Read berom Zɛkarya 12 Bible Online

Zɛkarya 12 - berom bible

Zɛkarya 12

¹Hâ siitit yi na Dagwi Darwey e ra BeIsrayɛl a hemo: Dagwi Darwey de a tɛnɛ lagwi, a tɛ̀ retîs jey, ko a nɔ̂ng mwasi neken, a ye,

²“Ma rɔda tɛ̀ Yɛrusalɛm wo sè sede keshi nshî anap, nemo de yére bemât jey de ba rɔnɔ wɛ ba rɔda sɔ, ko be kyě tē tàrak sede bemât sefeng. Yɛn a rɔda rɔnɔ Yɛrusalɛm na bwang bapomô Yuda na como.

³Sede jeng o ya pom, yére bemât jey mwa ya rɔda wuna hɛ, na ye hwo e ra Yɛrusalɛm. Ko ma rɔda tɛ̀ wɛ, wo sè sede gwofwa de gwa sé dirik, ko kayɛ yére bemât jey de yê jama na ye jut gwɛ, ya rɔda mǎ hɛ ding-ding na gwɛ.

⁴E jeng o, ma rɔda tɛ̀ a bedwa mɛn bengyip sizɔng, bê tele kpɛɛ, ko bemât laga vɛ ba rɔda tē how. Ko ma rɔda bɛɛ nekanang e ra BeYuda.

⁵Ano kwong, bemât rùhup Yuda ba rɔda yâng bato mɛn, ‘Dagwi Darwey, Dâ Jey Mwa, yɛ Dagwi mot e nɔngɔ̂s bemat mɛ de ba sé sangal e ji Yɛrusalɛm gap!’

⁶“E jeng yane, ma rɔda tɛ̀ bemât rùhup Yuda be sè sede kya e ji regwɔ̂t cɔ́gɔt cogot kɛ e ji cugul, yɛn a rɔda wey na mwa yére bemat jey de ya gwɔrɔ hɛn. Ko bemât Yɛrusalɛm bê sangal tyang e ji gbɔng repomo mɛn.

⁷“Me, Dagwi Darwey, ma rɔda tanga nɔ̂ng BeYuda wɛng, yaga na nerey ninde yére Davit tanga bemât Yɛrusalɛm ba rɔda sɛ̀ na rɔda dal ne bwang BeYuda wɛt.

⁸E jeng yane, me, Dagwi Darwey ma rɔda dul vemo de ba sé e Yɛrusalɛm, ko vemo de ba dal na nemɛrɛk e ji mɛn ba rɔda vɔk gap yerê hê Davit. Yére Davit ya rɔda kyè e nuyel mɛn, sede remo tom-lagwi wo Dagwi Darwey, kɛ sede Dagwi pyɛ mɛ.

⁹E jeng o, mê yong me, na me wey na bemât kayɛ yerê jey de bê simo be hwo e ra Yɛrusalɛm na como.”

¹⁰“Me, Dagwi Darwey, ma rɔda sila yére Davit na bwang bemât Yɛrusalɛm na gabîk toshô reyɔm, na hê won. Yɛn a rɔda bɛrɛng womo de yɛn a luga hɛ pere wɔ̀ ku, ko yɛn a rɔda ra sesin yaga yɛ, sede be ra sesîn hwey de ha sé nju hɛ e neng mɛ, kɛ ha sé e hwêy negel wen o de ha wey.

¹¹E jeng o, sesin de bê ra e Yɛrusalɛm ha rɔda sè ding-ding sede hê Hadat Rimɔn e tyɛl Megido.

¹²Vwel o mwa ha rɔda ra sesin, ko bemât kagwɛ ruhup ba rɔda ra mɛn: bemât ruhûp Davit ba rɔda ra mɛn zɔgɔ̂ hɛn, ko beha mɛn bê ra mɛn detu, bemât ruhûp Natan bê ra mɛn zɔgɔ̂ hɛn, ko beha mɛn bê ra mɛn detu.

¹³Bemât ruhûp Levi bê ra mɛn zɔgɔ̂ hɛn, ko beha mɛn bê ra mɛn detu. Bemât ruhûp Shimai bê ra mɛn zɔgɔ̂ hɛn, ko beha mɛn bê ra mɛn detu.

¹⁴Ko bemât bwang yére mwa de ba pɔl ba rɔda ra mɛn zɔgɔ̂ hɛn, ko beha mɛn bê ra mɛn detu arɔng.”