Read berom Mika 5 Bible Online

Mika 5 - berom bible

Mika 5

¹Di wot a ga rɔnɔ Yɛrusalɛm na jwa-pomo, ko vê repugu ba ga lɔk pyɛ gâng jwa mo, ba sé rusu gbɔng gwɔ̀m Israyɛl na wɔ́rɔ e rwanang.

²Dagwi Darwey a ye, “À Bet-Lɛhɛm Ɛfrata, hwà sé hwak ji yére shɛl yê Yuda. Yi na hwo hwak ê nusu á me, womo de ê re negwɔm e ji Israyɛl, womo de yerê belɔ mɛ ya sé yi e jeng raane.”

³Ano, Dagwi Darwey ê nára bemat mɛ sɛ̌ jeng de, hwā de e rus tɔ́ a tɔ hwey o. E jeng o bwang yere mɛ bê toyo yî sesam vey na begwa mɛn BeIsrayɛl.

⁴Jeng de a vey, ê tumal, na gâp Dagwi Darwey, ê gyeng bemat mɛ sede lwêk vyēl, yi na nedyɛt nerêy rezâ Dagwi Darwey, Dagwi mɛ. Ko yɛn ê sangal tyang, yaga ê sè gbɔng o vɔk e neyɛnɛ̂ jey.

⁵Yɛ pyɛ mɛ ê sey ot yi e vê repugu mo! Ka BeAsirya ba vey e vwel mot na be tɛ̀ bol mɛn e nelɔ negwɔm mot, ko wot ê tɛ̀ belek betaama be sogo e ra yɛn, ey, na begwɔ̀m rwit arɔng.

⁶Yɛn ê re negwɔm e sevwêl Asirya na wal, ko e sevwêl Nimrɔt na celes wal. Yɛn ê sey ɛ hot yi e vɔ BeAsirya ka sede yɛn a vey e vwel mot, kɛ yɛn a tɛ̀ bol mɛn e yɛnɛ̂ hɛ.

⁷Ano bwang BeYakɔp de yére bemat jey ya gwɔrɔ hɛn, bê sè sede mwɛngɛ yi na Dagwi Darwey, sede nerwak e ra sɔng, de ne yi na bemat kɛ ne gyeng mwasi wɛt.

⁸Ano bwang BeYakɔp de yére bemat jey ya gwɔrɔ hɛn, bê sè sede gukum e ji ngyāma e rehwot, sede bwôt gukum e ji kwarâ tyīmit, womo de e kwey e tê yɛ, ko e fɔnɔt yɛ, e hama yɛ cɛk o cɛk o, vit a mwât sêy yɛ.

⁹Ano hwô dal vê kyɛ́ ɛn hwo na gap, ko mwa vê repugu mo bê wey.

¹⁰Dagwi Darwey a ye: E jeng o mê sey ɛ bedwa min yi na yin, ko mê wey na bekyɛkyɛ̂ bedwa min.

¹¹Mê wey na bapomô vwel min, ko mê gangas mwa nekwɔn dal min.

¹²Mê wey na negarap yi e vwel min, ko yin ê to vɔk bevwoshon wɛt.

¹³Mê wey na cī min na beta gacik de yin e sap yɛ, ko yin ê to tē ngyuk kɛ yin re a pyɛ́ de yin a yong na vɔ min fongol wɛt.

¹⁴Mê luyu sesêk Ashera yi e tē min ko me wey na bapomo min.

¹⁵E ji shom na lashê yey hom, mê tala yére bemat jey pyɔlɔ̂ negbarak mɛn.