Mika wo repomô Moreshet a hemo, jeng de Yotam, na Ahas tanga Hɛzɛkiya bá sè begbɔng begwɔ̀m Yuda. Dagwi Darwey a dura a Mika mwa pyɛ́ yemo e ra Samariya na Yɛrusalɛm.

²Wok in, à yin yére bemat jey! Wet in betong, yin mwa vê sangal e jey! Darwey Dagwi Darwey ê nɔng nuha e ra yin. Darwey, yi e Gbɔng Duk Re Fongol mɛ wo jɛrɛ.

³Di in, Dagwi Darwey a sé kyè vey yi e kwɔn mɛ, ê gyirik na a bɔrɔs e ra nekwɔn garang ne jey.

⁴Ko beraku bê ye ywey e nɛn mɛ, ko benɛk bê wuma hɛn sede negang bagat na kya, sede nshi de ne tele e dem sɛndɛng.

⁵Mwa yê té yaga burû Yakɔp, na yaga banɛ̂n lɔ Israyɛl. Burû negwɔm Israyɛl à sɛ́ ɛ? Ha sé sogô nehywɛ Samariya gbɔng repomo mɛ wɛt a? Ko nekwɔn sekwît negwɔm Yuda à sɛ́ ɛ? Na sé e Yɛrusalɛm gbɔng repomo mɛ wɛt a?

⁶Yaga ano mê tɛ̀ Samariya wo tɛ́ ɛ gwɔ̂t barin e tê-dyɛng, kwɔ̂n tûs bě anap. Mê lusha beta nelɔ mo e nɛk, ko bê hala batîs nelɔ mo ngwɛnjɛng.

⁷Bê bunut mwa cī de yɛn a yong. Kya hê re mwa pyɛ́ de ba tala mɛ nedeneves mɛn, mwa cī mɛn yê wey ɛ. Yaga ya yi e pyɔlɔ̂ nedeneves, ko bê to ra fwom na yɛ yaga nedeneves.

⁸Mika a ye: À sé yaga ano de me ra sesin, me dak sekun, me kyè na bol hal, kpimit arɔng. Mê tosho sede nevu-hey, mê kùnus sede bengyuwa.

⁹Yaga barâm Samariya bê tɔk vel wɛt, ko ba ga ra Yuda arɔng. Ba ga wul ruhûp bemat hom, ba ga wul Yɛrusalɛm.

¹⁰Yin kwon ha há mo e Gat wo vê repugu mot wɛt, yin kwon tosho ko tyɔng wɛt e Bet-Lɛyafara. Bíring hin e fongol zɔng!

¹¹Kwey in vɔk e de sesam, à yin bemât Shafir, kpimit na rekyen. À yin bemât Zaanan, yin kwon nusu wɛt. Bemât Bet-Ɛzɛl ba sê sesin, bê to sɛlɛ hin wɛt.

¹²Bemât Marat ba sé gyeng wôk yɛgɛt yat tyɔng wɛt, yaga gawey ha ga hwo yi na Dagwi Darwey, vɔk e ruhûp Yɛrusalɛm.

¹³Rɔgɔs hin bekyɛkyɛ na bedwa mó, à yin bemât Lakish. E yin de yin a masa banɛ̂n BeIsrayɛl, ko yin a vey na vɛ e Siyɔn.

¹⁴Yaga ano tɛ̀ in Moreshet-Gat e gwong na nɔrɔ, Nelɔ Akzip nê sè pyɛ kwɛlɛng na begbɔng begwɔ̀m Israyɛl.

¹⁵Dagwi Darwey ê vey na bemât jugu e ra yin, à yin bemât Maresha, ko gbɔng nerât Israyɛl nê to ɛn e fwarâ Adulam.

¹⁶Yɛt in setot min na yin wula bato mó, yaga nèy de yin a tɛ̀ yey na nɛ. Bato min bê sè hulhul sede vê jagawey, yaga nèy o nà ga hala hin vɔk e de sesam.