Read berom Mika 6 Bible Online

Mika 6 - berom bible

Mika 6

¹Wet in betong na hâ Dagwi Darwey: Sogo, dul tó mo e nuyêl beraku, ko tik na berahwol be wok fwɔ mo.

²Wet in betong, à yin beraku, wok in kûn Dagwi Darwey, na yin batîs jey vê raane, yaga Dagwi Darwey a tɛ̀ kûn bemat mɛ, ko ê ra shɔt na Israyɛl.

³“À bemat hom, ma ga ra a yin sɛ́ ɛ? Yin a ga ruru na me a? Toyo a me hin!

⁴Yaga ma vey na yin yi e Misra, ma viri hin yi e lɔ̂ sesam, ko ma tomo Mose, na Aharon tanga Miryam e nuyel min.

⁵À bemat hom, bare hin na pyɛ de Gbɔng Gwɔ̀m Balak wo Mowap a yong, pyɛ de Balaam Bɛyɔr a toyo a yɛ mɛ, na pyɛ de ya té yi e Shitim vɔk e Gilgal, yaga na yin a tɔk tomong rat de Dagwi Darwey a sey in mɛ.”

⁶“Mê vey e nuyêl Dagwi Darwey na sɛ́ na me ye guduruk e nuyêl Dagwi wo rak o ɛ? Mê vey e nuyel mɛ na nɔrɔ̂ pyɛ̂ rangas na byôt mus wo shey hining a?

⁷Dagwi Darwey ê vɔk yey pyɛng na gu beturuk, na nerɔt něy gu kuru a? Mê nɔng wen negel hom yaga buru hom, yɛ̀ hwêy rebek hom yaga nɛ̂n yey hom a?”

⁸Wey, à mwasi, Dagwi Darwey a ga ha a hwo, pyɛ de ya sé ryat, na pyɛ de e simo yi na hwo. Bē gas badu e tē, na be tɛ̀ yey na tsak tɛ̂ yey, na be kyè na dyɛ̂ng to na Dagwi mō.

⁹Fwɔ̂ Dagwi Darwey gwo mok e ra gbɔng repomo, a sé netsitsɛng nerat na be sap ɛ: “Wet in betong, à yin yerê bemat hom de yin a tula hin e repomo mo!

¹⁰Mê tɔk ye bam a pyɛ̂ nedanerey yê neves e lɔ̂ mwat vwes, na keshi masâ pyɛ́ ke bɔs, pyɛ dúsa arɛt?

¹¹Mê tɔk hala a mwat pyɛ masâ nezap pyɛ́ na gwodap pyɛ̂ masa nedirik yɛ̂ kwɛlɛng a?

¹²Bedaberey min be kat yol, bemat min mwa be ha bɔs, na balêm kwɛlɛng mɛn.

¹³Yaga ano ma ga hwo mǎ hin, na me tɛ̀ yin wey yaga banɛn min.

¹⁴Yin ê re, ko vit à sirik, vyong yê sǎ e de royo hin. Yin ê hashe pyɛ́, ko yin ê tɔk gyep yɛ wɛt, ko pyɛ de yin a gyep, mê wey na yɛ na como.

¹⁵Yin ê tus, sana yɛt bwal o, yin ê farang pwat, sana mɔmɔ hin na něy o, yin ê piri nèy anap, sana sɔ nshi mo.

¹⁶Yaga yin a gyeng badu Gbɔng Gwɔ̀m Ɔmri, na mwa tom lɔ Gbɔng Gwɔ̀m Ahap, yin a raa vôs badu mɛn. Yaga ano mê tɛ̀ be wey na yin, bemat min bê sè pyɛ byɛs, ano yin ê wok na dusâ bemat mwa.”