Read berom Nahum 2 Bible Online

Nahum 2 - berom bible

Nahum 2

¹Ba ga hwo o na como! Gyeng in nekwɔn dal min. Bɛrɛng hin gwong o naka. Gyiri hin naka yaga como. Tumal hin ting na gap min mwa!

²Yaga Dagwi Darwey ê toyo a Yakɔp na gbɔng nerat, de Israyɛl á vɔk raane, mwa ano de vê repugu ba ga kana jugu nɛ, ko ba ga kpírim batîn anap mɛn arɔng.

³Beruga bemât como mɛn ba sé besinang, ko yɛn a gyiri hɛn na yɔ̀m como de ye senge zoyong. Dyam bekyɛkyɛ̂ bedwa mɛn ye tē dɛbɛt, tuk de ba yɛnɛ yông vɛ gyat, bedwa mɛn be gyilsit.

⁴Bekyɛkyɛ̂ bedwa mɛn be kyě tele na yol e nehyok, be kyě gwɔsɔ bemajêy gbɔng repomo. Be kweres sede rewûk kyâ semwol, ko be rɛngtɛ sede gbara de wa ye dɛbɛt.

⁵Ba yila besuga mɛn de ba ga yóng ɛn yɛt, ba kyě tiris bol e gwong mɛn vɔk e hwomo. Ba tele dey-dey vɔk e jwa-pomo, ko ba wɔ̀ lɔk tyɔ̌n gang jwa-pomo.

⁶Tɛmɛ-nshi nà wuma ri ruhup ko lɔ gwɔ̀m ha rikta hɛ.

⁷Ba jut hwâ gwɔ̀m vɔk e de sesam. Behwông fwom mɛ ba tosho sede bèbɔp, ko ba tɛ̀ vɔ e fwɔ na lashê yey.

⁸Bemat ba tele ba nunus hɛn yi e Nineve, sede nshi de na takla yi e gworep de ba gang vwara mo. Ba dɛrɛ ba tang ɛn, “Tumal hin! Tumal hin!” Ko vit a hwak e ji mɛn de a toyo.

⁹Hashe hin dyam pyɛng mɛn! Hashe hin dyam shinang mɛn! Nepyak yɛ̄ na vɔk yɛnɛ wɛt! Gbɔng repomo mo ra sila na pyɛ̂ nedanerey!

¹⁰Ba ga wey na Nineve, ba ga hashe pyɛ̂ hɛ, ba ga hala hɛ fǒng. Neyey bemat na ga tē ywey na bengyip. Bakwot mɛn ba vow. A ga yang ɛn gbɛrɛk, ko bayis mɛn ba ga gaba vit.

¹¹Gbɔng repomo de rá sè sede fwarâ begukum raane a rɛ ɛ? Kwɔn de bá nɔngɔs ɛ nèy gukum pyɛ̂ re. Kwɔn de gukum rwas na hwā mɛ bá kyese sangsal ɛ, ko nèy mɛn ná sè e hwomo sana mwat de á yel.

¹²Gukum wá mɔbɔs ngyāma, ko wá hama a nèy wɛ cɛk o cɛk o pyɛ de yê vey a nɛ. Wá nɔ̂ng hwâ wɛ pyɛ de yê vey a wɛ arɔng. Wa sila kwɔ̂n sangal o na cɛ̂k nama.

¹³Dagwi Dâ Jey Mwa a ye: “Ma sé wo repugu mo. Mê tɛ̀ kya he re bekyɛkyɛ̂ bedwa mo. Bê mɔbɔs bemât como mo de ba sé sede gukum. Mê wey na pyɛ̂ jugu de hwà hashe sede gukum wo hashe pyɛ̂ re wɛ. Bê to wok fwɔ̂ betom mo wɛt.”