Read berom Zɛkarya 7 Bible Online

Zɛkarya 7 - berom bible

Zɛkarya 7

¹E tuk hê naas hê pwɛl gwô shanetat, gwɛ a pwɛ̂l Kislef, e shey hê naas de Dariyus á sè Da vwel Pɛrsya, Dagwi Darwey a to ha na me.

²Bemât Bet-Ɛl ba ga tomo Sharɛzɛr na Rɛgɛm-Mɛlɛk tanga bemat mɛn vɔk e Gbɔng Duk Re Fongol wo Dagwi Darwey, Dâ Jey Mwa, na be wɔ̀ ra won, yaga na a tɛ̀ a yɛn nerat,

³na yɛn a rangâl bepiris tanga bezarap mɛ rangal hemo, “Wot re nuyel na sesin, na wot sǎ e de tik rê pyɛ́ e pwɛl gwô netungun, sede remo de wot e ragas neshey pyak a remo a?”

⁴Dagwi Darwey, Dâ Jey Mwa, a yang me, me ha a bemât vwel o tanga bepiris mɛn wɔgɔ, “Yin a tik rê pyɛ́, na yin a ragas sesin e pwɛl gwô netungun na gwô netaama e neshey kuru bataama (70) nemo. Ko yin á ragas ano, na yin a nɔng me mɛ nerey wɛt.

⁶Ko jeng de yin e re yin e sɔ, yin e ra ano yaga wôk netâ yey min wɛt a?

⁷Há hom hemo ha sé hining o na hemo de ma tɛ̀ bezarap hom vê raane ba ha. E jeng o, Yɛrusalɛm na bapomo de ba gwɔrɔ wɛ ba vɔk pyɛ́ shɛrɛk, ko bemat ba sangal e bak hey e rwa batin na bak vwêl berahwol.

⁸“Ko a remo, me Dagwi Darwey, Dâ Jey Mwa, me to ha a yin wɔgɔ, ‘Gas in shɔt e tē, ko dura hin a bemin nerat, na yin wok nemwishish mɛn arɔng.

¹⁰Yin kwon midra bekuma, kɛ nehyɛn, kɛ bemât yére dyuk de ba sé sangal na yin, kɛ bepɛng wɛt. Yin yong begwong beves de yin ê mǎ bemin wɛt.’

¹¹“Ko bedabeda min ba kana kyɛ́ ɛn na negbarak sana wok ha hom. Yɛn a bang betong mɛn.

¹²Ba tɛ̀ neyey mɛn, ne sè gbarak sede gwofwa. Yɛn a kyɛ́ ɛn basa de me, Dagwi Darwey, Dâ Jey Mwa, ma basa a yɛn e nû bezarap hom vê raane. Yaga ano, ma vo shom na yɛn sizɔng.

¹³Sede remo de yɛn a ga kyɛ́ ɛn nà wok me, jeng de ma ha na yɛn, ko a remo, ma kyɛ́ me nà toyo a yɛn, jeng de yɛn e jama sɛlɛ yi na me.

¹⁴Ma shara hɛn, na yɛn a wɔ̀ sangal e bavwel baduk, sede remo de wula wo shara pyɛ́. Ko e yɛn de ba hala vwel rat hemo he tɛ́ ɛ gbingiring, vit a mwat de a sé sangal e hɛ!”