Read berom Zɛkarya 13 Bible Online

Zɛkarya 13 - berom bible

Zɛkarya 13

¹E jeng yane, nshi na rɔda hwo nunus yi e jɔt yaga yére Davit na bwang bemat de ba sé sangal e Yɛrusalɛm, na be kus ɛn mɛ yi e banɛn tanga yi e pyɛ́ de ya tɛ̀ ɛn ligis.

²Dagwi Darwey, Dâ Jey Mwa, a ye, “E tuk o, ma rɔda paa kayiyɛ yerê cī yi e sevwel o, ko bê to bare na yɛ mwa na bazâ yɛ ko tyɔng wɛt. Ma rɔda ro kawɛ mwat de e tē, a sé zarap hom, ko ma rɔda to paa begabik beves de ba vɔk reto e ra yɛn.

³Ka sede zarap hwak a nusu gbak, ko da na neng mɛ ba rɔda yang ɛ, ‘Hwô dal wɛt, yaga hwó zarap bɔs e ji rezâ Dagwi Darwey.’ Ko yɛn a rɔda luga hɛ.

⁴“E jeng yane, bezarap ba rɔda tē naka na ha wɔgɔ, Dagwi a ga dura a yɛn pyɛ cak sede e ji negwi wɛt. Yɛn a rɔda to tɛ̀ berugû bezarap de ba yong na setôt vyēl yaga na be bin kwɛlɛng mɛ bemat wɛt.

⁵E tô ano, kawɛ mo a rɔda ye, ‘Ma sé zarap Dagwi wɛt. Ma sé mwât cap, me sɛsɛm pyɛ̂ re hom yi e fwôm cap yimo me wen.’

⁶Ka sede mwat hwak a rangal hɛ, a ye, ‘Barâm sɛ́ a vane e rebek mo ɛ?’ A rɔda toyo a yɛ, a ye, ‘Ba tɛ̀ a me baram o e lɔ̂ besa hom.’ ”

⁷Dagwi Darwey, Dâ Jey Mwa, a ye, “À wal, sene! Hwo e ra lwêk vyēl hom e ra sa gafiri hom! Tara, na hwo wey na lwek o, na vyēl o ye shara hɛ! Ko ma rɔda doyo e ra nèy o, nɛ a bemat hom.

⁸E ji vwel o mwa ba rɔda tow beba e ji kavɛ betat, na be wey, ko ba rɔda tik gwining e ji kavɛ betat na neken.

⁹Yɛn vane mo bê kwey e ji kyâ tabak, mê mara hɛn, na me paa neves yi e ji mɛn, sede be paa nevês dyām shinang na dyām pyɛng jeng de be rugut yɛ. Yɛn a rɔda ra won e ji reza hom, ko mê wok ɛn. Ma rɔda yang ɛn, ‘Yin a sé bemat hom’, ko yɛn arɔng ba rɔda ye, ‘Hwo, Dagwi Darwey, hwà sé Dagwi mot.’ ”