Read berom Tsefanya 3 Bible Online

Tsefanya 3 - berom bible

Tsefanya 3

¹Gawey e ra gbɔng repomô Yɛrusalɛm, de re ragas sogsô nehywɛ, ra sé ríshik-rishik, ko re tak a bemât rɛ!

²Re tɛ̀ tong na hâ mwat hwak wɛt, ko re wok tabak arɔng wɛt. Re tɛ̀ gap e ra Dagwi Darwey wɛt, ko re wɔ bagat na Dagwî rɛ wɛt arɔng.

³Bemât fwôm re ba sé sede begukum de be lulum. Bemât shɔt re ba sé sede bebwá nawiri, ko be tɛt ɛ pyɛ cak vɔk e nagasi wɛt.

⁴Bezarap Dagwî rɛ be paa kwas, ko be mɔt bemat. Bepiris mɛn be tɛ̀ pyɛ̂ jɛrɛ ligis, ko yɛn e gyilsit Badu Dagwi.

⁵Mwa ano, Dagwi Darwey wo cik a sé e ji rɛ, ko e sang ra pyɛ́ de ya buru wɛt. Kanɛ nagasi, e gas a bemat mɛ badu e tē, e ra ano kahɛ yé gbey jey. Ko mwa ano, bemat bevês rɛ, be vo rekyen wɛt.

⁶Dagwi Darwey a ye, “Ma ga wey na yére bemât jey vit. Tyɔ́n dal mɛn yê bato-kwɔng ya ga tɛ́ ɛ barin. Ma ga tik nehyok mɛn hal, vit a bemat de be kweres ɛ. Ba ga wey na bapomo mɛn, bemat o ba ga kyè, vit a mwat de a tɛt ɛ e vɛ.

⁷Ma ye, ‘Mwin bemat hom bê wok bengyip hom, bê sey tabak hom, yɛn ê sang ye bam a pyɛ de ma ga kana basa a yɛn wɛt.’ Ko mwa ano, yɛn a re nuyel na râ negwɔn neves.”

⁸Dagwi Darwey a ye, “Yaga ano, gyéng me hin tyɔng, gyeng jeng de mê sogo sede mwât nuha. Ma ga tɛ̀ e yey hom na me tula yére bemât jey, na vê segwɔm detidetu, na me shushu shom hom e ra yɛn, na mwa nepêp lashê yey hom. Yaga kyâ repugu hom hê re jey o mwa.

⁹E bama mo, mê sege lêm yére jey na ye ha ha rat, yaga na ye yila e ra rezâ Dagwi Darwey zɔng, na ye ra a yɛ fwom na yey rining arɔng.

¹⁰Vê re a me fongol yi e nuyêl bègwɔrɔt Etiyopya, mwa ano de ba ga shara hɛn yikyik, ko yɛn ê ba vey nɔng me nenɔrɔ detidetu.

¹¹E jeng o, yin ê ba vo rekyen wɛt, yaga mwa tomong ves de yin a sogo a me mɛ nehywɛ. Yaga mê pat yi e tē min vemo de be dak kaa mɛn na yey pyɛng. Yin ê sang to paa kwas e ra raku hom wo jɛrɛ wɛt.

¹²Yaga mê tik e tē min vemo de be dyɛng bato mɛn na vê nehywɛ. Yɛn bê jama kwɔ̂n dal e ji rezâ Dagwi Darwey.

¹³Bwang vemo de ba tɛ̄t ɛ e ji BeIsrayɛl bê to ra pyɛ cak vyes wɛt. Yɛn ê to ha bɔs kɛ hâ kwɛlɛng wɛt. Yɛn ê re pyɛ́, be dyɛngɛs tyang, ko vit a mwat de ê tɛ̀ a yɛn bengyip.”

¹⁴Moklo lwɛlɛ, à yin bemat hom vê cik e Siyɔn. Ye ngyat, à hwo Israyɛl! Shɛgɛsh na yey min mwa, à yin bemat hom vê cik e Yɛrusalɛm!

¹⁵Dagwi Darwey a ga gáng a hwo tabak mo, A ga ro a hwo vê repugu mo. Dagwi Darwey, Gbɔng Gwɔ̀m Israyɛl a sé e tē mo. Hwô sang to vɔk bengyip wɔgɔ, pyɛ cak yê mǎ hwo wɛt.

¹⁶E jeng o, yɛn ê ye e Yɛrusalɛm. À Siyɔn, hwo wok bengyip wɛt, hwo hala vɔ mo dɔshɔk wɛt!

¹⁷Dagwi Darwey, Dagwi mo a sé e tē mo. Ê se suga de e di wɛng. Ê vɔk yey pyɛng sizɔng na hwo. Ê to turu hwo na tɛ̂ yey mɛ. Ê vɔk yey pyɛng na hwo na râ lwɛlɛ. Sede e jeng nzem.

¹⁸Dagwi Darwey a ye, “Mê pát a hwo lashê yey, ha sé pyɛ byɛs na ye sedusa e nuyel mo.

¹⁹E jeng o, mê teshe na vemo de be mɔt o. Mê sey ɛ vê nà bol, na me to tula vemo de ba ga kyini hɛn. Mê tɛ̀ be somo hɛn, na be nɔng ɛn nerey, e mwa bavwel de ba ga kana tɛ̀ a yɛn ɛ rekyen.

²⁰E jeng o, mê to tula hin, na me toyo na yin e lɔ e jeng o. Mê tɛ̀ be nɔng in nerey, na be somo hin e ji bemât jey mwa, jeng de ma to toyo a yin na nerat min mwa e bayis min.” Dagwi Darwey a ha ano.