Read berom Mika 3 Bible Online

Mika 3 - berom bible

Mika 3

¹Ko ma ye: Wet in betong, à yin bemât nuyêl Yakɔp na begwɔ̀m lɔ Israyɛl! A sé naka na yin a tɔk gâs badu e tē wɛt a?

²Yin e kyɛ́ in pyɛ́ ryat, na yin tɛ̀ yey na vyes o. Yin e wɔnɔ bemat hom beken, yin hama banama mo yi e bekup o,

³yin re banama mo, yin paa bahwo mo, yin kwɔrɔs bekup o cɛk o cɛk o, ko yin re vɛ̄ sede nama e rwey, sede nama e rwêy leng.

⁴Ano yɛn ê tosho a Dagwi Darwey, ko ê toyo a yɛn wɛt, ê lɛrɛ bayis mɛ yi na yɛn e jeng o, yaga pyɛ́ vyes de yɛn a ra.

⁵Dagwi Darwey a ha e ra bezarap, de be tɛ̀ bemat mɛ be ye rɛng, vemo de be dopse mok “Netyang” jeng de bé nɔng ɛn pyɛ́ de bê re, ko como e ra vemo de be tɛ̀ a yɛn pyɛ e nu wɛt.

⁶Yaga ano ê sè a yin turuk sana negwi-ywey, mwangalang sana bemât bɛrɛng. Gwi gwô gaba a bezarap, ko nagwi nê sè gyibilik e ra yɛn.

⁷Bemât bɛrɛng bê tɛ́ ɛn pyɛ byɛs, ko vê vyoshon bê tɛ̀ a yɛn rekyen, mwa hɛn bê bangas nenu mɛn na vɔ yaga Dagwi a ga toyo a yɛn na pyɛ wɛt.

⁸Ko me à, ba ga sila me na reto, na gabîk Dagwi Darwey, na gâs badu e tē tanga gap, na me dura a Yakɔp buru mɛ, Israyɛl banɛn mɛ.

⁹Wet in betong, a yin bemât nuyêl lɔ Yakɔp, na begwɔ̀m lɔ Israyɛl. Yin e kyɛ́ in gâs badu e tē, ko yin e tsip shɔt ryat,

¹⁰Yin e lɔk Siyɔn na nemi, ko Yɛrusalɛm na neves!

¹¹Bemât nuyel be yɛt shɔt na dyâm bâng nu, bepiris mɛn be basa a bemat e ra byɛ, bezarap mɛn be ha hâ siitit e ra dyām, mwa ano be jut zâ Dagwi Darwey, ko be ye, “Mwin Dagwi Darwey a sé na wot! Vit a pyɛ de yê mǎ hot.”

¹²Ano, yaga yin, bê ba how Siyɔn sede hwiri. Yɛrusalɛm wô ba tɛ́ ɛ gwɔt fongol, ko rahwôl Gbɔng Duk Re Fongol wô ba tɛ́ ɛ rehwot.