Read berom Habakuk 2 Bible Online

Habakuk 2 - berom bible

Habakuk 2

¹Mê tumal e kwɔ̂n bɛrɛng nekanang hom, na me sè e kwɔ̂n dûl repomo. Mê gyeng na me wok pyɛ de Dagwi Darwey ê ha a me, tanga pyɛ de ê toyo a me mɛ yaga gwɔrɔng de ma ga ra a yɛ.

²Dagwi Darwey a toyo a me ngan: “Jɛk pyɛ de mê dura a hwo wɛshɛrɛk e ra beta bagasak, yaga na be tɔk basa yɛ naka.

³Yaga jeng de pyɛ de ma dura mo yê sila ya rɔngɔl e ngyen. Di, jeng o ya sé kyè vey sila dey-dey, yê sè bɔs wɛt. Ê sè a hwo sede jeng o ye kyè dey wɛt, ko tik na hwo gyeng yɛ, yê vey mwin, ko yê rɛn ɛ wɛt.

⁴Di, bemat de ba sé beves bê dal wɛt, ko vemo de ba sé cik bê nàra beken, yi na sêy tsak o mɛn.”

⁵Gawey e ra bemât kwɛlɛng, bemât dak kaa, be tɔk ye jop e kwɔn hining wɛt. Pyɛ́ ye vey a yɛn wɛt, sede sak. Yɛn a sé sede reku de re sirik wɛt. Yɛn e tula á to mɛn yére bemât jey mwa, ko yɛn e yɛt bemat o mwa sede bwal mɛn.

⁶Mwa yére bemât jey bê ha cīnat neha e ra yɛn bê lɛ̄lɛ hɛn ngan: “Gawey e ra yin de yin a ga hashe pyɛ́ de ya sé myin wɛt. Vɔk e yɛ̌ jeng de yin ê re nuyel na tɛ́ in bedaberey yi na tɛ́sɛ bemat be talsa hin pyɛ́ de yin a hwɔpɔs a yɛn ɛ?”

⁷Remo-remo bemat de yin e rangal hɛn badu, bê sogo e ra yin na shom. Vemo de be rangal hin badu bê sene ko be tɛ̀ yin vow na bengyip. Yin ê tɛ́ in pyɛ̂ jugu mɛn!

⁸Yin a ga hashe pyɛ̂ yére bemât jey pyak, ko bwang bemât repugu min o de ba dal, bê hashe pyɛ́ min, yaga nepyak bemat de yin a mɔbɔs, na yaga yol de yin a ra a jey mwa, na bapomo mɛn tanga bemat de ba sé sangal e ji vɛ.

⁹Gawey e ra yin de yin a ga tɛ̀ belɔ min be tɛ́ ɛn bedaberey na nejik mɔ̂t bemat, ko yin a ga lɔk nelɔ min e rak o yaga na yin a hywit in yi e pyɛ de yê mǎ hin!

¹⁰Yin a ga vey a belɔ min na rekyen, yi na wey na yére bemât jey pyak, yin a ga vey na gawey e ra bato min arɔng.

¹¹Beta nelɔ mo mwa bê dak sekun na yin, ko cɔ́gɔt-kâk nelɔ mo yê dopɛ e de sekun o.

¹²Gawey e ra yin de yin a bomo retîs repomo min e ra neves, ko yin a lɔk rɛ na nemî bemat.

¹³A sé e Dagwi Darwey Wo Reto Mwa de a tɛ̀ bemat be sɔ reyɔ̂m fwom, ko kya he re kayɛ pyɛ de yɛn a ga ra, ko yére bemât jey yé yɔ́m ɛ zɔng wɛt a?

¹⁴Ko jey mwa ya rɔda sila na tɔ̂k gbɔng nerât Dagwi Darwey, sede nshi na sila gworep.

¹⁵Gawey e ra yin de yin e tɛ̀sɛ bemât vwara min be sɔ nshî anap. Yin e shusha a yɛn nɛ sɛ̌ na vo ɛn, na yin a bɛrɛng nekpimit mɛn.

¹⁶Ko di, yin ê vo rekyen sizɔng e tô vɔ̂k gbɔng nerey. Sɔ in, na yin feng, kyě tē in dèndes. Dagwi Darwey ê tɛ̀ yin sɔ keshi. A sé jeng o myin na yin sɔ keshi tabak ke Dagwi Darwey. Ko gbɔng nerey min nê tɛ́ ɛn a yin rekyen.

¹⁷Bê tow in sede cɔ́gɔt Lɛbanɔn, ko be yɛt in sede ngyāma, yaga nepyak bemat de yin a mɔbɔs, na yol de yin a ra a jey mwa, na bapomo mɛn tanga bemat de ba sé sangal e ji vɛ.

¹⁸Ci ya vɔk nerât sɛ́, a remo de mwat a yong yɛ na vwɔ mɛ ɛ? Ya sé pyɛ de ba yong na dyam, pyɛ de ye basa a bemat hâ mwin wɛt. Yaga mwat de a yong yɛ e tɛ̀ gap mɛ e ra pyɛ de a yong o, mwa ano de ye tɔk ha wɛt!

¹⁹Gawey e ra yin de yin e yâng cɔgɔt, “Sene!” Kɛ yin yâng gwofwa, “Sogo!” Ci yê tɔk basa a yin pyɛ cak a? Di, ba ga lolom yɛ na dyam shinang kɛ dyam pyɛng, ko mwa ano, vit a nesong e ji yɛ.

²⁰Dagwi Darwey a sé e Gbɔng Duk Re Fongol mɛ wo jɛrɛ, tik na kawɛ mwat e jey a sǎ yuu e nuyel mɛ!