Read berom Nahum 1 Bible Online

Nahum 1 - berom bible

Nahum 1

¹Bwok-basâ negwi-ywey de Dagwi a dura a Nahum wo Ɛlkɔsh, ha sé hâ siitit e ra Nineve.

²Dagwi Darwey a sé Dagwi de e ra repugu na vemo de be ngyɛ̀nɛ hɛn na yɛ. E tala neves mɛn ko e shushu shom mɛ e ra yɛn Dagwi Darwey e tala vê repugu mɛ, ko shom me ye tē puu e ra vemo de be kyɛ́ ɛn hɛ.

³Dagwi Darwey e ra shom ziri wɛt, a vɔk reto pyak, ko e sang tik nà tabak mwat de a buru wɛt. Gwông kweres mɛ gwa sé e ji wula na gûl rwak, ko bale ba sé sede búm de gwa sé e nɛ̂n bol mɛ.

⁴E gyong gworep ko gwo pere hworok! E tɛ̀ nerɔt mwa ne ye jɔng. Hirî Bashan na Raku Karmɛl be hworos, ko cúyu Lɛbanɔn ye tē zùt.

⁵Beraku be digis e nuyêl mɛ, ko berahwol be tē ywey. Sevwel sé vow e nuyel mɛ, jey na bemât yɛ mwa be vow arɔng.

⁶Wa ê kyɛm a tumal a shom mɛ ɛ? Wa ê nàra kwen jeng de a sé tē puu na shom ɛ? Shom mɛ ye nunus sede balêm kya, ko pyɛ̂ mwa, vɔk e beta ye bunut hɛ e nuyel mɛ.

⁷Dagwi Darwey a sé rwat; A sé kwɔ̂n dâl bemat mɛ e jeng reyɔm. E bɛrɛng vemo de be jama kwɔ̂n lɛrɛ na yɛ.

⁸Ê wey na vê sogô nehywɛ na tɛmɛ-nshi, ko ê raa bol vê repugu mɛ vɔk e ji lwil.

⁹E nɛ̌ neves de yin e yong e ra Dagwi Darwey ɛ? Ê wey na pyɛ̂ mwa. Mwat e ra retek na yɛ, ko e dal zang hining na a wey na yɛ wɛt.

¹⁰Sede rɔgɔ, na shik, sede cugul cogot, kya hê re ɛn.

¹¹Ko di, à Nineve, mwat hwak a sé nusu yi e ji mo. A yong pyɛ́ vyes e ra Dagwi Darwey. A vos badu yapyi.

¹²Dagwi Darwey a ye: “Mwa ano de BeAsirya ba vɔk gap, ko ba sé pyak za wɛt, bê wey na yɛn, ko bê sè vit. À bemat hom, ma ga tak a yin, ko mê re nuyel na tak a yin wɛt.

¹³A remo mê kwɔrɔ swesêk vɔk berɔndɔng de ba kana tɛ̀ e rafwɔ min, ko mê tut ngyang de ba rɔgɔs hin mɛ.”

¹⁴Dagwi Darwey a ga nɔng redu remo e ra hwo “Hwô vɔk yére de yê re nuyel na reza mo wɛt. Mê wey na pyɛ̂ sekwit mwa yi e duk re fongol bedagwi mo. Ma sé yong sak yaga hwo, yaga hwà sé pyɛ̀ byɛm-byɛm!”

¹⁵Di, tom a sé kyè vey e ra beraku na yɛgɛt yat. A sé e gwong na a vey ha rehâ sangâl netyang! À yin BeYuda, ra in nzem min, ko sila hin sira min, yaga bemat beves bê sang to hwo e ra vwel min na como wɛt. Ba ga wey na yɛn mwa vit!