Read berom Tsefanya 1 Bible Online

Tsefanya 1 - berom bible

Tsefanya 1

¹Ha de Dagwi Darwey a ha a Tsefanya Kushi Gedaliya Amariya Hɛzɛkiya, e jeng negwɔm Yɔsiya Amɔn, gbɔng gwɔ̀m Yuda à hemo:

²Dagwi Darwey a ye, “Mê yishing kayɛ pyɛ e jey.

³Mê yishing bemat na ngyāma mwa, mê yishing benon lagwi, na betɔk gworep. Bemat beves bê gaba, jeng de ma wey na bemat mwa yi e jey.

⁴Mê nára vwɔ̂ yol hom e ra BeYuda tanga e ra bemat mwa de ba sangal e Yɛrusalɛm. Mê gangas bwang bemât Baal de ba pɔl e kwɔn o na bazâ bepiris mɛ.

⁵Yɛn vemo de be tē guduruk e ra beragyip nelɔ mɛn, na be re a netangacɛ̂n lagwi fongol, na vemo de be tē guduruk na be sisa na rezâ Dagwi Darwey, ko be to sisa na rezâ Molek arɔng,

⁶na vemo de ba ga doyo yi e de raà Dagwi Darwey, ko yɛn e to jama hɛ, kɛ be rangal reha mɛ wɛt.

⁷Sǎ hin yuu e nuyêl Darwey Dagwi Darwey! Yaga jeng Dagwi Darwey ya ga vey bagat. Dagwi Darwey a ga yong nɔrɔ̂ yas de be rangas, ko a ga tik jaram bemat de a rini hɛn narâ nɔrɔ mo.

⁸E jeng narâ nɔrɔ̂ Dagwi Darwey o, mê tabak bemât nuyel na nèy bewên gbɔng gwɔ̀m, tanga mwa vemo de be raa negwɔn bemât yére dyuk.

⁹E jeng o, mê tabak vemo de be re a pyɛ̂ sekwit fongol, na vemo de be sila duk rê fongôl bedagwi mɛn na pyɛ̂ shigi na yê kwɛlɛng.”

¹⁰Dagwi Darwey a ye, “E jeng o, bê wok sesin yi e Ruhûp Betɔk, na dâk sekun yi e Majey Pwas, tanga wûs beta de be gabsa yi e beraku.

¹¹Dak in sekun, mwa yin de yin a sé sangal e Nɛk Rɛsɛl Pyɛ́, yaga bejik min mwa ba ga wey. Ko vemo de be ra nejik na dyam pyɛng ba ga wey vit arɔng.

¹²E jeng o, mê kyě ngyɛgɛt Yɛrusalɛm na bekywa-kya, na me tabak vemo de be sangal bɛs. Yɛn vemo de be tē e neyey mɛn, ‘Dagwi Darwey ê ra pyɛ cak wɛt, kɛ ryat o kɛ vyes o.’

¹³Bê hashe pyɛ̂ nedanerey mɛn, ko be gangas nelɔ mɛn. Yɛn ê lɔkɔs nelɔ, ko yɛn ê sangal e ji nɛ wɛt. Yɛn ê tus hirî anap, ko yɛn ê sɔ nshî mo wɛt.”

¹⁴Gbɔng jeng Dagwi Darwey ya ga vey bagat, ya sé bagat, ko ya sé kyè vey dey-dey. Wûs jeng vêy Dagwi Darwey o ha sé ves tyɔng wɛt, suga ê ba tosho ding-ding.

¹⁵Jeng o yê ba sè jeng shom vyes, jeng reyɔm na ye rezot, jeng wey, na ye lashê pyɛ́. Jeng mwangalang, na ye sangal yɔɔm, jeng bale, na ye wut de wa man sedesi.

¹⁶Jeng pɛsɛ̂l durûm como na yê môk yɛ, e ra bapomo de ba gwɔrɔ vɛ na jwa, na tyɔ́n bato-kwɔng arɔng.

¹⁷Mê vey na reyɔm o e ra bemat o, ko yɛn ê kyě ra kekap sede bebók, yaga yɛn a ga ra a Dagwi Darwey banɛn. Bê losho nemi mɛn sede fongol, ko banama mɛn sede beving.

¹⁸Dyam pyɛng na dyam shinang mɛn yê tɔk viri hɛn wɛt, e jeng shôm Dagwi Darwey. Kyâ repugu mɛ, hê re jey o mwa hywiri, yaga ê wey na mwa vemo de ba sé e ji jey dey-dey.