Read berom Habakuk 1 Bible Online

Habakuk 1 - berom bible

Habakuk 1

¹Hâ siitit de Dagwi Darwey a ha a Habakuk, zarap mɛ sede e ji negwi à hemo:

²À Dagwi Darwey, mê ros e rɛ̌ e de yila hwō ko hwà wok me wɛt ɛ? Mê ros e rɛ̌ e de tosho vey na hwo yaga yol ko hwà sey ot wɛt ɛ?

³Yaga sɛ́ de hwó tɛ̀ me bɛrɛng neves ɛ? Yaga sɛ́ de hwó niri na reyɔm ɛ? Wey na yol de ya gwɔrɔ me. Tô cuna na nenan na ga sogo e kagwa.

⁴Badu ba vɔk gap wɛt, ko be sang ra shɔt na tsak o wɛt. Vê neves be di wɛng e ra vê cik, yi ano be lashe shɔt.

⁵Dagwi Darwey a toyo a yɛ: Bɛrɛng hin yére bemat jey ko yin a rɔda langat hin pyɛ de yin ê di. Ma sé kyè wɔ̀ ra pyɛ cak e jeng min, yemo de yin ê sey tsak o na yɛ wɛt jeng de yin a wok hâ yɛ.

⁶Mê gwɛ retô BeBabilɔn de bemat be wok bengyip mɛn, yɛn e sǎ yaang wɛt. Yɛn e kyě gwɔsɔ jey, na be ye màk à bavwel de ba sé bemɛn wɛt.

⁷Yɛn e kyě tɛ̀sɛ bemat be vow, Yɛn e ragas pyɛ́ de yey mɛn ye simo, yɛn e dak kaa na nerey mɛn.

⁸Bedwa mɛn be dal cwēy na tele pep, be dal bebwá na nɔ̂ng bengyip nawiri. Bemât comô bedwa mɛn be yis na tele — be yis yikyik. Be yis na tele sede bekim — be hwo e ra pyɛ de bê re.

⁹Bemât como mɛn be yi na yol. Kawɛ mwat e ji bapomo mo e tɛ̀ bengyip sizɔng. Yɛn e tula besam pyak sede gwɔ̂t bazɛk.

¹⁰Begbɔng begwɔ̀m ba sé a yɛn pyɛ wɛt, ko yɛn e byɛs bemât badu mɛn. Yɛn e byɛs kwɔ̂n dâl de hê dul ɛn nà re pomo, yɛn e tula gwofongol e ra jwâ-pomo na be yel be re rɛ.

¹¹Ko yɛn e yishing rɛ sede wúla, be kwey nedem mɛn, Yɛn a sé bemat de ba ga buru. Yɛn a tɛ̀ ci mɛn yɛ à gap mɛn.

¹²Habakuk a to ye, “À Dagwi Darwey, yi e susu mo hwà sé Dagwi. Hwo wɛ à Dagwi hom, wo jɛrɛ, wot ê kushu wɛt. À Dagwi Darwey, hwà ga tɛ̀ BeBabilɔn be ra shɔt. À Gwofwa e hwo de hwà tɛ̀ ɛn be tabak bemat.

¹³Hwà sé jɛrɛ ding-ding, bayis mo be bɛrɛng pyɛ́ vyes e ji bemat mo. Hwó tɔk niri na reyɔm wɛt. Hwô sǎ e de niri na bemât kwɛlɛng vemo ano wɛt.” Hwô sǎ e de saa yuu-yuu wɛt jeng de vê neves bê wɔlɔk vê cik.

¹⁴Hwó tɔk tik be teshe na bemat sede betɔk gworep, be tele gushuk, vit a vɛ na mwât nuyel.

¹⁵BeBabilɔn be vos bemat sede betɔk na begúk be hwɔlɔ hɛn sede betɔk na segun. Yɛn e tula hɛn na sòro sede ngyāma, yi ano, yɛn e ra pee ko be vɔk yey pyɛng!

¹⁶Yaga ano, yɛn e nára a ci mɛn de ya sé sede bagun, nɔrɔ̂ yas, ko be rangas a yɛ̄ de ya sé sede soro nɔrɔ̂ pyɛ̂ nesang hyɔɔlɔl. Yaga bagun o be vɛ̀sɛ a yɛn na pyɛ̂ nedanerey tanga pyɛ̂ re pyak de ya dal na nerat.

¹⁷Yɛn ê re nuyel e de râ fwom na bagun mɛn nesheneshey, na yɛn a sǎ e de weres na yére bemât jey sana toshô reyɔm mɛn a?