Read berom Hagai 2 Bible Online

Hagai 2 - berom bible

Hagai 2

¹E tuk hê kuru baba na hɛ hining (21) hê pwɛl de gwa raa, Dagwi Darwey a to nɔng Hagai, zarap mɛ, há vɔk na Zɛrubabɛl, gwɔmna Yuda, na Yɔshuwa, darwêy bepiris, tanga bwang bemat o mwa. Ano Hagai a yang ɛn,

³“E wǎ e ji min de á kana di nerât Gbɔng Duk Re Fongol wo raane arɛt? Yin a di, wa sé e rɛ a remo de ba sé yong ɛ? Bê tyɛngrɛ wɛ na woro wɛt.

⁴Ko di in, ma sé ye, ‘À Zɛrubabɛl, vɔk yey ting! À Yɔshuwa, darwêy bepiris hom, vɔk yey ting! À yin bemât sevwel semo mwa, vɔk in yey ting! Rá in fwom, yaga me, Dagwi Darwey Dâ Jey Mwa, ma sé tanga yin.’

⁵Jeng de yin á nusu yi e sevwêl Misra, ma sira na me se tanga yin, ko Gabik hom ha rɔngɔl na yin. Yin vɔk bengyip wɛt.

⁶“E ji jeng tyɔng, ma rɔda dugut lagwi na jey, gworep na vwel.

⁷Ma rɔda dugut yére bemât jey mwa, ko bê vey na pyɛ̂ nedanerey mɛn e ngamo, ko ma rɔda sila duk rê fongol womo na gbɔng nerat.

⁸Yaga mwa dyam pyɛng na dyam shinang ya sé nyang.

⁹Nerât gbɔng duk o na rɔda dal ne raane. Ko ma rɔda nɔ̂ng bemat hom e kwɔn hemo sangâl netyang. Me, Dagwi Darwey, Dâ Jey Mwa, ma ha ano.”

¹⁰E tuk hê kuru baba na hɛ naas (24) hê pwɛl gwô shanetat, Dagwi Darwey Dâ Jey Mwa a yâng Hagai, zarap mɛ, a rangal bepiris pyɛ de badu ba ha e ra pyɛ́ yemo ngan:

¹²“Ka sede mwat hwak a jut renama de ba ga tik jaram yi e yas de ba ga nára nɔrɔ yɛ vɔk na Dagwi e ji fap rugu mɛ, ko ba ra kpam-tuk, kɛ seleng, kɛ nshî anap, kɛ něy, kɛ kayɛ pyɛ re cak na rugu mo, pyɛ́ mo yê tɛ́ ɛ jaram yaga Dagwi arɔng a?” Bepiris ba toyo a ye, ba ye, “Wey.”

¹³Ko Hagai a to ye, “Ka sede mwat a ra revîn mwat, a tɛ́ ɛ ligis, ko a ra cak e ji pyɛ́ yemo, ko yê tɛ́ ɛ ligis arɔng a?” Bepiris ba to toyo a yɛ mɛ, ba ye, “Ey, yê tɛ́ ɛ ligis arɔng.”

¹⁴Ko Hagai a yang ɛn, “Dagwi Darwey a ye, ‘A sé tyɛng ano na bemât sevwel semo: kayɛ pyɛ de yɛn a ra, tanga kayɛ pyɛ de yɛn a nára nɔrɔ̂ yɛ, ya sé ligis e bayis hom.’

¹⁵“Ko e ngamo nuyel pyɛ́ ya rɔda tɛ́ ɛ naka. Gyam na yin a hwo yong Gbɔng Duk Re Fongol o,

¹⁶ka sede mwat a wɔ̀ sɛ̀ hwôl pyɛ́ de ba ga tula e gazu, ko e bare, yê sè neshǐ masa kuru baba (20), ko ê de sɛ̀ nɛ kuru (10) zɔng. Mwat hwak ê wɔ e gwokwɛngɛ, na a wɔ̀ vɛ bètus kuru batungun (50) ve nshî anap, ko ê wɔ̀ vɛ kuru baba (20) zɔng.

¹⁷Ma tɛ̀ serɔ̂ fongol swì sē hwo e ra batô yara min, na hê vungu, tanga fwala, na me lashe fwôm vɔ min, ko mwa ano, yin a simo toyo vey na me wɛt.

¹⁸Yunung, tuk hê kuru baba na hɛ naas hê pwɛl gwô shanetat, hɛ a tuk de bá yɛnɛ bomô retîs Gbɔng Duk Re a me Fongol. Di in, pyɛ́ de ya rɔda té e ngamo nuyel:

¹⁹Bwang yére pyɛ́ cak ya rɔngɔl e gban min wɛt, ko retîn anap, na rê regwi, na rê pomigiranet tanga rê pwat ba ga mara nèy e ngyen wɛt, ko mwa ano, yi e tuk hemo, ma rɔda tɛ̀ nerat e ra yin.”

²⁰Dagwi Darwey a to ha na Hagai, ha hê neba e tuk o, a ye,

²¹“Yâng Zɛrubabɛl, gwɔmna Yuda, ma rɔda dugut lagwi na jey.

²²Ma rɔda gangas beta segwɔm, ko mê sey ɛ retô begbɔng begwɔ̀m vê yére dyuk. Ma rɔda tɛ̀ bekyɛkyɛ̂ bedwa be gabsa mwa na bemât gangas vɛ. Bedwa ba rɔda gabsa, be kushu, ko bemât lagsa vɛ ba rɔda mɔbɔs bemɛn na bewal.

²³“Dagwi Darwey Dâ Jey Mwa a ye, ‘E tuk hane ma rɔda jut o, hwo se mwat hom Zɛrubabɛl Sheyaltiyel, yaga ma ga kasa hwo. Ma rɔda nɔng o reto hom. Ko hwà rɔda sè a me sede yɔbɔ̂ tô gwɔ̀m. Me, Dagwi Darwey Dâ Jey Mwa, ma ha ano.’ ”