Read berom Zɛkarya 1 Bible Online

Zɛkarya 1 - berom bible

Zɛkarya 1

¹E pwɛl gwô rwit gwô shey hê neba de Dariyus á sè Da vwel Pɛrsya, Dagwi Darwey a ha na Zɛkarya hwêy Bɛrɛkya hwêy Ido, zarap mɛ.

²A yang ɛ, a ha a BeYuda ngan: “Me, Dagwi Darwey, Dâ Jey Mwa, má vɔk shom sizɔng na bedabeda min. Ko a remo, ma sé yang in, yin toyo vey na me, ko me arɔng ma rɔda toyo vey na yin.

⁴Yin raa begwong bedabeda min wɛt. Raane, bezarap hom bá ha a yɛn ha hom wɔgɔ, yɛn a doyo yi e neves mɛn, na yɛn a tik ragas neves. Ko yɛn á wɛt betong na ha hom, kɛ yɛn á gyeng hɛ wɛt.

⁵Bedabeda min o a vɛ a remo ɛ? Bezarap vane mo ba ka nàra gbak-gbak arɔng wɛt.

⁶Ko neha ná tusa de ma ha yi e nû bezarap hom na ga sila hɛn na bedabeda min. Yi ano, yɛn á doyo yi e banɛn mɛn, ko yɛn á ha wɔgɔ, Dagwi Darwey, Dâ Jey Mwa, a ga tabak hɛn tyɛng na neves de yɛn a ga ra, sede remo de a ga tɛ̀ e yey mɛ, na a ra a yɛn.”

⁷E tuk hê kuru baba na hɛ naas (24) hê pwɛl Shebat, gwɛ a pwɛl gwô kuru na gwɛ gwining, Dagwi Darwey a ha na me na negwi-ywey nabwalak. Ma di mwat hwak e ra dwa de wa sé zà swinang. A sé tumal e batîn gbirin bahak e ji nɛk, ko e bama mɛ, bemât bedwa behak bá sè arɔng, ko bùm bedwa mo bá se zà swinang, na zà, tanga rɔgɔ.

⁹Ma rangal tom-lagwi de a dopse misang a me pyɛ́ de me bɛrɛng, ma ye, “À da, e beva a bemât bedwa vemo ɛ?” Ko a yang me, “Mê ha a hwo.”

¹⁰Ko mwat de a sé tumal e batîn gbirin o, a toyo a me, a ye, “A sé e vɛ de Dagwi Darwey a tomo, na be di pyɛ́ de ya sé kyě té e jey.”

¹¹Ko bemât bedwa mo ba ha na tom-lagwî Dagwi Darwey de a sé tumal e batîn gbirin o ba ye, “Wot a ga wɔ̀ di pyɛ́ de ya sé kyě té e jey o, ko di, jey o mwa ya sé yuu-yuu.”

¹²Ko tom-lagwi o a yâng Dagwi Darwey, “A Dâ Jey Mwa, hwà ga ra shom na Yɛrusalɛm tanga bwang bapomô Yuda neshey kuru bataama (70) a remo. Ê to gwɛ̌ ros e rɛ̌, na hwo wok nemwishish mɛn arɛt?”

¹³Dagwi Darwey a toyo a tom-lagwi de a dopse misang a me pyɛ́ mo na neha nerat de na wɔrɔk hɛ.

¹⁴Ko tom o a yang me, me shara ha de Dagwi Darwey, Dâ Jey Mwa a ye: “Ma tɛ̀ yey ding-ding na repomô Yɛrusalɛm, rɛ a Siyɔn, ko ra sé e yey hom kayɛ jeng.

¹⁵Ma ra shom na yére bemât jey jeng tyɔng, ko a remo ya ga sogo sizɔng. Yɛn á tak a bemat hom na neves de na dal pyɛ de ma kana bare, ko ra ano mo ha ka bɔrɔk hɛn wɛt.

¹⁶Yaga ano, ma toyo na me wok nemwishish Yɛrusalɛm. Ba rɔda yong Gbɔng Duk Re a me Fongol, na be to lɔk gbɔng repomo mo arɔng. Me, Dagwi Darwey, Dâ Jêy Mwa, ma ha ano.”

¹⁷Tom-lagwi o a to yang me, me shara ha hemo ngan: “Dagwi Darwey, Dâ Jêy Mwa a ye, Bapomô bemat hom ba rɔda to sila na pyɛ̂ nedanerey. Yɛrusalɛm, wa rɔda to tɛ́ ɛ repomo hom, ko ma rɔda wɔrɔk bemat Siyɔn.”

¹⁸E bama mo ma di ngɛngɛ naas.

¹⁹Ma hwo rangâl tom-lagwi de e dopse misang a me pyɛ́ mo, ma yang ɛ, “Cap vɛ ya sé sɛ́ ɛ?” A toyo a me, a ye, “Ya sé e tô yére bemât jey de ya kana shara BeYuda na BeIsrayɛl tanga bemât Yɛrusalɛm.”

²⁰Ko Dagwi Darwey a dura a me bezu benaas.

²¹Ko ma rangal hɛ, ma ye, “Ba vey ra sɛ́ arɛt?” A toyo a me, a ye, “Ba vey, na be tɛ̀ a yére bemât jey o bengyip tyɔng wɛt, yaga ya kana re BeYuda mo na como vit, ya shara hɛn. Bezu mo ba rɔda wey na yɛ.”