Read berom Zɛkarya 4 Bible Online

Zɛkarya 4 - berom bible

Zɛkarya 4

¹Tom-lagwi de a dopse misang a me pyɛ́ mo a to vey, ko a shina me sede mwat de a kana sê nevwa.

²A rangal me, a ye, “Hwà di sɛ́ arɛt?” Ko ma toyo a yɛ, ma ye, “Ma di pyɛ tikîs bekywa-kya de ba yong na dyam shinang zɔng. Ya vɔk keshi kemo de bé tɛ̀sɛ ɛ něy e ra rak o. Bekywa-kya ba sé betaama e ra kwɔ̂n tikîs bekywa-kya mo, ko kagwɛ kywa-kya gwa vɔk nekwɔn tɛ́sɛ kya netaama.

³Batîn cɔ́gɔt pwat baba ba sé e hagât pyɛ tikîs kywa-kya mo, rining e karɛ hagat o.”

⁴Ma hwo rangâl tom o, ma ye, “À da, pyɛ́ yemo ya dura sɛ́ arɛt?”

⁵Ko a rangal me, a ye, “Hwà tɔk wɛt a?” Ma ye, “Wey, à da.”

⁶A yang me, “Hâ Dagwi Darwey, Dâ Jey Mwa, a hemo vɔk na Zɛrubabɛl: Hwà rɔda di wɛng yi na gap kɛ reto mō wɛt, ko yi na Gabik hom.

⁷Pyɛ́ de yê dul o yê tɔk se sede gwogbɔng gworaku e nuyel mō, ko ma rɔda gang yɛ e jey. Hwà rɔda tɛ̀ gwofwa de gwa bang rà rak Gbɔng Duk Re Fongol, ko ba rɔda gbɔ na yey pyɛng yaga gwɛ.”

⁸Dagwi Darwey a to ha na me, a ye,

⁹“Zɛrubabɛl a ga bomo retîs Gbɔng Duk womo, ko e yɛ wɛ de a rɔda tala fwom o. Jeng de pyɛ yemo yê té, ko yin a rɔda tɔk, e Dagwi Darwey, Dâ Jey Mwa, de a tomo me vey na yin.

¹⁰Bemat de ba byɛs tuk de be ra pyɛ́ shɛl o, ba rɔda vɔk yey pyɛng, ko ba rɔda di gwofwa de ba kasa e vwɔ Zɛrubabɛl. “Bekywa-kya betaama mo ba sé e tô bayis hom, bayîs Dagwi Darwey, vemo de be bɛrɛng jey mwa.”

¹¹Ma to rangal tom-lagwi, ma ye, “E sɛ́ a cap batîn pat baba vemo de ba sé e bahagat baba vê kwɔn tikîs bekywa-kya mo arɛt?

¹²Ko nelang pwat neba nemo de na sé e bahagât befɛ̂ng dyam shinang baba de něy ne nunus ɛ, cap nɛ a sɛ́ ɛ?”

¹³Ko a rangal me, a ye, “Hwà tɔk wɛt a?” Ma toyo mɛ, ma ye, “Wey, à da.”

¹⁴Ko a yang me, “Yɛn vɛ à bemat beba de Dagwi a ga kasa, a ga mɔmɔ hɛn na něy, na be ra a yɛ fwom, yɛ Darwêy jey mwa.”