Read berom Tsefanya 2 Bible Online

Tsefanya 2 - berom bible

Tsefanya 2

¹À yin yerê bemât jey de vit a hin na rekyen! Tula hin, tula hin mwa!

²Gyam na be pɛsɛl hin sede byɛmɛ, gyam na nepêp shôm Dagwi Darwey ne hwo e ra yin, gyam na jeng shôm Dagwi Darwey ye vey e ra yin.

³Jama hin Dagwi Darwey, à yin de yin a dyɛng bato min e ji jey. Yin de yin e ra pyɛ de a nɔng in nu e ra yɛ. Jama hin necik, jama hin dyɛ̂ng to, gyeng jeng shôm Dagwi Darwey yê kwéy in.

⁴Bê hala repomô Gaza hal, ko Ashkɛlɔn wô tɛ́ ɛ barin, Vey e tê-gwi, bê ro bemat mwa yi e Ashdot, ko bê wey na Ɛkrɔn sede ba lùt cɔgɔt.

⁵Gawey e ra yin BeKereti de yin a sangal e kwogôm gworep! Hâ Dagwi Darwey hemo ha sé e ra yin! À Kanaan, vwêl BeFilisti, mê wey na yin, ko bê tɛt ɛ mwat hwak wɛt.

⁶Vwel de ha sé e kwogôm gworep hê tɛ́ ɛ kwɔ̂n gyengês yas, kwɔn de belek bê gyenges ɛ vyēl mɛn, na kwɔn de bê lɔkɔs ɛ kara vyēl o arɔng.

⁷Hê tɛ́ ɛ hê bwang bemât yerê Yuda ko yɛn ê sè kwɔ̂n gyengês yas e hwomo. Nawiri, yɛn ê pɔlɔs e nelɔ BeAshkɛlɔn, yaga Dagwi Darwey, Dagwi mɛn ê gyeng ɛn, ê to toyo a yɛn na nerat mɛn.

⁸Ma ga wok lɛlɛ BeMowap na byɛnɛ̂ng BeAmɔn, de be lɛ̄lɛ bemat hom, ko yɛn e dak kaa, bê re vwel o.

⁹Yaga ano, Dagwi Darwey, Dâ Jey Mwa, Dagwî Israyɛl a sira hɛ a ye, “Mwin, Mowap wô sè sede Sɔdɔm, ko BeAmɔn bê sè sede Gɔmɔra be sè kwɔ̂n batîn rɔgɔ, na bavɔng nevwashe, bê sɛ̀ pyɛ́ e vɛ wɛt nesheneshey. Bwang bemat hom bê wɔ̀ jugu vɛ, ko yerê bemât jey hom de ba dal bê vɔk vwel o hɛ tɛ́ ɛ nap mɛn.”

¹⁰Pyɛ́ de bê tala hɛn mɛ yaga dâk kaa mɛn a yemo, yaga remo de yɛn a byɛs bemât Dagwi Darwey, Dâ Jey Mwa, ko ba to haras a yɛn.

¹¹Dagwi Darwey ê tɛ̀ yɛn a vɔk bengyip mɛ, jeng de a wey na bedagwî vwel o mwa. Ko bemât yére bemât jey vê kawɛ bak bê re a yɛ fongol, kavɛ mo e kwɔ̂n sangal mɛn.

¹²“À yin BeEtiyopya, yin arɔng, bê wey na yin na wal hom.”

¹³Dagwi Darwey ê nára vwɔ̂ yol mɛ e ra bavwêl rwa bato arɔng, na a wey na vwêl Asirya. Ê wey na gbɔng repomô Nineve he tɛ́ ɛ barin, hê to sè gbingiring sana nshi arɔng.

¹⁴Karâ vyēl na berɔndɔng bê dyɛngɛs e hwomo, tanga kayɛ yére ngyāma arɔng. Benon beraku na beying-gyi bê sangal ɛ naturuk. Ying-gyi yê tosho yi e bapɔk bègɛt duk o, ko behwǎk e ri mo. Ko babîm cɔ́gɔt sida de ba kana yong mɛ beduk o bê hala vɛ dɛdɛrɛng e jey.

¹⁵Pyɛ ma yemo de yê té na gbɔng repomo de ra dak kaa na retô rɛ, de ra kana bare pyɛ cak yê té na rɛ wɛt. Ra tē e barê yêy rɛ, “E me zɔng — vit à hak sede me!” Repomo mo ra ga tɛ́ ɛ gbɔng barin, kwɔ̂n sangâl ngyāma! Bemat mwa de be kwey rɛ be té cwɛ̀ɛp, be zigim bato mɛn zɔng.