Read berom Zɛkarya 11 Bible Online

Zɛkarya 11 - berom bible

Zɛkarya 11

¹À vwêl Lɛbanɔn, wuma ri mō, yaga na kya he re cɔ́gɔt sída mō.

²Tosho hin, dak in bèkun, à cɔ́gɔt fir yaga cɔ́gɔt sida mo ya ga gabsa. Cɔ́gɔt ryey o yane ya ga wey! À yin cɔ́gɔt ouk yê Bashan, tosho hin, dak in sekun, yaga ba ga tow rehwot de ra vɔk cɔ́gɔt tyɔng wɛt!

³Wok in, belêk bemat be tosho na lashê yey sizɔng, yaga kwɔ̂n gyeng yas mɛn rat o ha ga wey! Wok in, begukum be lulum, ba ga wey na nekwɔn sangal mɛn e bahwôt Rɔt Yɔrdan!

⁴Dagwi Darwey, Dagwi hom a yang me, “Ra sede hwo wɛ a lwêk vyēl yemo de be kyè wɔ̀ yɛt yɛ.

⁵Vemo de be seres yɛ na be yɛt be di neves pyɛ de yɛn e ra wɛt, ko vemo de be rɛsɛl yɛ be tē, ‘Somo hin Dagwi Darwey, wot a ga tɛ́ ot bedaberey!’ Ko belêk vyēl mɛn be ka wok nemwishish mɛn mwa wɛt.”

⁶Ano arɔng, “Ma rɔda to me wok nemwishish mwat hwak e vwel o wɛt. Mê tɛ̀ bemat o mwa na gbɔng gwɔ̀m mɛn e nɛ̂n bemât vwara mɛn. Begbɔng begwɔ̀m o ba rɔda lashe vwel o, ko ma rɔda sey ɛ bemat o yi e vɔ mɛn wɛt.”

⁷Yaga ano, ma tɛ́ me lwêk vyēl de ba ga yong na be yɛt yɛ, vyēl o yemo de be tak a yɛ. Ma hwo jut begele beba, ma vo a gwining rezâ “Simi”, ko gwo neba ma tâng gwɛ à “Wunâ to”, ko ma gyenges kwarâ vyēl o.

⁸Ma tɔk niri na belêk vyēl betat de ba kyɛ́ ɛn me wɛt, ko ma paa ɛn e ji pwɛl gwining.

⁹Ko ma yâng kwara mo, “Ma rɔda to me sè lwek min wɛt. Tik vemo de bê kushu be kushu. Tik vemo de bê weres be weres. Vemo de ba pɔl ɛ ba rɔda weres na bemɛn.”

¹⁰E bama mo, ma jut gwele de ba tâng gwɛ à “Simi”, ko ma kwɔrɔ gwɛ, na me dura mɛ, Dagwi Darwey a ga gang wuna-na-sira de a kana ra na mwa yére bemat jey.

¹¹A gang hɛ tuk hane. Bejik vyēl de bá sè bɛrɛng pyɛ de yá té, ba tɔk, Dagwi Darwey a sé ha na yɛn yi na pyɛ de ma ra.

¹²Ko ma yang ɛn, “Ka sede yin a simo, ko yin tala me byɛ hom. Ka ano wɛt, ko yin vɔk yɛ zɔng.” Yaga ano, yɛn a hwo tala me dyam pyɛng shɛkɛl naga betat.

¹³E bama mo, Dagwi Darwey a yang me, “Dyām a yane de yɛn a di, ya sé naka yaga me a! Bomo a zu yɛ̄!” Yaga ano, ma jut yɛ, ko ma wɔ̀ bomo a zu yɛ e lalâ Gbɔng Duk Re Fongol wo Dagwi Darwey.

¹⁴Ano arɔng, ma kwɔrɔ gwele gwo neba de ba tâng gwɛ à “Wunâ to”, na me dura mɛ, ba ga gas sangâl negwa de na sé e tê BeYuda na BeIsrayɛl.

¹⁵Dagwi Darwey a yang me, “To ra sede lwêk vyēl de a vɔk nerat wɛt.

¹⁶Yaga ma rɔda tɛ̀ lwek o hwak e ra vwel o, womo de pyɛ mɛ cak ya rɔda sè na vyēl de ya weres, kɛ nèy o de na vusa hɛn, kɛ a pege yemo de ya mǎ hɛ, kɛ a wɔ̀ gyeng yemo de ya sé tyang arɔng wɛt. Ko a rɔda sǎ e de rerês banamâ yemo de ya dal na nerat mwa na hê bol o.

¹⁷“Yàa kukuuk! Gawey e ra lwêk vyēl de a vɔk nerat wɛt, womo de e kyè e hala vyēl o! Tik na wal wo tara vwɔ mɛ, na wo pat yis mɛ rê vwɔ yege arɔng! Tik na vwɔ mɛ gwo sɔ ɛ vit, ko yis mɛ he tɛ́ ɛ buga gbak-gbak!”