Read berom Mika 7 Bible Online

Mika 7 - berom bible

Mika 7

¹Gawey e ra me! Yaga ma ga tɛ́ me sede mwat de, e bamâ vôs nèy cɔ́gɔt naswigi, na e bamâ vôs nèy anap, ko a sɛ̀ vwɔ mo de ê re wɛt, vit a nèy regwi ne pɛrɛ mo, kɛ nevele de a vɔk cwey o.

²Vê tsak o ba ga wɛrɛn vit e vwel o ko vit a mwat de a pɔl de a sé cik. Mwâ hɛn ba sé e waba na be shushu nemi, be ra jàma bemɛn na bagun.

³Vɔ mɛn ba ga tɔ́k ɛn na râ neves, mwât nuyel na mwât shɔt be jama pyɛ bâng nu. Ko vê reto be ha pyɛ de be simo, yi ano mwa hɛn be hanas neves sede lɔ̂k rugu.

⁴Vemo de ba dal na nerat e ji mɛn ba sé sede serɔgɔ, vit à nèy, vê dál mwa na necik ba sé shagarak sede yép. Jeng tabâk bemât gyeng mɛn ya ga pom, a remo a sé a yɛn kpɛɛ.

⁵Tɛ̀ gap e ra mwât vwara mo wɛt, sey tsak o na wo yey mo wɛt. Gyeng nu mo yi e hwā de hwó kula hɛ.

⁶Yaga hwey he byɛs da mɛ, hwong e sogo e ra neng mɛ, gwel e sogo e ra dekwop mɛ, bemât lɔ mwat o ba ga tɛ́ ɛn vê repugu mɛ.

⁷Ko me à, mê bɛrɛng Dagwi Darwey, mê tɛ̀ bayis e ra Dagwi de ê sey me. Dagwi hom ê wok me.

⁸À vê repugu hom, yin kwon vɔk yey pyɛng e ra me wɛt! Ma ga gaba, ko mê sogo, Ma sé sangal e lwil, ko Dagwi Darwey ê sè a me negbey.

⁹Mê niri na shôm Dagwi Darwey, yaga ma ga ra a yɛ banɛn. Sɛ̌ a jut ha hom, na a ra shɔt yaga me. Ê nusu na me e negbey, mê di de a ga sey me.

¹⁰Ano vê repugu hom bê di, ko rekyen rê bang vemo de ba yang me, “Dagwi Darwey, Dagwi mo ma wɛ ɛ?” Bayis hom bê di gaba mɛn, e remo bê bɔrɔs hɛn e vwel sede bwɔrɔ̂k nehyok.

¹¹Jeng lɔ̂k jwâ gbɔng repomô Yɛrusalɛm à yemo! E jeng o bê gwɛ neyɛnɛ̂ vwel o pyak.

¹²E jeng o bemat mo behak bê vey na hwo e Yɛrusalɛm. Yi e Asirya vɔk e Misra, na yi e Misra vɔk e Gwɔrɔt Ɛifaratɛs. Yi e gworep vɔk e gworep, yi e raku vɔk e raku.

¹³Ko jey o yê tɛ́ ɛ gbingiring, yi na bemât sangal e yɛ, na yi na pyɛ́ de yɛn a ra.

¹⁴Sè lwêk bemat mo na gwele mo, kwarâ vyel gwô nedanelɔ mo, de gwa sangal nju gwɛ e rehwot e tê vwêl sehwey rat. Tik na ye re sehwey e Bashan na Gileyat, sede e jeng raane.

¹⁵Sede e jeng de yin à nusu yi e sevwêl Misra, mê dura a yin pyɛ̂ bes!

¹⁶Yére bemat jey yê di ko yê vo rekyen, mwa ano de ya vɔk reto pyak, yê tɛ̀ vɔ e nu, betong mɛn bê ye rip.

¹⁷Yê lɛ̄lɛ fongol sede gwɔ̄m, sede pyɛ̂ gabagâ jey, yɛn ê nusu na vow yi e bavɔng mɛn. Yɛn ê doyo vey na Dagwi Darwey, Dagwi mot na sáp, ko yɛn ê vɔk bengyip mo.

¹⁸Wà a sé Dagwi sede hwo, de hwó fugut banɛn, hwó hala burû bwang bemat mo de ba dal ɛ? Hwó vɔk shom mo gbak-gbak wɛt, yaga hwó tɛ̀ yey na tsak tɛ̂ yey mo.

¹⁹Hwô to wok nemwishish mot, hwô bɔrɔs neburu mot e nɛ̂n bol mo. Hwô bomos mwa banɛn mot, e nɛ̂n gworep.

²⁰Hwô dura tsak o mo na Yakɔp, na tsak tɛ̂ yey mo na Abraham. Sede remo de hwá sira a bedabeda mot, yi e jeng raane.