Read berom Zɛkarya 14 Bible Online

Zɛkarya 14 - berom bible

Zɛkarya 14

¹Tuk de Dagwi Darwey a rɔda dura shom mɛ ha ga vey bagat. Bemât repugu ba rɔda hashe pyɛ̂ Yɛrusalɛm, ko yin bemat o, yin a rɔda bɛrɛng hɛn e de gâs pyɛ́ mo.

²Ey, Dagwi Darwey a rɔda tula yére bemât jey mwa vey e gbɔng repomo mo, na be tó como na rɛ. Ba rɔda re rɛ, bê hashe pyɛ́ yi e nelɔ rɛ, ko bê dyɛng na behâ rɛ na retek. Ba rɔda kyè na rebit bemât repomo mo vɔk e de sesam, ko bwang o bê nàra e ji rɛ.

³E bama mo, Dagwi Darwey a rɔda nusu, na a tó como na yére bemât jey vane mo, sede remo de á ragas e tûk tô como.

⁴E tuk o, a rɔda tumal na bol mɛ e ra Raku Pat de wa sé e rwa ta na Yɛrusalɛm. Raku Pat o wa rɔda gas ɛ zang ba yi e rwa rak vɔk e rwa ta, ko wo tɛ̀ gbɔng nɛk e tē mo. Rebit raku mo rê gwɛ̌ sek vɔk e rwa bato, ko rebit o vɔk e rwa batin.

⁵Yin a rɔda tele e nɛk raku mo wɔ nusu hin, yaga wa rɔda gwɛ̌ hɛ pere vɔk e Azal. Yin a rɔda tele, sede remo de beda min bá kana tele yi e digîs vwel e jeng Uziya, gbɔng gwɔ̀m Yuda. E bama mo, Dagwi Darwey, Dagwi hom a rɔda vey, yɛ na mwa betom-lagwi mɛ!

⁶Tuk o ha rɔda se wɛshɛrɛk, ha rɔda vɔk bale wɛt.

⁷Nagwi na rɔda nàra, ko e nawiri mwa jey ya rɔda rɔngɔl gbey, ya rɔda se mwangalang wɛt. E Dagwi Darwey zɔng de a tɔk jeng de pyɛ yane yê té.

⁸E tuk o, nshi nerat nê nunus yi e Yɛrusalɛm, rebit nɛ rê tele vɔk e Gworep Tē e bak rak, ko rebit o vɔk e Gbɔng Rep Nevwashe e bak ta. Nê tele nǎhwos na nazɛng mwa rining o.

⁹Dagwi Darwey a rɔda sè gbɔng gwɔ̀m e ra jey mwa, ko e tuk o, Dagwi Darwey ê sè gwining, ko e reza mɛ de rê sè nju rɛ zɔng.

¹⁰Vwel o mwa yi e Geba e rwa bato vɔk e Rimɔn e rwa batin ha rɔda sè tyɛl, ko Yɛrusalɛm wa rɔda sè e ra raku e rak o, e kwɔ̂n wɛ, yi e rwi yel gwô Bɛnyamin wɔ̀ sɛ̀ mɛ kwɔ̂n rwi rosomo wɔ e to-kwɔng; wa rɔda to yi e Tyɔ̌n Hananɛl vɔk e nekwɔn pirî nshî anap ne begbɔng begwɔ̀m. Ba rɔda sangal e bak wane mo mwa,

¹¹ko yɛn ê sangal tyang e ji wɛ, ba rɔda sang to wey na wɛ wɛt.

¹²Dagwi Darwey a rɔda tɛ̀ tumbang vwes wo hwo e ra yére bemât jey de bá tó como na Yɛrusalɛm. Banamâ babek mɛn bê hwo bɔsɔ, jeng de yɛn pyɛ mɛn ba rɔngɔl beken. Yéneng bayis mɛn ya rɔda bɔsɔ e ji bavɔng bayis o, ko balem mɛn ba rɔda bɔsɔ e ji nenu mɛn arɔng.

¹³E tuk o, Dagwi Darwey a rɔda tɛ̀, be kyě lingsit kpɛɛ. Kawɛ mwat a rɔda kaba mumwɛ, ko yɛn a rɔda hwo e ra bemɛn.

¹⁴BeYuda arɔng ba rɔda tó como na bemât yére dyuk e Yɛrusalɛm. Ba rɔda tula pyɛ̂ nedanerey mɛn o mwa, ba rɔda sɛ̀ gwakû dyam shinang na dyam pyɛng tanga nezap berugu.

¹⁵Ko yerê tumbang gwining o wa rɔda hwo e ra bedwa, na bedwa-madung, na bemaryat, na bemadung, tanga mwa yas de ya sé e nekwɔn ye ngyɔk mɛn.

¹⁶E bama mo, bemat de ba dalas yi e yére bemat jey de ba tó como na Yɛrusalɛm ba rɔda kyese kahɛ shey, na be wɔ̀ re a Dagwi Darwey, Dâ Jey Mwa, gbɔng gwɔ̀m mɛn, fongol, na be ra Nzem Buk.

¹⁷Ka sede behak e ji yerê bemat o ba wɔ́ e Yɛrusalɛm na be wɔ̀ re a Dagwi Darwey, Dâ Jey Mwa, gbɔng gwɔ̀m mɛn, fongol wɛt, vwel mɛn ha rɔda sɛ̀ rwak wɛt.

¹⁸Ko ka sede e BeMisra de ba kyɛ́ ɛn nà wɔ ra nzem o, ko yerê tumbang o wô hwo e ra yɛn.

¹⁹Hemo hɛ de ha rɔda sè tabak e ra Misra tanga yére bemat jey mwa de ba kyɛ́ ɛn nà wɔ̀ ra Nzem Buk.

²⁰E tuk o, ba rɔda jɛk e ra begyɛngɛrɛ̂ng bedwa ngan: “Jaram yaga Dagwi Darwey.” Nerwey kyerês pyɛ́ ne Gbɔng Duk Re Fongol nà rɔda sè ne Dagwi, tyɛng sede neshǐ de na sé e nuyêl gàgbang rangâs yas o.

²¹Kahɛ rwey e Yɛrusalɛm na Yuda ha rɔda sè jaram yaga Dagwi Darwey, Dâ Jey Mwa, ko mwa bemat de bê vey nára nɔrɔ̂ yas ba rɔda ra fwom na nerwey o, na be kyé ɛ banama mo e ji nɛ. E tuk hane, ba rɔda to simo bejik be rɛsɛl nerwey nehak detu e ji Gbɔng Duk Re Fongôl Dagwi Darwey, Dâ Jey Mwa ko tyɔng wɛt.