Read berom Zɛkarya 2 Bible Online

Zɛkarya 2 - berom bible

Zɛkarya 2

¹Ko ma to di mwat na rwîk masâ pyɛ́ e vwɔ mɛ.

²Ko ma rangal hɛ, ma ye, “Hwó kyè vɔk e gwa ɛ?” A toyo a me, a ye, “Me kyè wɔ̀ e Yɛrusalɛm, na me wɔ masa nelis na netês wɛ.”

³E bama mo, tom-lagwi de a dopse misang a me pyɛ́ mo a hwo kyè wɔ man na tom-lagwi o hwak de e kyè vey na yɛ.

⁴Wo neba mo a yâng mumwɛ, “Tele, na hwo wɔ̀ ha a wen de a vɔk rwîk masâ pyɛ́ mo. Yang ɛ, ‘Bemat tanga yas ba rɔda sè pyak sizɔng e Yɛrusalɛm, ko wa rɔda kat na be rɔnɔ wɛ na jwâ-pomo.

⁵Dagwi Darwey a ga sira, yɛ pyɛ mɛ a rɔda sè sede jwâ-pomo wo kya de wa rɔnɔ gbɔng repomo mo, na a gyep rɛ, ko a rɔda sangal e ji rɛ na gbɔng nerat mɛ.’ ”

⁶Dagwi Darwey a yâng bemat mɛ, “Sogo hin! Tele hin yi e sevwêl rwa bato, kwɔn de ma ga kana shara hin ɛ!

⁷Sogo hin! Tele hin wɔ̀ dal e Siyɔn, yin de yin a sé rɔngɔl e vwêl Babilɔn.”

⁸Ko Dagwi Darwey, Dâ Jêy Mwa, wo gbɔng nerat a tomo me, na me ha a yére bemât jey de ba ga jugu ba rung pyɛ̂ bemât Siyɔn ha hemo: “Bemât Siyɔn ba sé a Dagwi Darwey pyɛ ryat sizɔng sede yenêng yis mɛ. Yaga ano, mwa mwat de a ra ɛn, a ga ra ɛ a wane.

⁹Yaga ano, a rɔda tó como na yin, ko besam min ba rɔda jugu, na be rung pyɛ́ min arɔng.” Jeng de pyɛ yemo yê té, ko yin a rɔda tɔk, e Dagwi Darwey, Dâ Jey Mwa de a tomo me.

¹⁰“A yin bemât Yɛrusalɛm, vɔk in yey pyɛng, ra in biibi! Ma sé kyè vey sangal e tē min!

¹¹E jeng yane, yére bemât jey pyak ya rɔda vey na me, Dagwi Darwey, ko yɛn a rɔda tɛ́ ɛn bemat hom. Ko a sé e tē min de ma rɔda sangal ɛ.” Jeng de pyɛ yemo yê té, ko yin a rɔda tɔk, e Dagwi Darwey, Dâ Jey Mwa de a tomo me na yin.

¹²Vwêl Yuda ha rɔda to tɛ́ ɛ mɛ, e vwel de a tik jaram yaga tó mɛ, ko Yɛrusalɛm wa rɔda sè gbɔng repomo de a kasa, na re se mɛ.

¹³Tik na bemât jey mwa be sangal yuu e nuyêl Dagwi Darwey, yaga a sé kyè vey yi e kwɔ̂n sangal mɛ hê jɛrɛ.