Read berom Zɛkarya 5 Bible Online

Zɛkarya 5 - berom bible

Zɛkarya 5

¹Ma to ye ganga, ko ma di a remo bwok-basa de gwa sé tele e gwi.

²Tom-lagwi o a rangal me pyɛ de ma di, ko ma toyo a yɛ, ma ye, “A sé e bwok-basa de gwa sé tele e gwi, nelîs gwɛ na sé sede mita kuru ko netes o mita betungun.”

³A yang me, “Ba jɛk e ra gwɛ gawey de ha rɔda hwo e ra mwa vwel o. Ba jɛk e bak gwining wo bwok-basa mo wɔgɔ, ba rɔda wey na kawɛ gbik e vwel o, ko e bak o woro ba jɛk ɛ wɔgɔ, ba rɔda pat kawɛ mwat de a sira hɛ na bɔs yi e vwel o arɔng.

⁴Ko Dagwi Darwey, Dâ Jey Mwa a ye, ê tomo gawey o, ko ha rɔda yel e lɔ kawɛ gbik tanga hê kawɛ mwat de a sira na bɔs e ji reza hom. Hê nàra e nelɔ mɛn o, hê wey na nɛ mwa hywiri, sesek o tanga beta mo arɔng.”

⁵Tom-lagwi de a dopse misang a me pyɛ́ mo a to vey bagat na me, ko a yang me, “Ye ganga, na hwo di pyɛ de kyè vey!”

⁶Ma rangal hɛ, ma ye, “E sɛ́ ɛ?” A toyo a me, a ye, “A sé e shap, ko ya sé e tô banɛ̂n vwel o mwa.”

⁷Shap o ya vɔk pyɛ banga de ba yong na dyam shi. Ba wunta pyɛ banga mo, ko ma di hwā hwak e sangal e ji yɛ!

⁸Tom-lagwi o a ye, “Hwā womo a sé e tô neves.” Ko a gang hwā mo e ji shap o, a to bang yɛ na pyɛ banga mo de ya sé dirik.

⁹Ma ye ganga, ko ma di beha beba be tele e gwi vey pom na bafabak sede vê nɔ̀rɔ. Yɛn a vey jut shap o, ko ba tele mɛ.

¹⁰Ma rangâl tom-lagwi o, ma ye, “Yɛn e kyè na yɛ vɔk e gwa arɛt?”

¹¹A toyo a me, a ye, “Vɔk e vwêl Babilɔn, e kwɔn de bê lɔk a yɛ duk rê fongol. Ko jeng de yɛn a yɛnɛ lɔk o, yɛn a rɔda tik shap o e ji mo, e kwɔn de ba yong yaga yɛ.”