Read berom Zɛkarya 6 Bible Online

Zɛkarya 6 - berom bible

Zɛkarya 6

¹Ma to di pyɛ mo cak. E remo, ma di bekyɛkyɛ̂ bedwa benaas be nunus yi e tê beraku beba de ba yong na dyam pama.

²A sé e bedwa bezà besinang de ba hwɔlɔ kyɛkyɛ wo mɛsɛng o, berigi de ba hwɔlɔ wo neba,

³berɔgɔ de ba hwɔlɔ wo netat, ko berúrùm de ba hwɔlɔ wo nenaas. Mwa vɛ ba vɔk gap hyiw.

⁴Ma hwo rangâl tom-lagwi de a dopse misang a me pyɛ́ mo, ma yang ɛ, “À da, be dura sɛ́ arɛt?”

⁵A toyo a me, a ye, “Yɛn a sé e tô gùl naas ve lagwi. Yɛn a sé mɛsɛng nusu yi e nuyêl Dagwi Darwêy Da Jey Mwa.

⁶Kyɛkyɛ de berigî bedwa be hwɔlɔ wɛ wa sé kyè vɔk e bak rwa bato, womo de berɔgɔ be hwɔlɔ wɛ wo kyè vɔk e bak rwa ta, ko wo berúrùm bedwa wo kyè vɔk e vwêl bak rwa batin.”

⁷Sede bedwâ gap o ba nusu e jey, ba hwo longsot, na be nɔ̂ng vɛ nu, be kyè, ko tom o a yang ɛn, “Kyè in wɔ̀ gwɔsɔ jey!” Ko yɛn a kyè.

⁸E bama mo, a yang me na gbɔng fwɔ, “Bedwa de ba kyè vɔk e rwa bato bê ra pyɛ de Gabik Dagwi Darwey hê simo, na be ra e hwomo.”

⁹Dagwi Darwey a ha na me a ye,

¹⁰“Hɛldai, na Tobiya na Yɛdaya ba ga toyo yi e de sesam e sevwêl Babilɔn. Jut nɔrɔ de yɛn a vey mɛ, na hwo kyè mɛ vɔk e lɔ Yɔsiya hwêy Tsefanya.

¹¹Yong kpîn negwɔm na dyam pyɛng tanga dyam shinang yê nɔrɔ mo, na hwo tɛ̀ wɛ e ra tô Yɔshuwa hwêy Yɛhɔzadak, darwêy bepiris.

¹²Ha a yɛ wɔgɔ, me, Dagwi Darwey, Dâ Jey Mwa, ma ye ngan, ‘Mwat hwak ê nára hɛ yi e ngamo sede lang ha nǎ hɛ, ko a rɔda to wɔ lɔk a me Gbɔng Duk Re Fongol. Ma rɔda yila hɛ à Lang, ko ba rɔda nɔng ɛ nerey ne gbɔng gwɔ̀m. A rɔda re negwɔm e ra bemat mɛ. Piris hom hwak a rɔda tumal e hagât gwofwa negwɔm mɛ, ko yɛn a rɔda ra fwom tanga yɛ e ji nesa.’

¹⁴Ba rɔda tik kpîn negwɔm o e ji Gbɔng Duk Re Fongol, na be bare mɛ na Hɛldai, na Tobiya, na Yɛdaya tanga Yɔsiya.”

¹⁵Bemat de ba sé sangal yikyik ba rɔda vey sɛlɛ, na be to lɔk Gbɔng Duk Re Fongol wo Dagwi Darwey. Ano, yin a rɔda de tɔk, e Dagwi Darwey, Dâ Jey Mwa, de a tomo me na yin. Pyɛ́ yemo mwa ya rɔda té, ka sede yin ê gyeng hâ Dagwi Darwey, Dagwi min na yey min mwa.