Read berom Zɛkarya 10 Bible Online

Zɛkarya 10 - berom bible

Zɛkarya 10

¹Rangal hin Dagwi Darwey rwak e jeng wɛ. A sé e yɛ de e tomsal na balê rwak, na rwak, yaga na pyɛ̂ cap ye to tá yaga kawɛ mwat.

²Yin e kyese na bedâ sekwit tanga bevwoshon, ko yɛn e vɛ́sɛ a yin bɔs na hâ vyóshon zɔng. Behak mɛn be kwɛlɛng hin wɔgɔ, be misang a yin cap-hâ negwi, ko be tɛ̀ yey min ye dyɛng na bɔs zɔng. Yaga ano, yin e kyě gǎ sede vyēl de ya ga vusa hɛ. Yin a sé e ji reyɔm, yaga yin a vɔk lwek wɛt.

³Me, Dagwi Darwey, me wok shom na belek beduk vane de be tak a kwarâ vyēl hom, ko ma sé kyè wɔ̀ tabak hɛn. Me Dagwi Darwey, Dâ Jey Mwa mê gyeng vyēl hom, yɛ a bemât yerê Yuda. Ko ma rɔda tɛ̀ ɛn, be sè sede dwâ como hom wo gap.

⁴Yi e kwara mo bê sɛ̀ yére bemat nuyel detidetu, vemo de bê se gbarak sede gwofwa bomô duk, vemo de bê se ting sede kwagam rɔgɔs dwa, na vemo de bê vɔk gap sede gbang como.

⁵Yɛn na bwâng BeYuda ba rɔda bɔrɔs vê repugu mɛn e ji bwɔrɔ̂k nehyok. Yɛn a rɔda tó como, yaga me, Dagwi Darwey, ma sé na yɛn, ko yɛn a rɔda re bemât bedwâ como mwa.

⁶Ma rɔda tɛ̀ BeYuda be vɔk gap, mê sey ɛ̀ BeIsrayɛl. Ma rɔda wok nemwishish mɛn, ko mê toyo na yɛn mwa vey e lɔ. Bê sè sede ma ga sang kyɛ́ me hɛn wɛt. Ma sé Dagwi Darwey, Dagwi mɛn, mê wok won mɛn.

⁷BeIsrayɛl ba rɔda vɔk gap sede besuga. Bê vɔk yey pyɛng sede bemat de ba sé sɔ nshî anap. Nèy mɛn na rɔda di wɛng hemo, ko nê rɛ̌ na yey pyɛng yaga pyɛ de me, Dagwi Darwey, ma ga ra.

⁸Ma rɔda yila bemat hom, na me tula hɛn e dem hining. Mê sey ɛ̀ hɛn, na me tɛ̀ ɛn, be to sè pyak sede raane.

⁹Mwa ano de ma ga shara hɛn e ji yére bemat jey, ko yɛn a rɔda bare na me yi e nekwɔn mɛn ne yikyik. Yɛn ê ras nèy mɛn, ko nê to vɛ hɛn.

¹⁰Ma rɔda toyo na yɛn yi e Misra na Asirya, na me to nɔng ɛn kwɔ̂n sangal e vwel mɛn. Ma rɔda nɔng ɛn kwɔ̂n sangal mwa vɔk e neyɛnɛ̂ vwêl Gileyat na Lɛbanɔn arɔng. Ko mwa ano, vwel o hê radɛ a yɛn.

¹¹Ma rɔda pat ɛn yi e reyɔm mɛn. Ma rɔda gang bagung nshî gworep, ko mê tɛ̀ retîs Gwɔrɔt Nil re tɛ́ ɛ hwɔk hwɔk, Asirya de wó tos to, ma rɔda tɛ̀ wo dyɛng to, Misra de wa vɔk gap hyiw, bê kwɔrɔ gâp wɛ.

¹²Ma rɔda tɛ̀ bemat hom be vɔk gap. Yɛn ê kyě kyè na to e gwi yaga me. Me, Dagwi Darwey wɛ de ma ha ano.