Read berom Nahum 3 Bible Online

Nahum 3 - berom bible

Nahum 3

¹Gawey e ra gbɔng repomo mo de ra ga lusha nemi pyak. Ra kat ragas bɔs, ra sila na nezap pyɛ̂ jugu, na pyɛ́ detidetu de ba hashe.

²Wet in betong! Wok in bezining de be taksal, bol bekyɛkyɛ̂ bedwa de be wus, bedwa de be kyɔ́rɔk, bekyɛkyɛ̂ bedwa de be kyě gyilsit!

³Bemât comô bedwa ba yi na yol, bewal be tē bwerep, bebara be nɛp! Nepyak bemat de ba kushu, na bagwɔ̂t bavin. Bemat de ba ga kushu vit a basa, be kyě tiris bol e ra vɛ!

⁴Pyɛ́ yemo mwa ya sé yaga na be tabak mɛ̀ gbɔng repomô Nineve de ra sé sede devwes de wa sé zɛrɛ mo, ko wó hwɔlɔ bemat vey na wɛ na nezɛrɛ̂ nejwâng wɛ. Wá dɔnɔ yerê bemat jey na mɛlɛ̂m nu.

⁵Dagwi Darwey, Dâ Jey Mwa a ye: Ma sé wo repugu mo! Mê hywɛrɛm hwo na me dura a yére bemat jey nekpimit mo, na bemât segwɔm jey be di rekyen mo arɔng.

⁶Mê liring hwo na serwik, mê shɛgɛsh hwo, mê tɛ̀ hwo sè pyɛ byɛs.

⁷Mwa vemo de ba di o bê ye lot, bê to ɛn na bama. Yɛn ê ye, “Nineve wa ga tɛ́ ɛ barin. E wa de ê tosho wɛ arɛt? E wa de ê simo na a wɔrɔk wɛ ɛ?”

⁸À Nineve, hwà dal Tebes, gbɔng repomô segwɔm Misra a? Ra vɔk Gwɔrɔt Nil de gwa gyep rɛ sede jwâ-pomo.

⁹Etiyopya na Misra yɛn vɛ a gâp rɛ vit a yɛnɛ mo. Put na Libya ba sé e ji bavwel de ba ra gafiri na rɛ.

¹⁰Mwa ano, ba re Tebes na como, ko ba hashe bemat o vɔk e de sesam. Ba tugut nèy rɛ, ba mɔbɔs nɛ̀ e kahɛ kwɔn. Ba masa sesek e ra begbɔng bemât rɛ na be jut ɛn sede besam, ko ba rɔgɔs hɛn na ngyang.

¹¹À Nineve, ê yang o bùrum sede mwât sefeng, ko hwô wɔ jama kwɔ̂n lɛrɛ na bemât repugu mo.

¹²Nekwɔn dâl bemât como mo nê sè sede batin regwi de nèy o na ga vel — sede ba dugut cɔ́gɔt o, ko nèy o nê gabsa e nu mwat dugut o!

¹³Bemât como mo ba sé sede beha, ko vit a pyɛ de ya dul vwel mo e nuyêl bemât repugu mo, yaga kya ha rɔda re becwang de ba tɛ̀ gàp e ri ruhup mo.

¹⁴Vos in nshi gyam na be vey gwɔrɔ repomo min o na como! Gwɛ̌ lɔk in nekwɔn dal min na gap! Yong in bagat bwos — jut in cɔgɔ̂t lɔk o, ko luk in sebwos o!

¹⁵Kya hê re in, bê wey na yin na wal e de como sede rawal. Yin a ga gwɛsɛ nepyak min sede rawal.

¹⁶Yin a vɔk bejik pyak sede netangacɛn e lagwi. Ko a remo, rawal o wa ga wuma babok wɛ, ko wa ga tele nedem wɛ.

¹⁷Bemât nuyel min ba sé sede rewûk rawal, de re sangal e ra yép, jeng de jey ya sumal, ko jeng de gwi gwa ta, ko re sogo re kyè. Vit a mwat de e tɔk kwɔn de ra kyè vɔk ɛ.

¹⁸À hwo Da vwel Asirya, begbɔng bemat mo ba sé nevwa, ko sana belek, bemat mo ba ga shara hɛn e ra beraku, ko vit a mwat de ê to tula hɛn.

¹⁹Vit à pyɛ de yê tɛt nepêp ram mo — rê vel wɛt. Mwa bemat de bê wok rehâ wey na hwo ê yang ɛn yɔɔt, yaga hwà ga tak a yɛn mwa ding-ding.